Ө. СОНОР
Түүнийг хүмүүс “Коматцу”-гийн гэдгээр нь илүү мэддэг. Харин одоо бол Хүн амын хөгжил, нийгмийн хамгааллын дэд сайдын албан тушаалтай гэдгээр зарим нэг нь таних болсон байх. Дэд сайд Э.Тамирын намтар нь товчхондуу. Улаанбаатарын унаган тэрээр 10 жилийн боловсрол эзэмшсэнийхээ дараа нэг хэсэг Чехэд сурсан байна. Харин хожим, “Орхон” их сургууль болоод Удирдлагын академийг дүүргэжээ. Өөрийн мэргэжлээ тэрээр төрийн удирдлагын менежер, багш гэж яамныхаа албан ёсны цахим хуудсан дээрх намтартаа бичсэн байна. Э.Тамир дэд сайдаас гадна Нийслэлийн Иргэдийн төлөөлөгчдийн хурлын тэргүүлэгч, төлөөлөгч “Комит сервис” компанийн Ерөнхий захирал, Японы “Коматцу” корпорацийн Улаанбаатар дахь төлөөлөгчийн газрын ерөнхий менежер бас “Женко” компанийн салбарын дарга гээд л нэлээд хэдэн албан тушаалыг зэрэг хашдаг байна.
Түүнийг ер нь хүмүүс бизнесмэн л гэх юм билээ. Анх 1997 онд манай улсад нарны бүтэн хиртэлт ажиглагдах үеэр ирсэн япончуудтай танилцсанаар “Коматцу”-гийнх нь бизнес эхэлсэн гэж өөрөө ярьсан байдаг юм. Уул уурхайн хүнд машин, механизмын худалдаа, түрээс ирээдүйд ашигтай бизнес болох юм гэдгийг ажиглаж чадсанаараа тэрээр хожсон байх. Анх бүх ажлаа ганцаараа хийж байсан тэрээр одоо 150 ажилтантай компанийн эзэн болсон ажээ. Нөгөөтэйгүүр өөрийнх нь сонирхол дээрх салбарт амжилттай явахад нь түлхэц болсон байх. Багаасаа авто техникт сонирхолтой байсан учир автомашины уралдаануудад байнга оролцож спортын мастер цол хүртэж байжээ. Энэ тухайгаа “Авто спортоос авч үзээгүй шагнал надад байхгүй” гэж онгирсон байдаг юм.
2008 оноос хойш улс төр идэвхтэй хөөсөн тэрээр АН-ын гишүүн, “Нэг ардчилал” клубын санаачлагчдын нэг гэдгээрээ бахархдаг гэсэн. 2008-2012 онд Хан-Уул дүүргийн ИТХ, одоо нийслэлд төлөөлөгчөөр сууж байгаа. Дэд сайдын албан тушаалд очиход мэдээж АН-ын ялалт, “Нэг ардчилал” клубынхны түлхэц хэрэг болсон байх. АН –ын хэсэг залуусын байгуулсан “Нэг ардчилал”-аас Л.Гантөмөр нарын нэлээд хэд нь сайд, бусад нь дээгүүр албан тушаалд очсон байдаг юм.
“Таны туйлын зорилго юу вэ” гэж өнгөрсөн ИТХ-ын сонгуулийн өмнөх сурталчилгааны үеэр нэгэн сэтгүүлч асуужээ. Үүнд “Хүмүүсийг ажлын байртай, орлоготой болгох явдал. Биеэ засаад гэрээ зас. Гэрээ засаад төрөө зас” гэсэн Монгол ардын цэцэн үг байдаг. Би эцэг эх, багш сурган хүмүүжүүлэгч, ард түмнийхээ тусламжтайгаар, хөдөлмөрөөр биеэ зассан. Дараа нь бизнес эрхэлж санхүүгийн эрх чөлөөнд хүрэх замаар гэрээ заслаа. Одоо надад эх орон, ард түмнийхээ төлөө зүтгэх л үлдэж байна” хэмээн хариулсан байна. Хэдийгээр тухайн үед хүмүүсийг ажилтай болгох тухай ярьж байсан ч, ажилтай болгох бус халамжлах үүрэгтэй яаманд тэрээр удирдах албанд томилогдон ажиллаж байна. Та яагаад энэ яамны дэд сайд болов, ийм ажил мэдэх үү гэх шалгуурт Э.Тамир “Манай ажилчид чинь амьдралын болж, бүтэхгүй зүйлээ яриад л өргөдөл бариад ороод ирнэ шүү дээ. Тэгэхээр энэ ажлыг би хийж чадна”гэж хариу өгчээ.
Тэгэхээр Э.Тамир мөнгө олдог ажлаасаа шууд мөнгө зарцуулж иргэдийг халамжлах ажилд очсон болж таарч байна. Мэдээж халамжийн бодлого хэрэгжүүлэх, бизнес хийх хоёр огт өөр зүйл. Тэрээр хүүхдийн мөнгийг олгох үйл явцыг хөнгөлөх, хөгжлийн бэрхшээлтэй иргэдийн хөгжилд анхаарах гэх мэтээс ажлаа эхэлсэн гэж онцолсон байна лээ. Монгол Улсын нийт хүн амын халамж, хөгжил хэрэгтэй байгаад нь таарсан бодлого хэрэгжүүлнэ гэдэг зүгээр нэг, компани удирдахаас хамаагүй хэцүү ажил юм. Э.Тамир сайд С.Эрдэнэтэйгээ хамтран энэ ажлыг ямар дүнтэй гүйцэтгэх бол?
