М.ГАН
Ерөнхий сайд Н.Алтанхуягийг огцруулах эсэх асуудлыг Төрийн байгуулалтын байнгын хорооны өчигдрийн хуралдаанаар хэлэлцлээ. Ардын намын бүлгийн 25 гишүүн Засгийн газрын тэргүүнийг огцруулах бичиг өргөн барьсан юм. Байнгын хорооны хэлэлцүүлэгт тус бүлгийн гишүүд, бусад нам, эвслийн бүлгийн гишүүд, бие даагчид нийлсэн нэлээд өргөн бүрэлдэхүүн оролцлоо. Мөн Ерөнхий сайдын зөвлөхүүд, ажлын албаныхан, Ерөнхийлөгчийн Тамгын газрынхан хуралдааныг ажиглав. Төрийн байгуулалтын байнгын хороо нийт 16 гишүүнтэй юм. Үүнд Ардчилсан намаас байнгын хорооны дарга А.Бакей, гишүүн Ж.Батзандан, Г.Батхүү, М.Батчимэг, Д.Бат-Эрдэнэ, С.Баярцогт, Р.Бурмаа, Р.Гончигдорж, Б.Наранхүү, Ч.Сайханбилэг, Х.Тэмүүжин, Д.Эрдэнэбат, “Шударга ёс” эвслээс Н.Батцэрэг, Л.Цог, МАН-аас М.Энхболд нар харъяалагддаг юм.
Хуралдааны эхэнд МАН-ын дарга Ө.Энхтүвшин Ерөнхий сайдыг огцруулах үндэслэлээ нэгбүрчлэн уншиж танилцуулав. Сүүлийн хэдэн сар Монгол Улсын нэр хүнд дэлхийн тавцанд үлэмж доошилж, гадаадын хөрөнгө оруулалт буурсан, Хятадын Төрийн тэргүүн Си Жинпинь ОХУ-д айлчилж, БНХАУ, ОХУ төмөр зам, уул уурхайн салбарт хамтран ажиллах чиглэлээр гэрээ байгуулж, нүүрсээ худалдах, худалдан авах яриа хэлэлцээ эрчимжүүлж байхад Ерөнхий сайд “Тэр хоёр хүн уулзаа л биз” гэсэн маш хариуцлагагүй, хайнга үг хэлсэн. Мөн саяхан манай улсад айлчилсан Туркийн Ерөнхий сайдтай хамт хэвлэлийн мэдээлэл хийх үеэр “Манай туркчууд өвөг дээдсийнхээ нутагт визгүй зорчихоор боллоо” хэмээн хариуцлагагүй мэдэгдэл хийсэн.
Ууланд авирч хийморио сэргээхээр яваад цасанд боогдсон нэрээр олон хүнийг дагуулж эрсдэлд оруулав. Ингэснээр олон арван сая төгрөгөөр эрэн хайж, ард түмнийг түгшээлээ. Иймд ёс зүйн хариуцлага хүлээх ёстой. Ерөнхий сайд Н.Алтанхуяг удаа дараа Үндсэн хууль зөрчсөн. Монголын үндэсний сэтгүүл зүй үүсч хөгжсөний 100 жилийн ойн өдөр нэр бүхий кабелийн есөн телевиз, 16 вэбсайт, телевизүүдийг хаасан зэрэг огцруулах үндэслэлийг танилцуулсны дараа МАН-ын голдуу гишүүд Ерөнхий сайдад асуулт тавив.
М.Энхболд:
-Үндсэн хууль зөрчиж зарим аймгийн дарга нарыг үүрэг гүйцэтгэгчээр томилсноо юу гэж тайлбарлах вэ. Яагаад хууль зөрчсөн захирамжаа Цэцийн хуралдаан болохоос өмнө цуцалсан бэ. Гадаад харилцаанд хариуцлагагүй мэдэгдэл хийснээ юу гэж үзэж байна. Мөн Засгийн газрын бондын талаар тайлбар өгнө үү?
