М.ЦЭЦЭГ
УИХ-ын дарга З.Энхболдын урилгаар Данийн Вант улсын Фолькетинг /Парламент/-ийн дарга Могенс Ликкетофт манай улсад албан ёсны айлчлал хийхээр өнгөрсөн бямба гаригт ирлээ. Зочныг дагалдан Данийн парламентын нэгдүгээр дэд дарга, ноён Бертел Хаардер, хоёрдугаар дэд дарга, хатагтай Пиа Кжэрсгаард, гуравдугаар дэд дарга, хатагтай Камилла Херсом, дөрөвдүгээр дэд дарга, хатагтай Анне Бааструп нар гэр бүлийн хамт, парламентын Ерөнхий нарийн бичгийн дарга, ноён Гарстен У.Ларсен нар айлчилж байна. Данийн вант улсын парламентын удирдлагуудыг “Чингис хаан” олон улсын нисэх буудалд УИХ-ын гишүүн, УИХ дахь Монгол-Данийн парламентын бүлгийн дэд дарга Р.Бурмаа, УИХ-ын Тамгын газрын Ерөнхий нарийн бичгийн дарга Б.Болдбаатар, УИХ-ын Тамгын газрын Гадаад харилцаа, хамтын ажиллагааны хэлтсийн дарга Ц.Нарантунгалаг болон албаны бусад хүн угтан авсан юм.
Айлчлалын хүрээнд ноён Могенс Ликкетофтыг УИХ-ын дарга З.Энхболд хүлээн авч уулзаж, Гадаад харилцаа, Уул уурхайн сайд нар бараалхана. Мөн хоёр орны парламентын тэргүүн айлчлалын талаар сэтгүүлчдэд мэдээлэл хийх юм байна. Хүндэт зочин айлчлалынхаа хүрээнд Ерөнхийлөгч Ц.Элбэгдоржид бараалхахын зэрэгцээ Данийн Вант улсын Засгийн газрын шугамаар хэрэгжиж байгаа төслийн үйл ажиллагаатай танилцаж, Монгол-Данийн нийгэмлэгийн гишүүдтэй уулзах юм.
Дани улсын парламентыг Фолькетинг гэж нэрлэдэг бөгөөд тус улсын хууль тогтоох дээд байгууллага юм. 1849 онд Данийн шинэ Үндсэн хуулиар байгуулагдсан Фолькетинг нь анх хоёр танхимтай байсан бөгөөд 1953 оны Үндсэн хуулийн өөрчлөлтөөр нэг танхимтай болсон байна. Фолкетинг нь нийт 179 гишүүнтэй. Гишүүдийг дөрвөн жил тутам болдог нийтийн сонгуулиар ард түмэн шууд сонгодог. Эдгээрээс 175 гишүүн нь Даниас, хоёр гишүүн Фаро арал, хоёр гишүүн нь Гринландаас сонгогддог байна. Фаро арал болон Гринландын бүс нутаг нь тус улсын өөртөө засах бүрэн эрхтэй засаг захиргааны нэгж аж. Фолькетингийн даргыг сонгуулиар байгуулагдсан парламентын анхны хуралдаанаар сонгодог байна. Шинээр байгуулагдаж байгаа парламентын даргыг сонгохдоо дөрвөн дэд даргын хамт сонгодог бөгөөд эдгээр нь парламентын дээд удирдлага болох Фолькетингийн тэргүүлэгчдийг бүрдүүлдэг байна. УИХ, Данийн Вант улсын Фолькетингийн хоорондын хамтын ажиллагаа өндөр төвшний харилцан айлчлал болон хоёр парламентын Тамгын газруудын хүрээнд амжилттай хөгжиж байгаа аж.
