Н.МӨНХЖИН
Сирийн босогчид улс орны зүүн хэсэгт нефтийн хэд хэдэн цооногийг шатаажээ. Энэхүү хорлон сүйтгэх ажиллагааны улмаас тус улс өдөрт таван мянган баррель нефть, 52 мянган куб метр хийн алдагдалд орж байна хэмээн Нефтийн яамны албаны төлөөлөгчид мэдэгдэв. Төрийн мэдлийн SANA агентлагийн мэдээлж буйгаар, Дейр аль-Зур дахь нефтийн ордуудын ихэнх хэсэг нь босогчдын гарт байдаг бөгөөд босогчид тэдгээр орд, цооногийг хуваах, эзэмшихэд маргалдсаны улмаас цооногуудыг шатаасан бололтой. Сирийн нефтийн “Фурат” корпорацийн гал сөнөөгчид гурван цооног дахь галыг унтраах оролдлого хийсэн аж. Босогчид нийтдээ есөн цооногийг шатаасан хэмээн мэдээлж байна. Үүний дараа гал дахин зургаан цооногт шилжжээ.
Хоёр жилийн өмнө Ерөнхийлөгч Башар Асадын дэглэм иргэдийн жагсаалыг хүч хэрэглэн дарсны дараа Европын холбоо Сирийн эсрэг хориг арга хэмжээ авч нефтийн экспортыг бараг зогсоосон юм. Асадын засаг захиргаа нефтийн гол орд, цооногууд байдаг зүүн нутгийнхаа ихэнх хэсгийг босогчдод алдсаны дараа дотоодын түлш шатахууны хэрэгцээгээ хангах гэж оролдож байгаа ч төдийлөн амжилт олохгүй байна. Хэдийгээр Сири улс иргэний дайнтай байгаа ч зарим бүс нутагт нефтийн олборлолт үргэлжилсээр байгаа аж. Босогчид орон нутгийн эрх баригчидтай худалдаа наймааны хэлэлцээ хийж, Засгийн газрын хүчний хяналтад байдаг бүс нутаг руу нефть нийлүүлж байгаа ажээ.
