Өөрөөс нь
Д.МЯГМАР
Барилгын олс, тасарч, лифт кран унаж ажилтан нь амиа алдлаа гэсэн мэдээллийг дуулсаар чихэнд дасал болж байна. Гэтэл одоо нийслэлийн өнгө үзэмжийг сайжруулахаар хотын мээрийн өгсөн үүргийн дагуу рекламны самбар буулгаж байсан залуу амиа алдсан харамсалтай хэрэг гарлаа. Хөдөлмөрийн аюулгүй ажиллагаа Монголын бүх салбарт алдагдсаныг сүүлийн үед гарч байгаа осол, хэргээс харж болно. Нийслэлд 274 аж ахуйн нэгж, иргэний 2180 самбар байгаагаас 921 нь авто замын хөдөлгөөнд саад учруулдаг тул буулгах шаардлагатай гэсэн. Самбарыг буулгаж байгаа хүмүүсийн эрүүл, аюулгүй нөхцөлд ажиллах боломжийг хангаагүйгээс хүний амь сүйдэж байна. Энэ талаар Нийслэлийн Захирагчийн ажлын албаны Тохижилт, хог, хаягдлын удирдлагын хэлтсийн дарга Т.Батбаяраас тодрууллаа.
-Нийслэлд байгаа зарим сурталчилгааны самбарыг буулгах шийдвэрийг хотын дарга гаргасан. Шинэ ажлыг хэрэгжүүлж эхэлтэл хөдөлмөрийн аюулгүй ажиллагаа алдагдаж хүний амь эрсэдлээ. Танайхаас заавар, зөвлөмж өгч байсан уу?
-Энэ ажлыг эртнээс ярьж өнгөрсөн арванхоёрдугаар сарын сүүлчээс эхлэн самбар эзэмшигчидтэй гурван ч удаа уулзалт хийсэн. Манайхаас энэ сарын 22-ны дотор хориглосон газарт буй самбаруудыг буулгахыг шаардаж тухайн аж ахуйн нэгж, иргэдэд мэдэгдэл хүргүүлсэн. Тухайн компаниуд заасан хугацаанд самбараа буулгахгүй бол ЗАА-наас албадан буулгуулна. Самбар буулгахдаа хөдөлмөрийн болон техникийн аюулгүй байдлыг бүрэн хангаж ажиллахыг манайхаас сануулж, сэрэмжүүлсэн. Мөн дээрх байдлыг хангаж чадаагүй бол түүнээс үүдэн гарах үр дагаврыг тухайн ажлыг гүйцэтгэгч болон самбар эзэмшигч бүрэн хариуцахыг сануулж гэрээндээ тусгасан. Самбар буулгах ажлыг зохион байгуулж, хяналт тавих ажлыг тухайн дүүрэгт нь хариуцуулсан.
-Самбаруудыг буулгах зардлыг хаанаас гаргаж байгаа юм бол?
-Энэ ажилд төсвөөс нэг ч төгрөг гаргаагүй. Тухайн компаниуд өөрийн зардлаараа самбарыг буулгах ёстой. Хэрэв заасан хугацаанд самбарыг буулгаагүй бол дүүргүүд ийм ажил хийдэг компаниудтай гэрээ хийж гүйцэтгүүлэх юм. Тэд ажлын зардлаа гаргаж манай хэлтэст өгнө. Бид буцаагаад самбар эзэмшигч компаниас тухайн ажлын зардлыг нь нэхэмжлэн гаргуулах юм.
-Самбар буулгаж байгаад 25 настай залуу амиа алдсан харамсалтай хэрэг гарсан. Үүний хариуцлагыг хэн хүлээх вэ?
-”Хас” банк өөрийн эзэмшлийн самбараа буулгахаар “Их харанга” компаниар ажил гүйцэтгүүлсэн юм билээ. Гэрээ байгуулж байх явцад ажлаа эхлүүлж хөдөлмөрийн аюулгүй байдал алдагдаж тийм харамсалтай хэрэг гарчээ. Тухайн хоёр компани хариуцлага хүлээх ёстой. Сануулсаар, хэлсээр байтал ийм хэрэг гарчихлаа. Бид Хас банкны тодорхой албан тушаалтантай ярилцаж хариуцлага хүлээх ёстойг нь сануулсан. Цаашдаа ч анхаарал болгоомжтой ажиллахыг санууллаа. 1000 орчим самбарыг буулгах ажил бий. Тиймээс энэ ажлыг хариуцан хийж байгаа байгууллага, аж ахуйн нэгж, иргэд, самбар эзэмшигч байгууллагуудад хөдөлмөр, техникийн аюулгүй байдлыг хангаж ажиллахыг дахин сануулмаар байна.
