Д.МЯГМАР
Дуутай, хууртай Дундговь нутгаас төрөн гарсан улстөрч эмэгтэйчүүдийн нэг нь Боловсрол, шинжлэх ухааны дэд сайд Бандихүүгийн Ургамалцэцэг юм. Ардчлсан намын нарийн бичгийн дарга энэ бүсгүйтэй 2011 оны хавар баруун таван аймгаар хамт явж “Монгол хүн -2020” хөтөлбөрийг танилцуулах үест тэр их л дуу, хууртай, эвсэг, инээд наргиатай, хоржоонтой яриатай чамбай бүсгүй шиг санагдаж билээ. Тэрээр хөдөө өсч, ном соёлын мөрөө Дундговь аймгаас эхэлсэн болоод ч тэгж санагдсан уу, энгийн, хээ шаагүй яриатай, эвгүй үйлдэлтэй нэгнийг дуудаад нүүрэн дээр нь хэлчихдэг. Үг даахын зэрэгцээ эршүүд маягийн эмэгтэй гэсэн төсөөлөл, зураглал сэтгэлд минь бат үлдсэн юм. Ийм л эмэгтэйг Ардчилсан намаас санал болгож Шинэчлэлийн Засгийн газар танхимдаа багтааж Монголын боловсрол, шинжлэх ухааны салбарын жолоог атгуулсан байна.
Б.Ургамалцэцэг 1988 онд Дундговийн найман жилийн дунд сургууль, 1990 онд аймгийн 10 жилийн нэгдүгээр сургууль дүүргэж, Улсын Багшийн их сургуульд элсэж дөрвөн жилийн дараа Сурган, сэтгэл судлалын багш мэргэжлээр төгсчээ. Яг нарийндаа бол, Б.Ургамалцэцэг хүмүүсийн сэтгэлийг судалдаг ажилтай болсон хэрэг л дээ. Хүн хоорондын харилцаан дээр голдуу явуулдаг энэ ажил, мэргэжил түүнийг албан тушаал өгсөх замд ихээхэн дэм болсон нь гарцаагүй.
Тэрээр 1997-2000 онд УИХ-ын гишүүний туслахаар ажиллахын зэрэгцээ Удирдлагын академийг Төрийн удирдлагын менежерээр дүүргэж ажиллах, суралцахыг хослуулжээ. 2000-2001 онд УИХ-ын Тамгын газарт мэргэжилтнээр ажилласан байна. Тэр Монголын шилдэг залуусын нэг болох гэж олон шат алгасч, амьдрал руу эрчээрээ тэмүүлсэн нэгэн ургамал юм. Үүнийг нь батлах шиг Монголын залуучуудын холбооноос “Тэргүүний залуу” алтан медалиар энгэрийг нь мялаасан нь саяхан мэт.
Хөдөөний хүүхэд хотод их сургууль төгсвөл эрдмийн оргилд хүрлээ гэсэн монголчуудын мөчид бодлыг тэрээр таягдаж 2004 онд АНУ-ын Коннектикут мужийн Брижпортын их сургуульд Боловсролын шинжлэх ухааны магистрийн зэрэг хамгаалж сурсан мэдсэнээ улам бататгажээ.
Дээд боловсролтой зарим хүний сул тал нь гадаад хэлний асуудал байдаг. Б.Ургамалцэцэг энэ асуудлаа цэглэж англи, орос хэлтэй, хос морьтой болж нэр шигээ ургаж, цэцэглэж явна. Тухайлбал, 2006-2007 онд АНУ-ын Пентагоны “Хүүхэд хөгжил “-ийн төвд ахлах багш, Дэлхийн банкны “Жижиг, дунд үйлдвэрлэлийг хөгжүүлэх” төслийн зохицуулагч зэрэг салбар бүрт л ажиллаж өөрийн сурсан, мэдсэнээ туршиж, сорих болжээ. Өөрийнхөө төлөө хийсэн тэмцэл, хөгжлийн шат бүхэн нь АН-ын лухгаруудад таалагдсан биз. Ямартай ч Б.Ургамалцэцэг 2008 оны арванхоёрдугаар сарын 10-наас эхлэн Ардчилсан намын нарийн бичгийн даргаар ажиллахаар сонгогдож улс төр хэмээх их айлын хаалгаар бүр мөсөн орчихлоо. Тэр одоо төрийн жолоо атгалцах хэмжээнд хүрч улс төр дэх эмэгтэйчүүдийн эгнээнд багтаж, Ардчилсан намын элдэв ургамал, цэцгийг арчилж, тордсоор л. Үүний зэрэгцээ Ардчилсан намын Гүйцэтгэх зөвлөлийн гишүүн, Үндэсний Зөвлөлдөх хорооны гишүүн, АЭХ-ны гүйцэтгэх зөвлөлийн гишүүн зэргээр түүний хаших алба их аж.
Дэд сайд бүсгүй өдгөө говь нутгийн зүг гүйдэлтэй адуу шиг л “давхина”. Бие нь яаманд сэтгэл нь нутагтаа гэдэг шиг л. Амралтын өдөр тэрээр Мандалговийн цэцэрлэг, сургуулиар орж, хүүхдийн сурах орчин нөхцөл, сургалтын стандарт, багшлах боловсон хүчин хэр байгааг нүдээр үзэн, элдвийг шалгааж асуудал шийдүүлэхээр бичиг, цаас эрээчинэ. Өндөр боловсрол эзэмшсэн хүн хөгжлийг зөвхөн өөртөө хадгалдаггүй бололтой. Боловсрол, соёлын үрийг монгол нутагт тарих ёстой хэмээн Б.Ургамалцэцэг шийджээ.
