Б.ЗАЯА
ШӨХТГ-аас “Миний дэлгүүр” сүлжээний гурван салбарыг хаажээ. Энэ талаар тус газрын хуулийн мэргэжилтэн С.Цогтгэрэлээс тодрууллаа.
-ШӨХТГ-аас “Миний дэлгүүр”-ийн салбаруудыг хаасан байна. Энэ талаар тодруулаач?
-Манайд сүлжээ дэлгүүрүүдийн талаар өргөдөл гомдол олон ирэх болсон. Тиймээс агентлагийн даргын удирдамжаар нийслэлд үйл ажиллагаа явуулж байгаа сүлжээ дэлгүүрүүдийг шалгасан юм. Шалгалтын дараа “Сонгинохангай” компанийн “Миний дэлгүүр” сүлжээний гурван салбарын үйл ажиллагааг түр зогсоолоо. Тодруулбал, Жуков, Дамбадаржаа, Од кино театрын ойролцоо байрлах 102, 105, 124 дүгээр салбар юм.
-Тухайн салбаруудад ямар зөрчил илэрсэн юм бэ. Хэд хоногийн хугацаатай хаав?
-Тухайлбал, 102 дугаар салбарын 20 нэр төрлийн 38 ширхэг бараа, бүтээгдэхүүнийг түүвэрчлэн шалгахад шошгод тавигдах шаардлага хангаагүй импортын шүүс, гүзээлзгэнэ, жимсний чанамал, хүүхдийн жигнэмэг, зөгийн бал, вандуй, шинжилгээний бичиг, улсын байцаагчийн дүгнэлт, гарал үүслийн бичиггүй бор элсэн чихэр, хатаасан халуун чинжүү байсан. Мөн хадгалах хугацаа дууссан үхэр, гахайн мах, битүүмжлэл алдагдсан алаг салад, ногооны холимог ассорти зэрэг бүтээгдэхүүнийг худалдаалж байсан. Хэрэглэгчдэд зориулсан хяналтын жингүй, баталгаажилтын хугацаа дууссан агуулахын байр зэрэг стандартын шаардлага хангаагүй нийтлэг зөрчил илэрсэн. Тиймээс өнөөдрөөс /өчигдөр/ долоо хоногийн хугацаатай түр хаалаа. Энэ хугацаанд гаргасан зөрчлүүдээ арилгаж манайд мэдэгдсэнээр үйл ажиллагаагаа хэвийн явуулах боломжтой.
-“Миний дэлгүүр” сүлжээнээс бусад сүлжээ дэлгүүрийг шалгасан гэсэн. Зөрчил илэрсэн үү?
-Шалгалтад “Сонгинохангай” компанийн “Миний дэлгүүр”, “Алтан жолоо” компанийн “Сансар”, “Номин” холдингийн “Номин” зэрэг сүлжээ дэлгүүрийг хамруулсан. Тус дэлгүүрүүдэд үйл ажиллагааг нь хаах хэмжээний зөрчил, дутагдал илрээгүй. Нийтлэг зөрчил илэрсэн учраас улсын байцаагчийн албан шаардлага өгч, хөдөлмөрийн хөлсний доод хэмжээг 40 дахин нэмэгдүүлсэнтэй тэнцэх хэмжээний мөнгөөр торголоо.
