М.ЦЭЦЭГ
Ажлаас халагдах өргөдлөө өчигдөр өгчихөөд өнөөдөр буцаая гэж гүйдэг туйлбаргүй хүмүүс хаа сайгүй бий. Ажлаас гарах, орох тухай жирийн ажилчид сэтгэл хөөрлөөр шийдчихдэг нь нэг хэрэг байх. Харин Ерөнхий сайд нэг өдөр хийсэн томилгоогоо дараагийн нэг өдөр хүчингүй болгодог хачин жишиг энэ төрийн үед бий болжээ. Тодруулбал, Ерөнхий сайд Н.Алтанхуяг зарим аймгийн Засаг даргыг ажлаас чөлөөлсөн, үүрэг гүйцэтгэгч томилсон, Тагнуулын дэд даргыг ажилд томилсон захирамжаа цуцалсан юм.
Засгийн газрын тэргүүний гаргасан захирамжийг хууль бус хэмээн үзэж Үндсэн хуулийн цэцэд хоёр удаа хандсан билээ. Хоёр дахийг нь өчигдөр Цэц хэлэлцэх байсан ч Ерөнхий сайд гаргасан захирамжаа хүчингүй болгожээ. Энэ тухай тодорхой өгүүлбэл, Үндсэн хуулийн цэц өчигдрийн дунд суудлын хуралдаанаараа Тагнуулын ерөнхий газрын дэд даргаар Б.Ариунсанг томилсон Ерөнхий сайд Н.Алтанхуягийн өнгөрсөн оны арваннэгдүгээр сарын 30-ны өдрийн 83 дугаар захирамж Үндсэн хуулийн холбогдох хэсгийг зөрчсөн эсэх тухай маргааныг иргэн Д.Ламжавын мэдээллээр хянан хэлэлцжээ.
Ерөнхий сайд хуралдаан болохоос нэг өдрийн өмнө буюу уржигдар Б.Ариунсанг Тагнуулын ерөнхий газрын дэд даргаар томилсон өмнөх захирамжаа хүчингүй болгосон байна. Иймд Үндсэн хуулийн цэц зөрчлийн шинж арилсан хэмээн үзэж маргаан хянан шийдвэрлэх ажиллагаагаа зогсоожээ. Ямар боловч Ерөнхий сайд зөрчлөө арилгаж төрийн албыг хохиролгүй болгожээ. Хэрэв Цэц дээрх асуудлыг хянан хэлэлцсэн бол Ерөнхий сайдыг Үндсэн хууль зөрчсөнийг тогтоох байлаа. Н.Алтанхуяг ч хууль зөрчсөн томилгоо хийснээ маш сайн мэдэж байгаа учир Цэцийн хурлаас өмнө өөрийнхөө гаргасан захирамжийг өөрөө хүчингүй болгочихдог сүйхээтэй нэгэн аж.
Тэрээр хууль зөрчсөн захирамжаа Цэцийн хуралдаан болохоос нэг өдрийн өмнө хүчингүй болгосон эхний үйлдлийг мөн сийрүүлье. Иргэн Ш.Раднаасэд, П.Ганзориг нар Н.Алтанхуягийн өнгөрсөн нэгдүгээр сарын 7-нд Д.Амарбаясгаланг Засаг даргын үүрэг гүйцэтгэгчээр түр томилох тухай 07 дугаар захирамж, Хөвсгөл аймгийн Засаг дарга Л.Цэрэнжавыг ажлаас чөлөөлсөн 08 дугаар захирамж Үндсэн хуулийн холбогдох заалтыг зөрчсөн тухай мэдээллийг Цэцэд өгсөн юм. Гэвч Ерөнхий сайд Үндсэн хуулийн цэцийн дунд суудлын хуралдаан болохоос нэг өдрийн өмнө дээрх захирамжуудаа хүчингүй болгосон захирамжийг Цэцэд өгчээ. Иймд Цэц Үндсэн хуулийн зөрчлийн шинж арилсан хэмээн үзэж маргаан хянан шийдвэрлэх ажиллагааг мөн л зогсоосон юм.
