Л.ЭНХТУЯА

Нийслэлийн Сонгино­хайрхан дүүрэг буюу УИХ-ын сонгуулийн 26 дугаар тойргийн дахин санал хураалт өчигдөр боллоо. Дахин санал хураалт өглөөний 07:00 цагаас эхэлж оройн 20:00 цаг хүртэл үргэлжлэв. УИХ-ын сонгуулийн 26 дугаар тойргийн хороо 32 хэсгийн хороотой бөгөөд сонгогч­дын нэрсийн жагсаалтад 179 мянга 824 иргэн бүртгүүлжээ. Тус тойрог гурван мандаттай, хоёр нь УИХ-д сонгогдсон юм. Гурав дахь мандатын төлөө Ардчилсан намаас Л.Эр­хэмбаяр, Ардын намаас Д.Сумьяабазар нар өр­сөлдөж байна. Тэд өн­гөрсөн оны долдугаар сард болсон УИХ-ын сонгуу­лиар 28-аас дээш хувийн санал авч чадаагүй учир дахин санал хураалтыг явуулж байгаа нь энэ. Дахин санал хураалтад улсын төсвөөс 397,4 сая төгрөг зарцуулж байгаа юм. Гэвч энэ мөнгийг да­хин санал хураалтад хү­рэлцэхгүй гэж Тойргийн хорооны дарга өнгөрсөн баасан гаригт мэдээлж байв.

26 дугаар тойргийн хо­рооны 45 дугаар хэсгийн хороонд очиход голдуу ахмадууд, дундаас дээш насныхан саналаа өгч бай­лаа. Ерөнхий сайд Н.Алтан­хуяг 12:00 цагт тус хэсгийн хороонд очиж саналаа өглөө.

Тойргийн хорооноос 16:00 цагт мэдээлэл хий­сэн бөгөөд нийт сон­гогчдын 25 хувь нь саналаа өгчээ. Гэхдээ дахин санал хураалтад ирц хамаар­даггүй.  Зөвхөн сонгуульд оролцон санал өгсөн иргэ­дийн олонхийн саналыг авч чадсан нэр дэвшигч ялах юм. Сонгинохайрхан дүүргээс УИХ-ын 75 дахь гишүүн сонгогдох учир­тай. Сана­лын хуудсыг автомат машинаар ун­шиж, тоолох учир сон­гуулийн дүн өнөө­дөр тодорхой болчихно.

Тус тойргоос МАХН-МҮАН-ын “Шударга ёс” эвслээс Д.Тэрбишдагва, Ардчилсан намаас  Л.Эр­дэ­нэчимэг нар УИХ-ын гишүүнээр сонгогдоод бай­гаа юм. Сонгино­хайр­ханчуудын гурав дахь тө­лөөлөл өнөөдөр тодорч, Л.Эрхэмбаяр, Д.Сумъяа­базар хоёрын нэг нь УИХ-ын танхимд суух эрхтэй болно.