Ө.СОНОР

Монголчууд бид тав дахь төрийн тэргүүнээ ирэх зургадугаар сард сон­гоно.  Сонгуулийн тов зарлагдсан. Харин одоо  пар­ламентад суудалтай  на­мууд хэнийг нэр дэв­шүүлэх вэ гэдэгт хэсэг хэс­гээрээ лоббидсон, дунд нь  олон  төрлийн  улс төрийн тоглолт орсон хав­рын сүүл сарын өдрүүд  үргэлжилж байна. Хэв­лэ­лүүд ч хэн, хэн Ерөн­хий­лөгчийн сонгуульд санаар­хаж буй тухай тоймоо хэдийнэ нийтэлж эхэл­­жээ. АН-ын хувьд одоо­гийн төрийн тэргүүн Ц.Элбэгдоржийгоо дахин  сойно гэдгээ нэгэнт  зарла­сан  гэдгээс өөр олон ху­вил­бар ярилгүй нам гүм  байгаа. Харин МАН-аас төрийн тэргүүний сон­гуульд нэр дэвших со­нирхолтой кандидатууд гарын таван хуруунаас даваад байгаагийн нэг нь Н.Энхболд юм.

Эх сурвалжийн мэ­дээлс­нээр мань хүнийг Ц.Элбэгдоржийн эсрэг  марафонд гүйлгэхээр нэ­лээд  хүчтэй лобби МАН дунд бий болсон гэнэ.  Ин­гэ­хэд Н.Энхболд гэж  хэн бэ, тэрээр Ерөнхийлөгчид  өрсөлдөх хэмжээнд болов­сорч  гүйцсэн улстөрч мөн үү.

Эдийн засагч мэргэ­жил­тэй, удирдахуйн ухаа­ны магистр тэрээр Соёлын  яамны хэвлэлийн нэгдсэн редакцид  эдийн засагчаар  ажлынхаа гарааг эхэлс­нээс хойш УИХ-ын  ги­шүүнээр гурван удаа  сон­гог­дож, Гадаад хэргийн сайд, Засгийн газрын  хэ­рэг эрхлэх газрын дарга, УИХ-ын дэд даргын ал­быг хашиж  байсан юм.

Хэдий тийм боловч нам дотроо эхний хэдэд эрэмб­лэгдэж бусдыг араасаа дагуулсан лидер гэвэл бас үгүй. Товч­хондоо бол Н.Энхболд маш сайн гүйцэтгэгч болохоос байл­дан дагуулагч улстөрч биш ажээ. Түүнийг Ерөн­хий­лөгчид нэр дэвшүүл­лээ гэхэд элдэв юмтай холбож, идэж уусан бохир үйлд­лийг нь илчлээд бай­хаар­гүй томоотой хүн  байж мэдэх юм. Гэвч на­мынх нь Бага хурлын ги­шүүдийн олонхи үг, дуу­гүй гар өргөж нэр дэв­шүүл­чихээр гавьяатай дүр ч бас биш. Н.Энхболдыг Төв аймгаас гурван удаа гишүүнээр сонгогдоод бай­гааг нь үнэлбэл нэлээд  тогтвортой улстөрч гэж бодогдоно. Тэрээр тус айм­гийн харьяат. Харин аав нь Говь-Алтайн Жарга­лан­тынх, ээж нь Увсын зүүн сумаас гаралтай, өөрөө Завхан аймагт төр­сөн намтартай юм билээ. Ингэхээр  Н.Энхболд дөр­вөн  нутагтан ч юм шиг сонирхолтой баримт болж байгаа биз. 

Ингэхэд Ө.Энхтүвшин ч биш, Б.Бат-Эрдэнэ ч биш, Ж.Оюунхорол ч биш яагаад Н.Энхболдыг МАН-ынхан Ерөнхий­лөгчид нэр дэвшүүлэхээр хүчтэй лобби хийх болов. Үүний цаана С.Баяр бай­гаа  ажээ. Гадаад орныг олон сар гэрээ болгосон С.Баярын хүн нь Н.Энх­болд юм. Сонгуулийн хуу­лийн дагуу сүүлийн зур­гаан сар эх орондоо амьд­раагүй бол Ерөнхийлөгчид нэр дэвших боломжгүй. Иймээс хамгийн сүүлд Хөвсгөлд нэг үзэгдээд алга болсон С.Баярт ямар ч найраа байхгүй юм. Өөрөө нэгэнт боломжгүй тул тэ­рээр орныхоо хүнийг тө­рийн тэргүүнд сойх бод­лого гаргаж, нам дотроо тактик боловсруулж эхэл­сэн бололтой.

Гэтэл энэ бүх үйл явд­лын гаргалгаа огт өөр ту­хай мэдээлэл чих дэлслээ. Энэ нь С.Баяр Н.Энхбол­дыг сайн гүйцэтгэгч гэд­гээр нь бус Ц.Элбэгдор­жид тавьж өгч буй “зөөлөн  боорцог” гэдгээр нь харж буй явдал гэв. Энд өнөөх л долдугаар сарын 1-тэй  холбоотой үүх түүх сөхөг­дөж, уг хэрэг хариуцагчгүй хоцрох төлөвлөгөө байж мэдэх гэнэ.

Өөрөөр хэлбэл 2008 оны сонгуулийн да­раа гарсан үймээн, таван хү­нийг буудаж хөнөөсөн гэмт хэрэг, Оюутолгойн гэрээ гээд С.Баярыг Ерөн­хий сайд байх үед болсон үйл явд­лууд өөрийг нь буруу­тан болгоход хан­галт­тай их баримт болж буй болол­той. Харин Н.Энх­бол­дыгоо нэр дэвшүүлэх нь МАН-д болоод Монго­лын ард тү­мэнд биш Ц.Эл­бэгдоржид “бэлэг” болсон С.Баярт ашиг­тай хувилбар байх тухай улстөрчид сэдэв бол­гон ярьж байна.