Б.ЗАЯА, С.ДЭЖИД
Хип хоп холбооны ерөнхийлөгч, “Дижитал” хамтлагийн дуучин Ш.Батбаяр буюу Бааварын талаар Гавьяат жүжигчин Т.Ариунаа, “Voice” группийн ахлагч С.Баттулга, гитарчин Д.Өлзий-Орших, хамтлагийн ахлагч Г.Эрдэнэбилэг, “Сүнс” хамтлагийн ахлагч Б.Лхагвасүрэн, реппер Gee нарын урлаг соёлын одууд өнгөрсөн баасан гаригт Үндэсний мэдээллийн төвд мэдээлэл хийлээ. Баавар энэ сарын 23-нд Цагдан хорих 461 дүгээр ангид саатуулагдаж байхдаа их хэмжээгээр түлэгдэж, хэвтэн эмчлүүлж байгаа билээ. Түүний гэмтлийн шалтгааныг олон нийт янз бүрээр тайлбарлах болсон. Ямартаа ч урлагийн хүн эрүүл мэндээрээ хохирсон явдалд мэргэжил нэгт нөхөд нь гүнээ харамсаж сэтгэлийн дэм өгөхийг зорьжээ. Тэд урлагийн ертөнцөд хийж бүтээснээр нь бус хар мэдээллээр дарж байгаа анд найзынхаа эрүүл мэндэд хамгийн ихээр санаа зовниж буйгаа илэрхийлж байв. Хурал зохион байгуулагчид Монголын дуу бичлэг бүтээгчдийн үндэсний төвийн удирдах зөвлөлийн гишүүд юм. Баавар ч тус зөвлөлд 2009 оноос хойш идэвхтэй ажиллаж байж. Тэрээр 1999 оноос Дижитал хамтлагийг байгуулж, 2001 оноос Монголын хип хоп холбооны тэргүүнээр ажиллаж эхэлсэн юм. Энэ хугацаанд хамтлаг дуучдын 60 гаруй цомог, 40 гаруй бие даасан тоглолтыг зохион байгуулжээ. Мэргэжил нэгт нөхөд нь ийнхүү ярьж байна.
Г.Эрдэнэбилэг:
БААВАРЫН 650 ХОНОГИЙН ХАРЫГ БИШ, 3000 ХОНОГИЙН ЦАГААНЫГ НЬ ХАР
/“Дижитал” хамтлагийн ахлагч/
-Баавар бол новш, Ерөнхийлөгч, УИХ-ынхан, хуулийнхан, сэтгүүлчид, урлагийнхан бүгд новш. Яагаад бид Монгол даяараа новш болчихов. Бидэнд биенээ хайрладаг чин сэтгэл яагаад алга болчихов.Тэгсэн хэрнээ Монгол Улсдаа бүгд хайртай гэдэг. Гэхдээ хаанаас хайрлахаа мэддэггүй. Байгаль дэлхийг хайрлах ёстой ч хамгийн түрүүнд Монгол хүнээ хайрлах ёстой. Бааварыг сүүлийн 10 жил юу хийснийг нь тооцож үзье. Тэр 3650 хоногийн 650-д нь тамхи татаж, бусадтай маргалдаж, зодолдож өнгөрөөсөн гэе. Харин үлдсэн 3000 хоногт нь дуу дуулж, шүлэг бичиж, бүжиглэж, хүүхдээ хүмүүжүүлж, ханиа халамжилж, ээждээ цайны сүү, талхыг нь дөхүүлж өгдөг байсан юм. Бид яагаад 650 хоногийн харыг нь харчихаад 3000 хоногийн цагааныг нь хардаггүй юм бэ. Тэр хүний хийсэн зүйлүүдийг нь олж харъя л гэж хэлмээр байна. Сэтгүүлч үзгээ бариад нийтлэл бичихдээ, шүүгч алхаа цохихдоо, хуулийнхан кнопоо дарахдаа тавхан минут өөрөө өөртэйгээ яриад үз. Зовох цагт нь бие биенийгээ түшдэг ард түмэн, элгэн садантай баймаар байна.
Б.Лхагвасүрэн: ХУУЛЬ ХЯНАЛТЫНХАН ҮНЭН ЗӨВӨӨР ШИЙДЭЭСЭЙ
/Монголын дуу бичлэг бүтээгчдийн үндэсний төвийн тэргүүн, “Сүнс” хамтлагийн ахлагч/
-Баавар оюуны өмч, уран бүтээлийн эрхийг хамгаалахаар хүчтэй тэмцдэг дайчин залуу. Манай төвд хоёр удаа улиран сонгогдож амжилттай ажиллаж байна. Хэлэлцэж байгаа асуудлыг хоёргүй сэтгэлээр шуурхай шийддэг, шулуун үгтэй аливаад сэтгэлээсээ ханддаг, ямар ч ажлаас зайлсхийдэггүй. Нийгмийн идэвхтэй уран бүтээлч. Түүний энэ эмгэнэлт ослыг хууль хяналтын байгууллагууд үнэн зөвөөр шийднэ гэдэгт итгэж байна.
Т.Ариунаа:
БААВАР СЭТГЭЛИЙН ТЭНХЭЭГЭЭР ЯЛЖ ЧАДНА
/Монголын дуу бичлэг бүтээгчдийн үндэсний төвийн удирдах зөвлөлийн гишүүн, Гавьяат жүжигчин/
-Баавар маань хүнд байх ёстой сайхан чанаруудыг төлөвшүүлсэн залуу. Тиймээс сэтгэлийн тэнхээгээр энэ бүгдийг ялж гарна гэдэгт итгэж байна. Бид өнөөдөр нэгнийхээ төлөө үнэн үгийг хэлж чаддаг байх ёстой. Нэгэндээ сэтгэлийн дэм өгөх нь дутагдаад байна. Хүн амьдралдаа өгсөж, уруудаж, зовж зүдэрдэг. Санаандгүй алдаж л байдаг. Тиймээс түүний алдааг харахаасаа илүү урлагийн ертөнцөд юу хийж бүтээснийг хармаар байна. Түүний ямар сайн зан чанартай уран бүтээлч болохыг хүн бүр мэддэггүй. Энэ нь олон нийт мэдээллийн өлсгөлөн эсвэл хэтэрхий их хов живэнд дуртай байдагтай холбоотой болов уу.
Л.Энхмандах: АМЬДДАА НЭГНЭЭ ХАЙРЛАЯ
/New star” студийн захирал/
-Урлагийнхны сэтгэл зовниж байгаа асуудал биш Монгол даяар түүний төлөө сэтгэл эмзэглэмээр үйл явдал боллоо. Амьддаа бие биенээ хайрлая гэсэн сайхан үг бий. Нэгнийгээ хайрлаж, урмын үгээр тэтгэж явах юмсан.
Gee:
НЭГНИЙГЭЭ ДЭМЖИХГҮЙ БОЛ МОНГОЛ ХҮН ГЭЭД ЯАХ ЮМ
/Реппер/
-Хүнд унах, босох, дэвэх, нисэх ч үе бий. Унасан үед нь нэгнийгээ дэмжихгүй бол Монгол гэж яваад яах юм. Дайсандаа ч хүнлэг сэтгэлээр ханддаг түүхтэй ард түмэн. Ийм хандлагыг залуучуудад уриалмаар байна. Нэгнийгээ хайрлах сэтгэл зөвхөн биднээс биш та бүхнээс эхлэх ёстой.
