М.ЦЭЦЭГ

Ц.Элбэгдорж Ерөн­хийлөгчийн сонгуульд да­хин нэр дэвшихээр боллоо. Тэрээр 2009 онд Ард­чилсан намаас Ерөн­хий­лөгчийн сонгуульд нэр дэвшин ялалт байгуулсан бөгөөд намын гишүүнч­лэлээсээ түр түдгэлзээд байсан юм. Энэ удаад мөн АН-аас нэр дэвшихээр болж гишүүнчлэлээ сэр­гээлээ.

Тус намын Үндэсний зөвлөлдөх хорооны 42 дугаар хуралдаан өчигдөр Төрийн ордонд болж гурван асуудал хэлэлцэв. Эхлээд Ерөнхийлөгчийн сонгуульд нэр дэвшигчийг сонгох журмаа батлав. Дараа нь Ерөнхий нарийн бичгийн даргыг томиллоо. Энэ албанд үүрэг гүй­цэтгэгчээр Ц.Оюундарь ажиллаж байсан бөгөөд түүнийг батламжлав. Ерөнхий  нарийн бичгийн даргыг томилох санал хураалт нууц болж, ҮЗХ-ны гишүүдийн олонх Ц.Оюундарийг дэмжсэн байна. Санал хураалт болж байх хооронд Ардчилсан намын Гүйцэтгэх зөвлөл Ерөнхий сайдын өрөөнд хуралдлаа. Журмын дагуу Ерөнхийлөгчид нэр дэв­ших сонирхолтой эрхмүүд Гүйцэтгэх зөвлөлд өргө­дөл бичиж өгөх ёстой бө­гөөд Ерөнхийлөгч Ц.Эл­бэг­дорж нэр дэвшихээ илэр­хийлж өргөдөл өгсөн байв. Түүний асуудлыг хэлэлцээд Үндэсний зөвлөлдөх хорооны хуралд орууллаа. Ардчилсан намын Ерөнхийлөгчийн сонгуульд нэр дэвшүүлэх хурал товчхон болж өндөрлөв. Нэр дэвших ганцхан эрхмийн нэр өм­нө нь яригдаж байсан. Хэвлэлийнхний таамаг, намын удирдах байгуул­лагын бэлдсэн төлөвлө­гөөний дагуу асуудлаа шуурхай шийдлээ.

УИХ-ын гишүүн, Үйлдвэр, хөдөө аж ахуйн сайд, тус намын МоАХ фракцын дарга Х.Бат­тулга өрсөлдөнө гэсэн таамаг улс төрийн хүрээнд  явж байсан ч талаар боллоо. Ерөн­хий­лөгч Ц.Элбэг­дорж   өрсөл­дөгчгүйгээр нэр дэв­шигчээр тодров. Нэр дэвшигч нь ялгүй, татварын өр төлбөргүй, Ерөнхийлөгчийн албыг хашиж чадахуйц ёс зүйтэй хүн байх ёстой гэсэн шал­гуурыг журамдаа тусгасан байв.