Ч.ЗОТОЛ
Татвараас зайлсхийсэн иргэн, аж ахуйн нэгжийн жагсаалтын эхэнд “Энэрэл интернэшнл” ХХК нь 10 тэрбумын төсөвт өртөгтэй Flowers town хотхоныг захиалгаар бариулсан. 2009, 2010 онд татварын тайлангаа ирүүлээгүй” гэх мэдээлэл гараад буй билээ. Зарим эх сурвалжийн мэдээллээр татвараас бултсан компани УИХ-ын гишүүн асан, өдгөө УИХ-ын даргын зөвлөх Д.Одхүүгийн эхнэр н.Номингэрэлийнх хэмээж буй.
Зайсангийн “Оргил” рашаан сувилал орчмын өндөр зэрэглэл бүхий газрыг тэр чигээр нь орон сууцны хороолол болгож ашиг олчихоод татвараас бултсан, зайлсхийсэн гэх мэдэгдэл иймэрхүү мэдээллийг араасаа дагуулав. Мэдээллийн мөрөөр хэд хэдэн эх сурвалжтай холбогдлоо.
УИХ-ын даргын зөвлөх Д.Одхүүтэй утсаар холбогдоход “Буруу мэдээлэл яваад байх шиг байна. Тэр асуудал надтай ямар ч хамаагүй. Тэгээд ч тухайн компаниуд татвараас зайлсхийсэн зүйл байхгүй юм билээ. Намайг ТӨХ-нд ажиллаж байхад миний удирдлагад ажиллаж байсан хуурай дүү нарын компани байгаа юм. Тэд татварт 500 гаруй сая төгрөг төлсөн байдаг юм билээ. Харин Татварын ерөнхий газар буруу мэдээлэл гаргасан. Тэд удахгүй уучлал хүсэх байх” гэв.
Ингээд “Энэрэл интернэшнл” компанийн захиалгаар орон сууцны хотхоныг барьсан “White phoenix ltd” компанийн менежер Д.Эрдэнийн 9911.... дугаарт холбогдлоо. Тэрээр хэвлэл, мэдээллийн хэрэгслээр манай компанийг татварын тайлангаа өгөөгүй, зайлсхийсэн гэсэн мэдээлэл гарсан. Бид тэр асуудлаар ТЕГ-т хандаж, гомдол материалаа өнөөдөр аваачиж өгсөн. Татварт 500 гаруй сая төгрөг төлсөн баримт байгаа” гэв.
Д.Одхүүгийн эхнэрийн компани мөн эсэхийг тодруулахад “Компани н.Батболд гэдэг хүний 100 хувийн эзэмшлийнх. Харин Д.Одхүүгийн эхнэр н.Номингэрэл хоёр сарын хугацаатай борлуулалтын менежерээр ажиллаж байгаад гарсан” гэсэн хариу өглөө.
Харин Татварын ерөнхий газрын Эрсдлийн удирдлагын хэлтсийн дарга С.Баясгалангаас “Энэрэл интернэшнл”-ийн захиалгаар орон сууцны хотхон барьсан компанийг татвараас зайлсхийсэн гэдэг нь танай ажилтнуудын гаргасан алдаа юм биш үү. Та бүхэн уучлал хүсэх гэж байгаа юм уу” гэхэд “Хэний компани болохыг бид мэдэхгүй. Татварын тайлан, хяналт шалгалт хийгдсэн. Шалгалтаар илэрсэн зөрчил, дутагдлыг дарга, удирдлагууддаа мэдээлсэн. Удирдлагуудын зөвшөөрөлгүйгээр мэдээлэл өгөх боломжгүй” гэлээ.
