Н.МӨНХЖИН

Forbes сэтгүүл Оросын хамгийн баян бизнес­мэнүү­дийн жагсаалтыг арав дахь удаагаа гарга­жээ. Тус сэтгүүл 500 сая доллараас дээш хөрөнгө­тэй шинэ оросуудыг үүнд багтаасан байна. 2004 онд анх энэ жагсаалтыг гар­гахад доод хязгаар нь 210 сая доллар байсан юм.

2013 оны жагсаалтыг “Металлоинвест” компанийн эзэн Алишер Усманов 17.5 тэрбум дол­ларын хөрөнгөөр тэр­гүүлж, өнгөрсөн оны амжилтаа давтав. 16.5 тэр­бум долларын хөрөнгөтэй “Альфа-групп” концер­ний хамгийн том хувьцаа эзэмшигч Михаил Фрид­ман хоёрдугаар байрт ор­лоо. Гуравдугаар байрт “Новатэк” компанийн за­хи­рал Леонид Михельсон (15.4 тэрбум) бичигдэв. Жилийн өмнө Фридман зургаа, Михельсон арав­дугаар байр эзэлж байсан билээ.

Оросын тэргүүн бая­чуу­дын эхний арван байранд “Ренова”-гийн эзэн Виктор Вексельберг (15,1 тэрбум), “Лукойл”-ын Ерөнхийлөгч Вагит Алекперов (14,8 тэрбум), “Еврохим” компанийн удирдах зөвлөлийн дарга Андрей Мельниченко (14,4 тэрбум), “Интер­рос”-ын тэргүүн Вла­димир Потанин (14,3 тэрбум), НЛМК-ийн удирдах зөвлөлийн гишүүн Владимир Лисин (14,1 тэрбум), “Новатэк”-ийг хамтран эзэмшигч, “Gunvor”-ийн босс Геннадий Тимченко (14,1 тэрбум) нар оржээ. Эхний аравт “Онэксим” группын эзэн Михаил Прохоров 13 тэрбумын долларын хө­рөн­гөөр багтсан байна.

Forbes сэтгүүл нийт Оросын 37 бизнесмэнийг жагсаалтад хамруулжээ. Тэдний тавынх нь хөрөнгө чинээ 2004 оноос хойш арав дахин өссөн аж. Өн­гөрсөн арван жилд Михельсоны хөрөнгө 34 дахин, Усмановынх 18 дахин өсчээ. “Урал­калий”-ийг хамтран эзэм­шигч Дмитрий Рыболов­левийн эд хөрөнгө 2004 оноос хойш 22 дахин өсөөд байна. ОХУ-ын Холбооны зөвлөлийн гишүүн Сулей­ман Керимовынх 13, Мель­ниченкогийнх 13 да­хин өсчээ. Рыболовлев (9.1 тэрбум доллар) 2013 оны жагсаалтад 14-т, Керимов (7.1 тэрбум доллар) 20-д бичигдлээ. Нэр хүнд бүхий энэ сэтгүүл 1987 оноос хойш дэлхийн хамгийн баян хүмүүсийн жагсаал­тыг нийтэлж байгаа. Ха­рин Оросын бизнесмэнүү­дийг 1997 оноос хойш энэ жагсаалтад хамруулж, хам­гийн түрүүнд Борис Березовский гурван тэр­бум долларын хөрөнгөөрөө багтаж байжээ. Түүний араас “ЮКОС”-ын тэр­гүүн Михаил Ходорковс­кий (2.4 тэрбум), тэр үеийн “Газпром”-ын удирдагч Рем Вяхирев (1.4 тэрбум) нар Forbes-ийн баячуудын тоонд орж байв.

2004 онд Оросын хам­гийн баян бизнесмэ­нүүдийн жагсаалтыг анх дангаар гаргахад Ходор­ковский тэргүүлж байлаа. Түүний хөрөнгийг 15.2 тэрбум доллар хэмээн үнэлж байсан юм. Одооны тэргүүн баян, Английн хөлбөмбөгийн “Арсенал” клубын томоохон хувьцаа эзэмшигч А.Усманов ар­ван  жилийн өмнө дөнгөж нэг тэрбум доллартайгаар 36-д бичигдэж байжээ. 

“Forbes”