М.ЦЭЦЭГ
УИХ-ын хаврын ээлжит чуулганы анхны нэгдсэн хуралдаан өчигдөр боллоо. Чуулганаар Монгол Улсын Эрдэнэсийн сангийн орлого, үндсэн болон гүйлгээ, сангийн зарлагын 2013 оны төсвийн тухай УИХ-ын тогтоолын төслийг хаалттай горимоор хэлэлцэв. Харин Ерөнхийлөгчийн сонгуулийн товыг зарлаж, зардлын хэмжээг баталлаа. Мөн УИХ-ын 26 дугаар тойрогт ирэх ням гаригт явуулах дахин санал хураалтын зардлын хэмжээг баталсан юм. Чуулганы нэгдсэн хуралдааны хэлэлцүүлгийг тоймлов.
ХАРААТ БУС АЖИЛЛАХЫГ ШҮҮГЧДЭД ЗАХИВ
Чуулганы энэ өдрийн нэгдсэн хуралдаанаар Улсын Дээд шүүхийн шүүгчид нэр дэвшигчдийг танилцуулав. Шүүхийн Ерөнхий зөвлөлийн гишүүдээс нууцаар санал хураахад шалгалтад хамрагдсан 35 хүний 24 нь тэнцэж, сонгон шалгаруулалтад орсон байна. Иймээс М.Батсуурь, Б.Батцэрэн, Д.Ганзориг, Д.Мөнхтуяа, Г.Цагаанцоож, Б.Цогт, Д.Цолмон, Х.Эрдэнэсувд нарын найман хүнийг Улсын Дээд шүүхийн шүүгчээр томилуулах саналаа УИХ-д танилцуулав. Нэр дэвшигчдийн танилцуулгатай холбогдуулан УИХ-ын гишүүн Д.Лүндээжанцан Шүүхийн ерөнхий зөвлөл нэр дэвшигчдийг шинэ хуулийн дагуу оруулж ирж байна уу, хуучин хуулиар уу. Хэрэв шинэ хуулийн дагуу бол бусад шүүгчдийг хэзээ томилох вэ гэдгийг асуухад Шүүхийн ерөнхий зөвлөлийн дарга Ц.Зориг “Дээд шүүхийн найман шүүгч хуучин хуулийн дагуу орж ирж байгаа. УИХ-аар баталсан шинэ хууль энэ сарын 15-аас хэрэгжинэ. Тиймээс хуулийн дагуу бусад шүүгчийг арваннэгдүгээр сарын 1-ний дотор сонгон шалгаруулж томилно” гэв. Гишүүн Д.Тэрбишдагва сүүлийн үед нэр дэвшигчдийг чуулганаар бөөндөж оруулж ирж томилсон болдог дутагдал давтагдаж байгааг шүүмжлээд цаашид шүүгчид нэр дэвшигчдийг нэг удаад гурваас илүүгүйг оруулж ирж байх нь зүйтэй юм. Тэгвэл нэр дэвшигчдээс асууж тодруулах боломж гарах байх гэсэн санаа хэллээ. Харин гишүүн З.Баянсэлэнгэ тодорхой хэргийн талаар нэр дэвшигчдээс асуулт асуусан нь хуулиар хориотой гэдгийг УИХ-ын дарга сануулсан юм. Шүүхийн ерөнхий зөвлөлийн даргын танилцуулгатай холбогдуулан гишүүн З.Баянсэлэнгэ, Д.Лүндээжанцан, Д.Тэрбишдагва, О.Баасанхүү, Д.Ганбат, Х.Тэмүүжин, Ц.Оюунбаатар нар үг хэлж, хууль, шударга ёсыг дээдэлж, хараат бусаар ёс зүйтэй ажиллахыг нэр дэвшигчдэд захилаа.
