Д.МЯГМАР 
Нийслэлд тулгамдсан асуудлын нэг нь хог. Гэхдээ үүнийг шийдэхээсээ илүүтэйгээр ярих нь их байдаг гэхэд нэг их хэтрүүлсэн болохгүй биз.Тиймээс хэдхэн хоногийн өмнө Тохижилт үйлчилгээний компани /ТҮК/-иудыг тухайн дүүрэгт нь хариуцуулан өгч эзэнтэй болгосон нь үр өгөөжөө өгч эхлэх гэж байгаа бололтой. Баянгол дүүргийн Засаг дарга Д.Оросоотой ярилцлаа.
-Нийслэлийн хаана ч хогтой байна. Танай дүүрэг санаачилгатай ажиллаж ирэх амралтын өдөр гурван цагийн цэвэрлэгээ хийхээр болсон юм уу?
-Бид аливаа асуудлыг иргэдийн оролцоотой шийдэх үүднээс дүүргийн ИТХ-аас энэ оныг “Нийгмийн хариуцлагын жил” болгон зарласан. Сая хуралдсан дүүргийн ИТХ-аас “Баянгол-Шинэ-Өргөө” гэсэн аж ахуйн тооцоот орон нутгийн өмчит компанийг байгуулсан.
Хуучин бол 10 жил нэг компани энэ бүхнийг дангаараа чанартай, чанаргүй ямар нэг хэмжээгээр гэрээний дагуу хийж ирлээ. Тийм учраас дүүргийн ИТХ-аас албан ёсны журам гарч ирэх сарын 1-нээс хог тээвэрлэлтийн асуудлыг сонгон шалгаруулах журам баталсан. Энэ дагуу бид тодорхой хэсгүүд дээр сонгон шалгаруулалт зарлаад хувийн аж ахуйн нэгжүүдийн дүнд Баянгол дүүргийн хог цэвэрлэх ажлын сонгон шалгаруулалт зарлаж, тээвэрлэх эрхийг албан ёсоор өгнө.
Нэгэнт нийтийн үйлчилгээ учраас өөрийн бүтцээрээ хог цэвэрлэгээний жилд гардаж оролцох шаардлага байна. Тиймээс бид орон нутгийн өмчит аж ахуйн тооцоотой компани байгуулсан юм.Гэхдээ зөвхөн дүүрэг ч юм уу нэг компани ч юм уу, хог цэвэрлэхээс илүүтэйгээр цэвэр сайхан орчинд амьдрахын тулд иргэдийнхээ оролцоог нэмэгдүүлж орчноо бүрдүүлье.Тиймээс долоо хоног бүрийн бямба гаригийн 11.00-14.00 цагийг нийтийн цэвэрлэгээнд зориулна. Гуравхан цаг өөрийн цэвэрлэж байгаа юм шиг л дүүргийнхээ нутаг дэвсгэрийг цэмцгэр байлгахад зориулна гэсэн үг.
-Бямба гариг бүр цэвэрлэгээтэй юм байна. Гэтэл иргэд цэвэрлэгээнд тэр бүр оролцохгүй бол яах вэ?
-Энэ бол нэг талаасаа сайн дурын санаачилгын ажил ч гэлээ Монгол Улсын иргэн бүр тэр дундаа оршин суугч айл өрх бүр Хог хаягдлын тухай хууль, Ариун цэврийн тухай хууль, тогтоомжоор хүлээх хариуцлага гэж бий. Бид цэвэрлэгээ нийтийн арга хэмжээгээ зохион байгуулаад явна. Энэхүү арга хэмжээнд оролцохгүй, тэгсэн хэрнээ хог хаяад байгаа аж ахуйн нэгж байгууллагад уриалга хүргүүлнэ. Дээр хэлсэн хуулиудыг зөрчсөн байвал дараагийн шатны арга хэмжээг авна. Эхний ээлжинд бид санаачилж, уриалж, хамтарч ажиллахыг л хүсч байгаа. Тав, зургаан сар болоод ирэхээр иргэд өөрсдөө гудамж, талбайгаа цэвэрлээд энэ ажил тогтмолжих байх.
-Танай дүүрэг хог ихтэй. Түүнийгээ ч бараг цэвэрлэдэггүй. Одоо хог хаягдлаа хэрхэн, яаж тээвэрлэх вэ?
-Баянгол-Шинэ-Өргөө” компани бидэнтэй холбоотой ажиллах юм. Энэ бол иргэд, айл өрхүүдийн дунд явуулж байгаа арга хэмжээ. Аж ахуйн нэгж, байгууллагын ойр орчмын 50 метр газрыг өөрсдийнх нь эзэмшилд оруулаад цэвэрлэгээ, үйлчилгээгээ хийж байх тогтоолтой. Энэ тогтоолын дагуу бид ажлыг зохион байгуулна.
-Танай ТҮК-ийн техник хэрэгсэл нь хэр хангалттай байгаа вэ?
-Манай дүүргийн хувьд техник хэрэгсэл нь хангалттай. Хогны 23 машин бий. Нэг хороонд нэг машин байна. Цаашид тоог нь нэмнэ.
