- Сувилагч хийж бусдын төлөө амьдралаа зориулсан итали өвгөн найман сарын өмнөөс галт тэргээр аялан амьдрах болжээ. Галт тэргээр үнэгүй зорчих хөгжлийн бэрхшээлтэй иргэний үнэмлэх нь түүний цорын ганц өмч юм -
Н.МӨНХЖИН
80 настай, сувилагч асан Силвано Тониоло өвгөн гадаа гудамжинд унталгүйгээр галт тэргээр гэр хийн амьдарч байна. Тэрээр ийнхүү орон гэргүй хүн болж, гудамжаар тэнэж амьдрах тавилангаас зайлсхийжээ. Силвано зогсож байгаа, эсвэл буудал дээр ээлжээ хүлээн зогсолт хийсэн галт тэргийг бус, харин Итали орноор хөдөлж, аялж байгаа галт тэргийг ашигладаг. Торино хотын төв дэхь жижигхэн байрныхаа төлбөрийг дийлэлгүй хөөгдсөнөөс хойш ингэж амьдраад найман сар болж байгаа аж. Тониоло хэдэн жилийн өмнөөс тархины өвчтэй болж хөгжлийн бэрхшээлтэй иргэний үнэмлэхтэй болсноор галт тэргээр үнэгүй зорчих эрхтэй болсон байна. Тэрээр энэ найман сард зам, чиглэлээ өөрчлөхөөс бусдаар галт тэрэгнээс буусангүй. Силвано Тониоло янз бүрийн хотоор аялахад галт тэрэг хаанаас, хэдээс хөдөлдөг, хаана сэлгээ хийхийг цээжээр сайн мэддэг аж.
СУВИЛАГЧ, САЙН ДУРЫН АЖИЛТАН
Өгөөмөр сэтгэлтэй Силвано бүхий л амьдралаа бусдын төлөө зориулж, сувилагч, сайн дурын ажил хийж өнгөрөөжээ. “Би сувилагчаар ажиллаж байсан. Мөн Угандад сайн дурын ажилтан байлаа. Угандаас буцаж ирээд тэтгэвэртээ гарах хүртлээ дахиад сувилагчаар ажилласан” хэмээн Тониоло Corriere della Sera сонинд ярьж байна. Тэрээр Итали орон даяар аялж болох ч зөвхөн Пьемонте, Лижуриа мужаар аялаад хэвшчихсэн аж. “Надад төрөл төрөгсөд байхгүй. Харин хэдэн найз бий. Галт тэргээр аялж явахдаа тэд нартайгаа тааралддаг. Зарим нь хоолонд урьдаг. Би ийм байдалтай амьдардаг болохоор урилгаас нь татгалзаж чаддаггүй” хэмээн өгүүлж байна.
Тониоло өвөө үнэгүй зорчих үнэмлэхээ ашиглахдаа үндэсний төмөр замын компанийн дүрэм журмыг ихэд хүндэтгэнэ. “Би төмөр замын буудалд хонож үзээгүй. Шөнөөр ч галт тэргэнд аялж, эцсийн зогсоолд хүрэхээр буугаад хөдөлж буй галт тэргэнд суудаг” хэмээн ярилаа.
ХӨНГӨН АЧАА
Силвано ачаа гэхээр юм бараг авч явдаггүй. Ачаа авч явахаар аюултай байдаг аж. “Миний ачааг хоёр ч удаа хулгайлж байсан. Одоо шөнө нь дэр болчихдог нэг хар үүргэвч авч явдаг. Тэгэхээр надаас хулгайлаад байх юм байхгүй” хэмээн итали өвөө өгүүлж байна. Үүргэвчин дотор нь солионы нэг цамц, нэг хос оймс, шүдний сойз, саван байдаг. Хантаазных нь дотор талын халаасанд багахан евротой хэтэвч, галт тэргээр үнэгүй зорчдог үнэмлэх нь бий. Миний цорын ганц баялаг гэвэл энэ л байна. Ганц нэг эд зүйлсээ нэгэн сүмд хадгалуулчихсан. Хааяа тийшээ очиж хэрэгтэй гэсэн юмаа авдаг” хэмээн Тониоло ярилаа.
“БИ ОРОН ДЭЭР УНТАХЫГ ХҮСЧ БАЙНА”
Силвано Тониоло нэн ядуу нөхцөлд амьдардаг ч нэр төртэй, сэтгэл өөдрөг нэгэн. “Би орон гэргүй хүн биш. Гуниглаж, цөхөрсөн ч хүн биш. Өглөө сэрээд вагоны “00” орж гар нүүрээ угааж, сахлаа авдаг” хэмээн ярилаа. Силвано энэ амьдралдаа дасаж, бүр үнэлж хайрлах болжээ. “Аялж явахдаа олон хүнтэй танилцдаг. Билет шалгагч нарыг бүгдийг нь танина. Зарим нь бүр найз. Тэд өглөөгүүр кофегоор дайлах нь бий” хэмээн 80 настай өвөө өгүүлж байна. Үүний зэрэгцээ тэрээр орон нутгийн эрх баригчдад хандаж хямд төлбөртэй даруухан байр олж өгөхийг хүсчээ. Нэгэн сайхан өдөр хүссэн байрыг нь өгнө гэдэгт итгэлтэй байдаг аж. “Би жижигхэн гэртэй болчихвол энэ амьдралаа санагалзахгүй. Би одоо 80 настай, шөнө орон дээрээ унтаж байвал их гоё байна” хэмээн Силвано ярив.
ЭМГЭНЭЛТЭЙ ХЯМРАЛ
Силвано Тониологийн тохиолдол нь Итали орныг нөмөрсөн эмгэнэлтэй нөхцөл байдлын тусгал юм. Тус улсад өдөрт 2500 хүн ажилгүй болж байна. Эдийн засгийн хямралд цөхөрсөн италичууд улс орноо эмхэлж чадахгүй байгаа улстөрчдийг санаа зовсон нүдээр ширтэж байна. Хоёрдугаар сарын 25-ны сонгуулиас хойш италичууд Засгийн газраа байгуулж чадсангүй. Улс төрийн хямралын улмаас сүүлийн хоёр сард дотоодын нийт бүтээгдэхүүн нэг хувиар буурчээ. Улс төр, эдийн засгийн хямралд ороод байгаа Итали оронд Силвано Тониоло мэт хүмүүсийг анхаарах сөхөө алга бололтой.
“АВС”
