М.ГАН

Олон улсын эрэн сур­валжлах сэтгүүлчдийн баг  УИХ-ын дэд дарга С.Баяр­цогтыг гадаадад нууц данстай хэмээн мэ­дээлсэн. С.Баярцогт ёс зүйн алдаа гаргаснаа хү­лээн зөвшөөрч УИХ-ын дэд даргаас огцрох өр­гөдлөө өгсөн юм. Энэ талаар УИХ-ын чуулганы нэгдсэн хуралдаанаар хэ­лэлцэж байгаа. Харин  Ёс зүйн дэд хороо өчигдөр хуралдаж гишүүн С.Баяр­цогтод хариуцлага  тооцох эсэхийг хэлэлцэв.

Д.Батцогт нарын до­лоон гишүүн С.Баяр­цогтын асуудлыг Ёс зүйн дэд хороогоор хэлэлцэх ёстой гэсэн санал гаргасан юм. Дэд хорооны хурал хаалттай болсон. Учир нь УИХ дахь Ардчилсан на­мын бүлгийн ахлагч Д.Эр­дэнэбат асуудлыг олон талаас нь ярилцах ёстой гээд хуралдааныг хаалттай горимоор явуулах санал гаргасан юм. Дэд хорооны дарга М.Бат­чимэг, ги­шүүн Ш.Түв­дэндорж, Ж.Бат­зандан, З.Баян­сэлэнгэ, Д.Тэр­бишдагва, Д.Эрдэнэбат, Б.Наранхүү, С.Баярцогт нар нэг цаг гаруй хуга­цаанд хуралд­сан юм. Ху­ралдааны дараа дэд хо­рооны дарга М.Бат­чимэг хэвлэлийнхний асуултад хариулав.

-Дэд хороо ямар шийд­вэр гаргав?

-Ёс зүйн дэд хорооны хуралдаанаар С.Баярцогт гишүүний асуудлыг хэ­лэл­цээд УИХ-ын ги­шүүний ёс зүйн дүрмийн 4.1 дэх заалтыг зөрчсөн байна гэж үзлээ.

-Зөрчсөн заалтыг тодруулна уу?

-4.1-д УИХ-ын ги­шүүн хөрөнгө орлогын мэдүүлгээ хуульд заасан хугацаанд үнэн зөв мэдүүлэх үүрэгтэй. Үүнд алдаа гаргасан байна, ёс зүйн хариуцлага тооцох нөхцөл бүрдсэн гэсэн дүгнэлт хийлээ.

-Ёс зүйн алдаа гаргасан гишүүнд ямар хариуцлага тооцох вэ?

-Ёс зүйн дэд хороооны дүрмийн хувьд хариуцлага тооцох дөрвөн хэлбэр байдаг. Сануулах бөгөөд хариуцлага тооцох гэсэн хариуцлагын хоёр хувилбар бий. Тиймээс энэ асуудлыг УИХ бүрэн бүрэлдэхүүнээрээ хэ­лэл­цэж, УИХ-ын гишүүнд хариуцлага тооцох асууд­лыг шийдэх ёстой гэж үзсэн.