Н.МӨНХЖИН

Өнгөрсөн долоо хоногт Камеруны хойд нутагт франц гэр бүлийг барь­цаалан авч явсан этгээ­дүүд өчигдөр нэгэн бичлэгийг интернэтийн Youtube сайтад оруулжээ. