Ч.ОЛДОХ
Улстөрийн хүрээнийхэн МАХН руу чих тавьж байна. Уг нь тус нам хаалга үүдээ барилгүй нээлттэй хуралдаж, Бага чуулганаар хэлэлцэх асуудлаа хэдэн сарын өмнөөс зарлаж, хуралдах үеэрээ ч ил тод мэдэгдэж байсан. Гэсэн ч хөшигний цаана юу хэлэлцсэн бол, МАН-ынхантай нэгдэх үү, Ерөнхийлөгчийн сонгуульд хэнийг нэр дэвшүүлэх вэ гэсэн асуулт, хардлага, таамгууд хөвөрсөөр байна. МАХН-ын удирдлагууд, нарийн бичгийн дарга нар хэвлэлээр байр сууриа илэрхийлж байсан ч сэтгүүлчид л болсон хойно ямар нэгэн мэдээллийг нууж байна гэж үзэж, тэгж ч бичиж байгаа юм. Энэ байдлыг тус намынхан ойлгосон уу, эсвэл тус намын хэвлэл, мэдээлэлтэй харилцах алба мэдрэмжтэй хандсан уу, ерөөс мэдээлэл хийх асуудал нь тэгж таарсан уу өчигдөр хэвлэлийн хурал хийж хэд хэдэн асуудлаар мэдээлэл өгч, сэтгүүлчдийн асуултад хариуллаа.
Олон нийтийн сонирхлыг ихээхэн татаж буй хоёр нам нэгдэх үү. Танай намын дарга Н.Энхбаяр МАН-тай бус АН-тай хамтрах чиглэл өгсөн нь үнэн үү гэсэн асуултад тус намын дэд дарга, Шадар сайд Д.Тэрбишдагва “Манай нам аль ч улс төрийн хүчинтэй хамтарч ажиллах асуудал нээлттэй. Энэ бол ганц МАН ч биш бусад намтай хамтарч ажиллах боломжтой гэсэн үг” гэв.
Ирэх Ерөнхийлөгчийн сонгуулийн тухай МАХН-ыг тойрсон олон асуулт гараад байгаа. Эхнийх нь шинэчлэлийн Засгийн газарт орсон гэрээнийхээ дагуу АН, ИЗНН, “Шударга ёс” эвсэл хамтарч сонгуульд оролцох уу, эсвэл тус тусдаа нэр дэвшүүлэх үү гэдэг асуулт. Үүнд МАХН-ын Ерөнхий нарийн бичгийн дарга Г.Шийлэгдамба “Манай нам ярьсан, хэлсэндээ байхыг эрхэмлэдэг. “Шударга ёс” эвслийн байр суурь чухал. Анх эвсэл байгуулахдаа ярьж хэлсэн зүйлүүдээ дагаж мөрдөнө” гэв. Мөн орон нутгийн сонгуульд оролцохдоо Засгийн газар байгуулсан гэрээгээ дагах уу гэхэд олонхийг бүрдүүлж буй АН хуулиа баримтална гэсэнд нь хүндэтгэлтэй хандсан гэдгээ онцлов. Үүнээс үзэхэд, МАХН Ерөнхийлөгчийн сонгуульд нэр дэвшүүлэх асуудлаар дотооддоо яриад зогсохгүй эвсэлд нэгдсэн МҮАН-тай, мөн Засгийн газарт хамтарсан ИЗНН, АН-тай хэлэлцэх бололтой.
Аливаа улс төрийн хүчин, нам, эвслийн хувьд Их хурал, Бага чуулганаараа Ерөнхийлөгчид нэр дэвшүүлэх хүмүүсийн тухай зайлшгүй хэлэлцдэг. Энэ удаагийн Бага чуулганаар ч боловсон хүчний асуудал ярьж, түүний зэрэгцээ нэр дэвших боломж бүхий хүмүүс хэн байгаа талаар байр сууриа тодруулжээ. Гэхдээ энэ нь боломжтой гэж үзсэн хувилбар болохоос юу юугүй нэр дэвшүүлж байгаа юм биш гэдгийг тэд хэлж байна. МАХН-ын нийт гишүүдийн саналаар дөрвөн хүнийг Ерөнхийлөгчид нэр дэвшүүлэх боломжтой гэсэн байна. Тухайлбал, МАХН-ын дэд дарга, Шадар сайд Д.Тэрбишдагва, Эрүүл мэндийн сайд Н.Удвал, УИХ-ын дэд дарга Л.Цог, Сангийн сайд Ч.Улаан нарыг нэрлэжээ.
Сүүлийн үед дуулдаж байсан намын бүтцэд өөрчлөлт оруулах, эсэх асуудлыг Бага чуулганаараа хэлэлцэж шийдсэн байна. Бүтцийн энэхүү өөрчлөлтөөр МАХН-ын нийслэл хариуцсан нарийн бичгийн даргаар Г.Бямбасүрэнг, орон нутаг хариуцсан нарийн бичгийн даргаар Н.Ангараг, намын даргын ажлын алба хариуцсан нарийн бичгийн даргаар Ш.Нанжидыг, намын сан, хөрөнгө хариуцсан нарийн бичгийн даргаар П.Хангал, гадаад харилцаа, сургалт судалгаа хариуцсан нарийн бичгийн даргаар У.Барсболд, төрийн бус байгууллага хариуцсан нарийн бичгийн даргаар О.Лхагвацэдэнг, хэвлэл, мэдээлэл хариуцсан нарийн бичгийн даргаар Ч.Чимидсүрэн нарыг тус тус сонгосон байна.
