М.ГАН
Гадаад харилцааны сайд Л.Болд өчигдөр сэтгүүлчидтэй нээлттэй ярилцлаа. Ардчиллын болон хөгжлийн түүхэнд “Монголын туршлага” гэдэг шинэ хэллэг бий болгосон, “Гуравдагч хөрш”-ийн бодлогоороо ялгардаг болсон, олон улсын байгууллагуудтай харилцаа, хамтын ажиллагаагаа эрчимтэй хөгжүүлж буй зэрэг хэд хэдэн чиглэлээр манай улс дэлхий нийтэд үнэлэгдэж байгааг Л.Болд сайд тэмдэглэлээ. Монгол Улс хөгжлийн тусламж хүлээн авагч орон байсан бол одоо хөрөнгө оруулалт хүлээн авдаг улс гэдгээ гадаад харилцаагаараа дамжуулан дэлхий нийтэд нотлон харуулж байна гэлээ.
Монгол Улс энхийг эрхэмлэсэн, нээлттэй, бие даасан, олон тулгуурт гадаад бодлого хэрэгжүүлдэг. Шинэчлэлийн Засгийн газар энэ бодлогын замгамж чанарыг хадгалахын зэрэгцээ гадаад орнуудад ажиллаж, амьдарч буй иргэдээ хамгаалсан, тэдэнд ойртсон үйлчилгээ үзүүлэхийн тулд дорвитой шинэчлэл хийхээр ажиллаж байгааг Л.Болд сайд онцлов. Энэ хүрээнд дипломат төлөөлөгч, консулын газрынхаа тоог нэмэх, оновчтой газар байрлуулах, үйлчилгээний байгууллага болгон өргөжүүлэн зохион байгуулах зэрэг ажлыг шат дараатай хийж эхэлжээ. Иргэдийнхээ эрх ашгийг хамгаалах, тусламж үйлчилгээ үзүүлэх, ялтан шилжүүлэх ажил зохион байгуулж, цахим хэлбэрээр мэдээлэл хүлээн авч шийдвэрлэх тусгай шугам ч нээжээ. Одоо 39 оронд ажиллаж буй дипломат төлөөлөгчийн газрынхаа тоог энэ жилд багтаан 45 болгон нэмэх, Монгол Улсын иргэдийг аль болох олон оронд визгүй зорчуулахаар хэлэлцээ хийх ажлууд ахицтай байгаа аж. Үүнээс гадна газар өмчлөх, нийгмийн халамж тэтгэмжид хамрагдах боломжийг гадаадад буй монгол иргэддээ олгож, үүгээр дамжуулан тэднийг бүртгэлд бүрэн хамруулж, үнэн зөв мэдээллийн сантай болохоор зорьжээ.
Гадаад харилцааны яамны Консулын газрын дарга Ш.Сүхбаатарын мэдээлснээр 16 оронд манай улсын 159 иргэн ял эдэлж байна. Ял эдэлж байгаа монгол иргэдтэй биечлэн уулзах ажлыг Гадаад харилцааны яам өнгөрсөн оны аравдугаар сараас эхлүүлсэн. Ял эдэлж байгаа иргэд голдуу хулгай, хар тамхины хэрэгт холбогджээ. Зөвхөн хар тамхины хэргээр 34 иргэн ял эдэлж байгаагийн олонхи нь БНХАУ-д хоригдож байна. Солонгост 29 монгол хүн алга болсон гэх мэдээлэл бий. Тэдний 12 нь олдсон, ес нь Монголд байгаа нь тогтоогджээ. Үлдсэн хоёр нь ч олдоно гэж найдаж буйг Л.Болд сайд хэллээ.
