Энэ удаагийн пар­ла­мент гурван дэд даргатай. С.Баярцогт огцорсноор нэг суудал нь эзэнгүй байгаа юм. Энэ суудалд Ардчил­сан намаас Р.Гончигдорж гишүүнийг нэр дэв­шүүл­сэн гэдгээ уржигдар тус намын бүлгээс танил­цуул­сан. Нэр дэвшигчийг өчигдөр Төрийн байгуу­лалтын байнгын хороогоор хэлэлцээд дэмжлээ.

УИХ-ын дэд даргад нэр дэвшүүлэх талаар гаргасан саналыг Ард­чилсан намын бүлгийн дарга Д.Эрдэнэбат танил­цуулав. Тэрээр та­нил­цуулгадаа Р.Гон­чиг­дорж нь 1975 оноос Монгол Улсын их сургуулийн багшаас ажлын гараагаа эхлүүлж, 1990-1992 онд Улсын Бага Хурлын гишүүн, 1992 оноос хойш парламентын гишүүнээр нийт зургаан удаа сон­гогдон ажиллаж байгаа. Мөн 1990-1992 онд Мон­гол Улсын Дэд Ерөнхий­лөгч, Улсын Бага Хурлын дарга, 1996-2000 онд Улсын Их Хурлын дарга зэрэг төрийн өндөр албанд олон удаа сонгогдож ажилласан төрийн ажлын арвин туршлагатай, өндөр мэдлэг чадвартай пар­ламентч. Түүний санаач­лан батлуулсан хуулиуд өнөөгийн эрх зүйн тогтолцоог бүрдүүлэхэд чухал үүрэг гүйцэтгэж байгааг онцоллоо.

Нэр дэвшигчээс асуулт асуух гишүүн гар­сангүй. Харин УИХ-ын дэд дарга Л.Цог парла­мен­тыг улам бэх­жүүлж төлөвшүүлэх, эв нэгдлийг хангахад анхаарч хувь нэмрээ оруулахыг нэр дэвшигчээс хүслээ.  Ин­гээд санал хураалгахад байнгын хорооны хурал­даанд оролцсон гишүү­дийн олонх нь нэр дэвшигч Р.Гончигдоржийг УИХ-ын дэд даргаар сонгохыг дэмжиж, энэ тухай санал, дүгнэлтээ чуулганы нэгд­сэн хуралдаанд оруулж хэлэлцүүлэхээр боллоо.

Р.Гончигдорж гишүү­нийг өнөөдрийн чуулганы нэгдсэн хуралдаанаар хэ­лэлцэн сонгохоор тө­лөв­лөжээ. Ардчилсан намын бүлэг дотор энэ албан ту­шаалд өрсөлдөгчид олон байсан. Тухайлбал, Г.Бат­хүү, М.Батчимэг, Р.Бур­маа, Р.Амаржаргал гэх мэт тус намын бүлэг доторх олон фракц нэр дэвшүүлэн өрсөлдүүлснээс Р.Гон­чигдорж гишүүн олонхийн санал авсан юм.