Н.Алтанхуяг:
-Цаас харж бодитой зүйл яриарай. Би Үндсэн хууль зөрчдөг хүн биш. 2004 онд Ардчилсан нам МАН-тай хамтарч ажиллаж байхад дөрвөн аймгийн Засаг даргыг үүрэг гүйцэтгэгчээр томилж байжээ.Тэр жишгийг дагасан юм. Нэг агентлагийн даргыг ч өөрчилж чаддаггүй Ерөнхий сайдтай байгаад яах юм. Хаврын чуулганы өмнө л Ерөнхий сайдыг хууль зөрчсөн болгож харагдуулах ганц цагаан цаас хэрэгтэй байсан болохоор би захирамжуудаа хүчингүй болгосон. Орос, Хятад хоёр орны харилцааны талаар би мэдэгдэл хийгээгүй. Хоёр орны харилцааны талаар мэдэгдэл хийдэг эргүү Ерөнхий сайд байх уу, байдаггүй юм. Ер нь Орос, Монголын харилцааны талаар хэн, юу яриад байгааг тодруул гэж Тагнуулынханд хэлсэн. Судалсан байна. Надад хоёр цаас өгсөн. Хэн нь юу яриад байгааг хэлчихэж чадна шүү. Гэхдээ энд хэлээд яах вэ. Хуралдаанаа хаалттай горимоор явуулбал ярьж болох л юм. Ер нь “Роснефть”-ийн талаар хэн, юу ярьсныг мэднэ шүү. “Манай Турк” гэсэн агуулгаар би яриагүй. Тэр бондыг Н.Батбаяр сайд хариул.
Ц.Нямдорж:
-Хамгийн олон удаа огцрох асуудалд орсон хүн би. Хуралдааны горимыг би сайн мэднэ. Миний өмнөөс хэн ч ярьдаггүй байсан. Сайд нар биш Ерөнхий сайд өөрөө хариулах ёстой.
Ч.Сайханбилэг:
-Би хариулаад явж болно. Битгий масктай жүжиг тавиад бай.
Сү.Батболд:
-2012 оны эцсээр эдийн засгийн өсөлт хоёр дахин буурчээ. Макро эдийн засгийн үзүүлэлт буурч буйг юу гэж үзэж байна вэ. Өмнөх Засгийн газар буруутай юм шиг ярьсан байна. Өмнөх Засгийн газрын үед байсан үзүүлэлт одоо буурсан биз дээ. Хэрэв буруу байсан бол бид хамтарч ажилласан шүү. Сүүлийн 4-5 сар л МАН-ын Засгийн газар байсан. Том бүтээн байгуулалтын суурийг бид хамтдаа тавьсан. Одоо хөдлөхгүй болохоор өмнөхийн буруу гэх юм. Энэ ямар учиртай юм бэ?
Н.Алтанхуяг:
-Би найман сар тэвчлээ. Одоо дуугарах цаг ирж. Би тэвчсэн, одоо алийн болгон баас цэвэрлэдэг юм. Тавантолгойг хамтраад босгосон. Иргэдэд амалсан нэг сая төгрөгөө өгөх гэж 350 сая ам.доллар зээлсэн. Тэрийг чинь нүүрсээр төлөөд хүчрэхгүй байна. Хөгжлийн банк ч адилхан. Оюутолгойгоос хамтраад 250 сая ам.долларын зээл авсан. Үүний өрийг бид одоо төлж байна.
Я.Содбаатар:
-Өнгөрсөн ням гаригт болсон Сонгинохайрхан дүүргийн дахин санал хураалтын үеэр та цахим ертөнцөөр сурталчилгаа хийснээ юу гэж тайлбарлах вэ?
Н.Алтанхуяг:
-Саналаа өгөөрэй л гэж уриалсан.
