Б.ЭНХЗАЯА
Нисэхээс хотын төв рүү чиглэсэн олон улсын стандартад нийцсэн нэгдүгээр зэрэглэлийн зам буюу Яармагийн гүүр-Нисэх-Нисэхийн товчоо, Сонсголонгийн уулзвараас Яармагийн товчоо хүртэлх 13.7 км замыг шинэчлэх ажлыг өнгөрсөн оны тавдугаар сард эхлүүлсэн. Жил дамнасан уг ажил ирэх сарын 15-нд эхлэх гэж байна. Энэ зам нь Богд уулын ар хормойгоор тавих замтай холбогдох бөгөөд хотын баруун, зүүн талыг холбож нийслэлийн замын хөдөлгөөний ачааллыг бууруулах ач холбогдолтой гэдгийг албаныхан онцолдог.
Хятадын “HKB”, Монголын зам, барилгын “Лу тун” компани хамтран 28 тэрбум төгрөгийн хөрөнгөөр уг ажлыг гүйцэтгэж буй юм. Яармагийн гүүрнээс Нисэхийн буудал хүртэлх долоон метрийн өргөнтэй хуучин замыг 1961 онд барьж, 1968 онд хатуу хучилттай болгосноос хойш засвар хийгээгүй байна. Харин одоо тусгаарлах зурвас бүхий хоёр зорчих хэсэгтэй, зургаан эгнээтэй, нийт 28-46 метр өргөнтэй болгож өөрчлөх юм. Шинэ замын насжилт нь 15 жил гэнэ. Өнгөрсөн онд гүйцэтгэгч компаниуд газар шорооны ажил хийсэн бөгөөд нийт ажлын 30 орчим хувийг нугалсан болохыг албаныхан мэдээлэв. Энэ ажлыг ирэх аравдугаар сарын 15-нд дуусгах төлөвлөгөөтэй аж. Товлосон хугацаандаа дуусах эсэхийг Нийслэлийн авто замын газрын Зам барилгын хяналтын хэлтсийн мэргэжилтэн М.Ганбаатараас тодруулахад “Гүйцэтгэгч компанийн тоног төхөөрөмж, машин механизмыг харахад хугацаандаа хийх боломжтой. Өөрөөр хэлбэл, өнгөрсөн жилийн ажилласан байдал, график төлөвлөгөө нь тооцоолсноор гүйцэтгэчих байх” гэв. Гэвч зорчих хэсгийн замын зурваст орсон гурван шатахуун түгээх станцыг чөлөөлөх ажлыг шийдвэрлэж чадахгүй байгаа аж. “Тэс петролиум”, “Петровис”, “Жаст ойл” гэсэн нэр бүхий станцууд газраа чөлөөлөхийн тулд их хэмжээний нөхөн төлбөр шаардаж байгаа гэлээ.
Гүйцэтгэгч компаниудын төлөвлөснөөр ирэх сарын 1 гэхэд бэлтгэл ажлаа хангаж, 15-наас барилгын ажилдаа орох гэнэ.
