Венесуэлийн сөрөг хүч­нийхэн Каракас хотын төвд жагсаал хийж, Ерөнхийлөгч У.Чавесийн биеийн байд­лын талаар үнэн бодит мэдээллийг дэлгэж, тэр ч бүү хэл түүнийг амьд бол олны өмнө харуулахыг Засгийн газраасаа шаард­жээ. Олон мянган хүн “Үнэнийг хэл”, “Худал хэлэхээ боль” гэсэн лоо­зон барин жагссан байна.

Венесуэлийн Засгийн газрын албан ёсны мэ­дээллийн дагуу бол У.Чавес хорт хавдар авах мэс заслын дараагаар Каракасын цэргийн эмнэ­лэгт сүүлийн хоёр долоо хоногийн турш нөхөн сэр­гээлтийн эмчилгээ хийл­гэж байгаа ажээ. Хэдий­гээр У.Чавесийн эмчилгээ зарим хүндрэлтэй тулгар­сан ч биеийн байдал нь зугуухан сайжирч байгаа гэнэ. Албан ёсны мэдээ­лэлд У.Чавесийг эмнэлэгт төрийн албаа үргэлж­лүүлэн гүйцэтгэж байгааг дурджээ.

Гэвч өнгөрсөн ар­ван­хоёрдугаар сард хагал­гаанд орсноос хойш тэ­рээр олны өмнө нэг ч удаа гараагүй юм. Түүнийг те­ле­­визээр ч харуулахгүй бай­­­гаа аж. Хагалгааны да­раа хоёр охиныхоо хамт ава­хуулсан түүний зургийг нэг л удаа өнгөрсөн сарын дун­дуур хэвлэлд ний­тэл­жээ.

У.Чавесийн эрүүл мэн­­дийн байдлын талаар албан ёсны мэдээлэл хангалтгүй цацагдах болс­ны улмаас Венесуэлд түү­нийг нас барсан тухай яриа хурдан тархах бол­жээ. Панамын нэгэн нэр­тэй дипломатч У.Чавесийг нас барсан тухай баримт олсноо хоёрдугаар сарын 27-нд мэдэгдсэн нь дайран дээр давс нэмжээ. Түүний энэ мэдэгдлийг Вене­суэлийн Гадаад хэргийн яам эрс няцаасан ч Каракаст олон түмэнд гу­дамжинд гарч жагсахыг зогсоож чадаагүй юм.

Өнгөрсөн оны аравду­гаар сард Ерөнхийлөгчийн сонглуульд ялалт байгуул­сан У.Чавес өвчний ул­маас нэгдүгээр сард тан­гараг өргөх ёслолоо гүй­цэтгэж чадаагүй юм. Үүнээс үүдэн Венесуэ­лийн сөрөг хүчин тус ул­сын Үндсэн хуулийн заалтын дагуу сонгуулийг дахин явуулахыг шаардах болжээ. Гэвч Венесуэлийн Дээд шүүх У.Чавесийг шаардлагатай эмчилгээг бүрэн дуусгасны дараа тан­гараг өргөх бүрэн бо­ломжтой гэж үзсэн байна.

Ямартаа ч У.Чавес ойрын үед ард олныхоо өмнө гарч, амьд мэнд гэд­гээ харуулахгүй бол газ­рын тосоор баян тус улсад улс төрийн зөрчил хурцдах төлөвтэй.