М.ЦЭЦЭГ
Ерөнхийлөгч Ц.Элбэгдорж нэр дэвшигч С.Чинзоригтой өнгөрсөн оны арванхоёрдугаар сарын 5-нд уулзсан байгаа юм. Уулзалт Ерөнхийлөгчийн албан өрөөнд болсон нь тодорхой. Хоёр эрхмийн ярилцсан сэдэв ч тодорхой. Өвөрхангайн тойргийн маргаан. УИХ-ын сонгуульд өрсөлдөгчөөсөө үнэмлэхүй олон санал авсан С.Чинзоригийн мандатыг зарим хүн булаах гэж байсан цаг үе байсан.
Нэр дэвшигч С.Чинзориг МАН-ын гишүүн. Тэрээр шүүхээр хүч түрж саналыг нь луйвардах оролдлогыг ойлгуулах гэж ардчилсан, шударга шүүхийн төлөө “тэмцэгч” Ерөнхийлөгч Ц.Элбэгдоржтой уулзсан нь энэ.
С.Чинзориг асуудлаа ойлгомжтой ярьсан. Ерөнхийлөгч ч тэр асуудлыг сайн мэддэг байсан. Өвөрхангайд юу болсон, хэн хэдэн хувийн санал авсан, хэн шүүхэд нэхэмжлэл гаргасан, хоёр нам ямар зөрчилтэй байгаа, хэн хэний мандатыг булаах гэж буйг Ц.Элбэгдорж С.Чинзоригоор хэлүүлэлтгүй сайн мэддэг. Учирсан зовлонгоо ний нуугүй ярьсан нэр дэвшигчид “Ойлголоо” гэсэн хариуг Ерөнхийлөгч өгөөд өрөөнөөсөө гаргасан гэдэг. Ойлголоо гэж. Ерөнхийлөгч ойлгосон болохоор асуудал нааштай шийдэгдэнэ, мандатаа булаалгахгүй, үнэхээр шударга шүүх юм бол өөрийнх нь талд шийдвэр гарна гэж С.Чинзориг итгээд гарсан байх. Харамсалтай нь таван сарын дараа байдал эсрэгээр эргэв. МАН-ын нэр дэвшигч С.Чинзориг Ардчилсан намынханд мандатаа алдсан. Ардын намынхан тэмцээд ч, өвөрхангайнхан сонголтынхоо төлөө хотод ирж жагсаад ч байдлыг өөрчилж чадаагүй.
Төрийн тэргүүн ч “ойлголоо” гэсэн үгнээсээ буцсан. Тэр юу ч хэлсэнгүй, чив чимээгүй л өрөөндөө суусан. Яагаад Ерөнхийлөгч дуугүй байгааг одоо асуух хэрэгтэй болж. Яагаад ойлгоогүйгээ өнөөдөр тайлбарласангүй. Ардчилсан намын хоёр нэр дэвшигч тангараг өргөхөд юу ч хэлээгүй. Шүүх шударга, эсвэл шударга бус гэж дуугараагүй.
Товчхондоо Ерөнхийлөгч арванхорёдугаар сарын 5-нд ойлгоогүй байж. Угаас тэр Ерөнхийлөгчид дахин нэр дэвшихээр зэхэж байсан хуучин намдаа суудал нэмэхийн эсрэг С.Чинзоригийг ойлгож чадахгүй байсан. Энэ бүхнийхээ төлөө уучлалт гуйх ёстой. Эсвэл ойлголоо гэхийн оронд худал хэлснээ хүлээн зөвшөөрөх хэрэгтэй. Ардчилсан, шударга шүүхийн төлөө ажилладаг л юм бол Ерөнхийлөгч одоо үг хэлэх ёстой. С.Чинзоригийг, өвөрхангайнхныг гомдоож болохгүй. Ард түмний эв нэгдлийн бэлгэ тэмдэг Төрийн тэргүүн иргэдээ талцуулж боломгүй. Намынх нь, өөрийнх нь эрх ашгийн дээр улс орны эрх ашиг байх ёстой биш үү.
С.Чинзориг арга ядахдаа хэвлэлийнхэнд хандаж Ерөнхийлөгчтэй уулзсан тухайгаа, юу ярилцсанаа ингэж дэлгэсэн билээ. Тэрээр “Энд нуугаад байх зүйл алга. Тохиролцсон нь үнэн. Өнгөрсөн арванхоёрдугаар сарын 5-нд би Ерөнхийлөгчтэй уулзсан. Би бүх үнэнээ хэлсэн, арай дэндэж байна гэж. Ардчилсан Ерөнхийлөгчтэй, Ардчилсан нам Засаг барьж байгаа, дээрээс нь шүүхийн салбарт шинэчлэл хийнэ гэж ярьж буй цаг үед асуудлыг ингэж шүүхээр далайлгаж, дээрэм хийж шийдэхгүй гэж найдаж байна гэдгээ хэлсэн. Ерөнхийлөгч ойлголоо гэсэн” хэмээв.
