Ч.ОЛДОХ
Шүүхийн шийдвэр гүйцэтгэх байгууллагын удирдах ажилтны зөвлөгөөн болж байна. Ямар асуудлууд хэлэлцэж буй талаар ШШГЕГ-ын Захиргаа удирдлагын газрын дарга, хурандаа Б.Сэр-Одоос тодрууллаа.
-Шүүхийн шийдвэр гүйцэтгэх байгууллагын удирдах ажилтны зөвлөгөөнөөр ямар асуудлууд хэлэлцэж байна?
-Засгийн газрын хэрэгжүүлэгч агентлаг ШШГЕГ-ын төв, орон нутгийн удирдах ажилтны зөвлөгөөн-сургалтыг энэ сарын 18-23-нд зохион байгуулахаар төлөвлөж хөтөлбөрийн дагуу эхлүүллээ. Зөвлөгөөнөөр Шүүхийн шийдвэр гүйцэтгэх байгууллагын 2013 онд дэвшүүлсэн зорилт, төлөвлөсөн арга хэмжээг хэрэгжүүлэн биелүүлэх талаар зохион байгуулсан ажил, түүний үр дүнг хэлэлцэж байна. Мөн энэ онд хууль зүйн салбарт дэвшүүлсэн бодлого, шинэчлэлийг хэрэгжүүлэх талаар төв, орон нутгийн удирдах ажилтнуудтай санал солилцон арга замаа тодорхойлж, үүрэг чиглэл өгч байгаагаараа ач холбогдолтой.
-Танай байгууллага энэ онд ямар зорилт дэвшүүлсэн бэ?
-ШШГЕГ-ын хэмжээнд 2013 оныг байгууллагын “Үндсэн чиг үүргийн хэрэгжилт, гүйцэтгэлийн хяналт шалгалтыг сайжруулах жил” болгон зарласан. Засгийн газрын үйл ажиллагааны мөрийн хөтөлбөр, эдийн засаг, нийгмийг 2013 онд хөгжүүлэх үндсэн чиглэл, мөн хууль зүйн салбарын шинэчлэлийн бодлогод шүүхийн шийдвэр гүйцэтгэх байгууллагын үндсэн чиг үүрэгт хамаарах асуудлаар тусгагдсан зорилтыг ихээхэн анхаарч байна. Түүнийг хэрэгжүүлэхэд чиглэсэн төлөвлөгөөг батлах, биелэлтийг хангуулах арга замаа тодорхойлоход энэ удаагийн зөвлөгөөн ач холбогдолтой гэж үзсэн.
-Хөдөө орон нутгийн байгууллагууд бүгд хамрагдсан уу?
-Төв, хөдөө орон нутгийн 48 салбар нэгж, төв, удирдах газраас нийт 70 хүний бүрэлдэхүүнтэй удирдах ажилтны зөвлөгөөн явуулж байна.
-Зөвлөгөөн хийж байгаа өдрүүд нэлээд онцлог цаг үед тохиож байх шиг байна?
-Зөвлөгөөний нээлт Монгол Улсад орчин цагийн зэвсэгт хүчний байгууллага үүсч хөгжсөний 92 жилийн ой, Монгол цэргийн баяр тохиосон. Мөн түүнчлэн энхийг дэмжих ажиллагаанд оролцох тухай хуулийн дагуу Шүүхийн шийдвэр гүйцэтгэх байгууллагын албан хаагчид Судан улсад энхийг сахиулах, сэргээн босгох үйлсэд оролцсон. Тэд үүргээ амжилттай гүйцэтгээд эх орондоо эргэж ирсэн баярт мөчтэй давхцаж байгаа юм. Мөн ШШГЕГ-ын удирдлагууд өөрчлөгдөөд таван сар болж байна. Энэ хугацаанд ШШГЕГ-ын хэмжээнд мөрдөгдөж буй тушаал, шийдвэр, хууль журам, мөн 2013 онд эрхзүйн шинэтгэлийг хэрхэн хэрэгжүүлэх талаар нэлээд бодитой ажил хийсэн. Зөвлөгөөнөөр төв, орон нутгийн удирдах ажилтнуудыг цуглуулж, тэдэнд үүрэг чиглэл өгч, удирдлагаар хангаж ажиллаж байгаа. Ажлын хэрэгжилт, тайланг танилцуулах ажил мөн энэ зөвлөгөөнтэй давхцаж байна.
-Сургалтад Сангийн яам хамтарсан гэсэн. Төсвийн талаар сургалт явуулах юм уу?
-Зөвлөгөөн таван өдөр болно. Эхний гурван өдөр нь Шүүхийн шийдвэр гүйцэтгэх байгууллагын төв, орон нутгийн ажилтнуудын мэдлэг, мэргэшлийн талаар сургалт явуулна. Сүүлийн өдрүүдэд 2013 онд хэрэгжүүлэх ажлын үндсэн чиглэл, төсвийн болон орон нутгийн өмчөөр бараа үйлчилгээ худалдан авах, төсвийн ил тод нээлттэй чиглэлээр сургалт семинарыг Сангийн яамтай хамтарч зохион байгуулах юм.