ЕРӨНХИЙЛӨГЧИЙН СОНГУУЛЬД 15,8 ТЭРБУМЫГ ЗАРЦУУЛНА
Ерөнхийлөгчийн сонгуулийг товлон зарлах тухай тогтоолын төслийг хэлэлцэв. Сонгуулийн ерөнхий хорооноос ирүүлсэн саналд Ерөнхийлөгчийн анхан шатны сонгуулийн санал хураалтыг 2013 оны зургадугаар сарын 26-нд явуулах, Монгол Улсын дипломат төлөөлөгчийн газар байрладаг гадаад улсад байгаа сонгуулийн эрх бүхий иргэдийн саналыг зургадугаар сарын 14, 15, 16-нд авахаар тусгажээ. Байнгын хорооны хуралдаан дээр гишүүн М.Энхболд 14-16-нд санал авах нь хугацааны хувьд арай эрт байгаа, саналыг эрт авснаар маргаан үүснэ гэсэн санал хэлж байсан юм.
Ерөнхийлөгчийн ээлжит сонгуулийг энэ сарын 22-ноос товлон зарлах, санал хураалтыг зургадугаар сарын 26-нд явуулах, Монгол Улсын дипломат төлөөлөгчийн газар байрладаг гадаад улсад байгаа сонгуулийн эрх бүхий иргэдийн саналыг зургадугаар сарын 14-16-нд авахаар ирүүлсэн Сонгуулийн ерөнхий хорооны саналыг гишүүд дэмжлээ.
Мөн Ерөнхийлөгчийн сонгуулийн зардлын хэмжээг батлав. Ерөнхийлөгчийн сонгуулийн зардлын хэмжээг 15.8 тэрбум төгрөг байхаар Сонгуулийн ерөнхий хорооноос санал ирүүлжээ. Гишүүн Р.Бурмаа Сонгуулийн ерөнхий хороо үндэслэлгүйгээр өсгөсөн зардал оруулж ирж байна, иймээс төсвийн төлөвлөлтөд аудит хийлгэх нь зүйтэй гэсэн байр суурьтай байгаагаа хэллээ. Гишүүн Ц.Нямдорж түүнтэй адил саналтай байгаагаа хэлэв. Ямар боловч энэ удаагийн Ерөнхийлөгчийн сонгуульд 15.8 тэрбум төгрөг зарцуулахаар болов. Тогтоол батлагдсантай холбогдуулан УИХ-ын дарга З.Энхболд сонгуулийн зардлын төлөвлөлт, явц, гүйцэтгэлд нь аудит хийлгэх нь зүйтэй гэдгийг Сонгуулийн ерөнхий хорооны удирдлагад анхаарууллаа.
СОНГИНОХАЙРХАНЫ СОНГУУЛЬ НЯМ ГАРИГТ БОЛНО
Мөн чуулганы нэгдсэн хуралдаанаар хэлэлцэж шийдвэрлэсэн асуудлын нэг нь “Дахин санал хураалтын зардал батлах тухай” тогтоолын төсөл байв.Сонгуулийн ерөнхий хорооноос УИХ-ын сонгуулийн 26 дугаар тойрогт явуулах дахин санал хураалтын зардлын хэмжээг 397.4 сая төгрөг байхаар санал ирүүлжээ. Уг зардлын саналыг Сонгуулийн ерөнхий хорооны 2013 оны төсөвт зардлаас санхүүжүүлэхийг байнгын хорооны хуралдаанаар гишүүдийн олонх нь дэмжсэн байна. Байнгын хорооны санал, дүгнэлттэй холбогдуулан үг хэлсэн гишүүн Р.Бурмаа хуулиараа сонгуулийн тойрог, хэсгийн хороодод ажиллаж байгаа хүмүүст цалин биш урамшуулал олгох ёстой, гэхдээ энэ зардлын хэмжээг их байна гэж үзэж буйгаа хэлсэн бол гишүүн Л.Эрдэнэчимэг, С.Эрдэнэ нар дахин санал хураалтын талаар иргэд мэдээлэл муутай байна, иймээс дахин санал хураалт явуулах өдөр, цаг, санал авах байруудын талаар иргэдэд мэдээлэл өгөх талаар анхаарах хэрэгтэйг онцлов. УИХ-ын сонгуулийн 26 дугаар тойрог буюу нийслэлийн Сонгинохайрхан дүүрэгт ирэх ням гаригт явуулах дахин санал хураалтын зардлын дээд хэмжээг 397.4 сая төгрөгөөр батлав.
