Данийн Вант улсын парламентын тэргүүн Могенс Ликкетофт зарим төлөөлөгчдийн хамт манай улсад айлчилж байна. Тэрээр 16 жилийн өмнө ирж байсан бол энэ удаа  хоёр орны хооронд дип­ломат харилцаа тогтоосны 45 жилийн ойн хүрээнд энэхүү албан ёсны айлч­лалыг хийж яваа аж. Түү­нийг өчигдөр УИХ-ын дарга З.Энхболд хүлээн авч уулзсан юм.  Тэд уул­залтын дараа сэт­гүүлч­дэд дараах мэдээллийг өгөв. З.Энхболд “Данийн парламентын даргыг да­галдан яваа төлөөлөгчдийн бүрэлдэхүүнд тус улсын парламентын тэр­гүүлэгчид ма­най оронд хүрэлцэн ирсэн явдал нь Данийн тал уг айлчлалд анхаарал хан­дуулж, өндөр ач холбогдол өгч буйн илрэл. Монгол, Дани улсын харилцаа, хамтын ажиллагааны асууд­луудыг хөндөөд зог­сохгүй, олон улсын зарим асуудалд анхаарал хандууллаа. Уулзалтын явцад хоёр тал эрчим хүч, соёл, боловсрол, ялангуяа хөдөө аж ахуйн салбарт хамтран ажиллахыг чухал­чилсан. Энэхүү айлчлал хоёр улсын парламент хоорондын харилцаанд мөн чухал нөлөөтэй” хэ­мээн онцлон тэмдэглэж байв. Харин Данийн Вант улсын парламентын дар­га, эрхэмсэг ноён Могенс Ликкетофт УИХ-ын дарга З.Энхболдод хандаж, эх орондоо халуун дотноор хүлээн авч буйд талархал илэрхийлэхийн ялдамд бидний харилцан, хамтын ажиллагааны цаашдын хөгжлийн суурь бат бөх тавигдсаныг хэлэхэд таатай байна гэсэн юм. Ноён Могенс Ликкетофт, Дани болон Монгол Улсын хооронд олон жилийн найр­саг уламжлалт ха­рилцаа бий гэдгийг тэм­дэг­лэхийн сацуу нийгэм, эдийн засгийн салбарын хүрээнд түүний дотор хоёр тал хөдөө аж ахуйн сал­барт хамтрах асуудалд санал нэг байгааг онцолж байлаа. Түүнчлэн пар­ламент хоорондын, Зас­гийн газар, цаашилбал хүмүүс хоорондын гэхч­лэн найрамдалт харилцаа холбоо олон жи­лийн туршид үргэлжлэн хөгжиж байдагт сэтгэл хангалуун буйгаа ноён Могенс Ликкетофт илэрхийлсэн. Олон улсын хамтын үйл ажиллагаанд Монгол Улсын оруулж буй хувь нэмэр, түүний дотор энхийг сахиулах үйл явцад гүйцэтгэж байгаа үүрэг, хариуцлагад Данийн Вант улсын зүгээс талархалтай хандаж, энэхүү хүчин чар­майлтыг үнэлж байдаг гэдгийг ноён Могенс Лик­кетофт тэмдэглэсэн юм. Ноён Могенс Лик­кетофтын айлчлал мар­гааш дуусах бөгөөд өнөөдөр  Өмнөговь аймагт ажиллах  мэдээ байна.