Д.ГЭРЭЛ

УИХ-ын чуулган өчиг­дөр үдээс өмнө  хэлэлцэх бүх асуудлаа амжуу­лаад үдээс хойш нь ху­ралдсангүй. Ерөн­хийлөг­чийн сонгуулийн суртал­чилгаа эхэлсэн учраас түүнд түшээдийг хүч өгч ажиллах ёстой гэж УИХ-ын дарга үзжээ. Өнөөдөр чуулган хуралдах нь ч тодорхойгүй байна. УИХ-ын Тамгын газрын ажилтнуудад чуулганы хуралдаан түр завсарлах чиглэл өгсөн бөгөөд энэ асуудлыг өнөөдөр УИХ-ын даргын дэргэдэх зөвлөлөөр шийдвэрлэхээр зэхжээ. УИХ-ын дэгийн тухай хуульд зааснаар шаардлагатай тохиолдолд УИХ-ын даргын зөвлөл хуралдаж, чуулганы ху­рал­дааныг түр завсар­луулах заалттай юм байна. Үүний дагуу УИХ-ын даргын зөвлөл хуралдаа­ныг хэзээнээс завсар­луулах талаар хэ­лэл­цэнэ.  Харин өчигд­рийн хурлаар Монгол Ул­сын эдийн засаг, нийг­мийг 2014 онд хөгжүүлэх Үндсэн чиглэ­лийн тогтоо­лын төслийг хэлэлцэх эсэхийг хэлэлц­сэн юм. Инфляцийн төвшинг  зургаан хувьд барихад мөнгөний бодло­гын ямар арга хэрэгслийг хэрэглэх, “Чингис” бон­дын хүрээнд мөнгөний нийлүүлэлтийг яаж зохи­цуулах гэж байгаа, цалин, тэтгэвэр, тэтгэмжийн хэм­жээг нэмэгдүүлэх та­лаар ямар бодлого барим­талж байгаа, эдийн зас­гийн өсөлтөөс бий болох орлогын хуваа­рилалт ямар байх зэрэг мэдээллийг түшээдэд өг­сөн. Үүнтэй холбогдуулан гишүүн Ц.Нямдорж хуулиудад их өөрчлөлт оруулж байгаа нь тогтсон хэв маяг, хуулиу­дыг тогтвортой мөрдөх зарчмыг алдагдуулж байгааг анхаараач гэсэн ч бусад нь хуулийн төслийг хэлэлцэх нь зүйтэй гэдэгт санал нэгдсэн юм. Үүний дараа  Монгол судлалыг дэмжих сангийн хөрөн­гийг Монгол судлалын номын сан, мэдээллийн нэгдсэн сан байгуулж баяжуулах, монгол судлаач бэлтгэх, давтан сургах зорилгоор тэтгэлэг олгох тухай ярилц­­сан.  Мөн  “Проку­рорын байгуул­лагын бүтэц, зохион байгуулалт, цалингийн санг тогтоох тухай тогтоо­лын хавсрал­тад өөрчлөлт оруулах тухай” төслийг хэлэлцлээ. Тогтоолын төсөлтэй хол­боо­той зарчмын зөрүүтэй санал гаралгүй гишүү­дийн олонх нь дэмжин батлав.