УИХ-ын чуулганы өнгөрсөн баасан гаригийн хуралдаанаар хэд хэдэн хууль, тогтоолын эцсийн хэлэлцүүлгийг хийж батлав.

 Монгол Улсын эдийн засаг, нийгмийг 2014 онд хөгжүүлэх үндсэн чиглэлийг эхлээд батлав. Гишүүн С.Бямба­цогт “Төлөвлөгөө хэр бодитой, үнэн зөв байхаас хэрэгжилт нь шалтгаална, гэтэл улс орны эдийн засаг, нийгмийн хөгжлийн дунд, богино хугацааны энэ чухал баримт бичигт нухацтай хандах ёстой байтал  хэ­лэлцэх эсэхийг шийдээд тэр дор нь анхны хэлэлцүүлгийг хийж батлуулахаар оруулж ирлээ” гэж шүүмжлэв.

Засгийн газар макро эдийн засгийн тэнцвэр­тэй, тогтвортой байдлыг хангах зорилтын хүрээнд эдийн засгийг дэмжих мөнгөний бодлогыг хэрэгжүүлж, инфляцийн төвшинг зургаан хувьд барих, дотоодын нийт бүтээгдэхүүний өсөлтийг 16 хувьд хүргэхээр ирэх оны үндсэн чиглэлд тусгасан байна. Мөн төрөөс төмөр замын талаар ба­римт­лах бодлогын хэрэг­жилтийг эрчимжүүлэх, олон улсын нислэгийн давтамж, чиглэлийг нэ­мэгдүүлж, агаарын тээв­рийн салбарыг хөгжүүлэх, аймгийн төвүүдийг нийс­лэл хоттой хатуу хучилттай авто замаар холбох, ба­рилгын материалын им­пор­тыг бууруулж, дотоо­дын үйлдвэрлэлийг дэм­жих, орчны бохирдлоос хамгаалж, доройтлыг буу­руулж, ногоон хөгжлийг бий болгох, хөдөөгийн хөгжлийг эрчимжүүлж, “Сум” төслийг хэрэг­жүүлж эхлэх, “Ажилтай, орлоготой монгол хүн” хөтөлбөрийг хэрэгжүүлж цалин хөлсний бодлогыг шинэчлэх эрх зүйн орчныг бүрдүүлэх, төрөөс тэтгэв­рийн талаар баримтлах бодлого, хууль, эрх зүйн орчныг шинэчлэх зэрэг зорилтуудыг дэвшүүлсэн нь эдийн засгийн тогт­вортой байдлыг хадгалж,  өсөлтийг бататгах боломжтой гэж  тусгажээ.

Дараа нь Монгол Улсын 2014-2016 оны төс­вийн хүрээний мэдэгд­лийн тухай хуулийн төс­лийн эцсийн хэлэлцүүл­гийг хийж батлав. Мөн  Засгийн газрын тусгай сангийн тухай хуульд нэмэлт оруулах тухай хуулийн төслийг батлав. Ингэснээр шинээр Монгол судлалыг дэмжих сан нэмэгдэж байна.

Үнэт цаасны зах зээлийн тухай  хуулийн шинэчилсэн найруулгын төсөл, Хөдөө аж ахуйн гаралтай бараа, түүхий эдийн биржийн тухай хуульд өөрчлөлт оруулах тухай, Даатгалын тухай хуульд өөрчлөлт оруулах тухай, Санхүүгийн зохи­цуулах хорооны эрх зүйн байдлын тухай хуульд өөрчлөлт оруулах тухай, Аж ахуйн үйл ажилла­гааны тусгай зөвшөөр­лийн тухай хуульд өөрчлөлт оруулах тухай, Хууль хүчингүй болсонд тооцох тухай хуулийн төслүүд, Үнэт цаасны зах зээлийн тухай хууль батлагдсантай холбогдуулан авах зарим арга хэмжээний тухай” УИХ-ын  тогтоолын төс­лийн эцсийн  хэлэл­цүүлгийг хийж батлав. Хууль батлагдсантай хол­богдуулан УИХ-ын дарга З.Энхболд “Хоёр Засгийн газар дамжин удаан хэ­лэлцсэн  энэ  хууль  батлагдаж, манай улс үнэт цаасны зах зээлийн олон улсын жишигт нийцсэн хуультай боллоо” гэв.