Төв Азийн Бүс Нутгийн Эдийн Засгийн Хамтын Ажиллагааны Хөтөлбөр буюу КАРЕК нь Азийн хөгжлийн банк (АХБ)-ны дэмжлэгтэйгээр 1996 оноос эхлэн бүс нутгийн орнуудын эдийн засгийн өсөлтийг дэмжиж, худалдааг хөгжүүлэх замаар ядуурлыг бууруулах зорилгоор хэрэгжиж эхэлсэн билээ. Одоогоор 10 гишүүн орны хүрээнд, АХБ, НҮБ-ийн хөгжлийн хөтөлбөр, Европын сэргээн босголт, хөгжлийн банк, Дэлхийн банк, Олон улсын валютын сан, Исламын хөгжлийн банк зэрэг олон улсын байгууллагын дэмжлэг оролцоотойгоор хэрэгжиж байна. Монгол Улс 2003 онд тус хөтөлбөрийн гишүүн орон болсон. Хөтөлбөр нь Төв Азийн бүс нутгийн хэм­жээнд дөрвөн гол салбарт хамтран ажиллаж, тэдгээрийг зохицуулах уулзалт, гишүүн орнуудын сайд нарын хурал зэргийг тогтмол зохион байгуулж, худалдаа, эдийн засгийн өсөлтийг дэмжих, дэд бүтцийг хөгжүүлэх төсөл, арга хэмжээг хэрэгжүүлдэг. Худалдааг  хөнгөвчлөх хөтөлбөрт хамаарах аливаа арга хэмжээ, үйл ажиллагаатай холбоотой стратеги төвшний шийдвэр болон үйл ажиллагааны төлөвлөлт гаргахад заавар, зөвлөмж өгөх асуудалд Гаалийн Хамтын Ажиллагааны Хороо (ГХАХ) түлхүү анхаарал хандуулдаг. ГХАХ нь гишүүн орнуудын гаалийн байгууллагын дарга нарын статусын бүрэлдэхүүнтэй ажилладаг бөгөөд тус хорооны анхны хуралдаан нь БНХАУ-ын Өрөмч хотод 2002 оны наймдугаар сард хуралдсан. ГХАХ-ны IV хуралдааныг Монгол Улс  2005 онд нутагтаа амжилттай зохион байгуулж байсан бөгөөд  ээлжит XIV хуралдааныг АХБ-тай хамтран 2015 оны  наймдугаар сарын 20-21-ний өдрүүдэд зохион байгууллаа. Хуралдаанд АХБ, ДГБ болон 10 гишүүн орны 40 гаруй төлөөлөгч оролцов.Энэхүү хуралдааны үеэр КАРЕК-ийн бүс нутгийн дамжин өнгөрөх, тээврийн коридор, уг бүс нутагт тээвэр зуучлагч нарт тулгарч буй хүндрэл, түүнээс гарах арга зам, төр, хувийн хэвшлийн хамтын ажиллагааг өргөжүүлэх, тогтмолжуулах, КАРЕК-ын институт болон Гаалийн чадавх бэхжүүлэхэд хэрэгжүүлэх хөтөлбөр, үйл ажиллагаанууд, хилийн нэгдсэн менежмент болон АХБ-ны санхүүжилтээр хэрэгжүүлэх “Хилийн үйлчилгээг сайжруулах бүс нутгийн төсөл”-ийн талаар Гишүүн орнууд болон тээвэр зуучийн төлөөлөл харилцан санал бодлоо солилцож, хэд хэдэн орны тэргүүн туршлагын талаар мэдээллийг харилцан солилцсоны үр дүнд, цаашид авч хэрэгжүүлэх арга хэмжээнүүдийн талаар албан ёны байр суурийг тусгасан хурлын тэмдэглэлийг гаргалаа. Үүнийг Бүс нутгийн удирдах ажилтнуудын хуралдаанд танилцуулах юм байна.