Б.ЭНХ
БШУЯ-наас санаачлан орон даяар хэрэгжүүлж буй “Авьяас” хөтөлбөрийг Өвөрхангай аймгийн Баянгол сумын ахлах сургуулийнхан амжилттай хэрэгжүүлж байгаа аж. Хүүхэд бүрийн авьяасыг нээн илрүүлэх зорилготой хөтөлбөрийн хүрээнд тус сургуулийнхан таван төрлийн сонгон, дугуйлан хичээллүүлж эхэлжээ. Тухайлбал, гар бөмбөгийн дугуйланд 20 сурагч, шатрын дугуйланд 32, хөгжмийн дугуйланд 16 сурагч таван төрлийн хөгжимийн зэмсэгээр хичээллэж байгаа юм байна. Түүнчлэн хүүхэд багачуудын авьяасыг хөгжүүлж бүжгийн дугуйлан хичээллүүлж эхлүүлсэн бөгөөд одоогоор I-VII ангийн 32 сурагч хамрагджээ. Дизайн, хар зургийн дугуйланг сургуулийн технологийн багш Ц.Бадамсүрэнгээр ахлуулсан 45 сурагч хичээллэж байна. Баянгол сумын сургуулийн 160 орчим сурагч авьяас билгээ нээн хөгжүүлж байгаа нь нийт сурагчдын 31.7 хувийг эзэлсэн болохыг сургуулийн нийгмийн ажилтан Т.Нямдулам мэдээлэв. Түүнчлэн сургуулийн бүх сурагчдын дунд уран уншлагын наадам, яруу найргийн тэмцээнийг зохион байгуулжээ.
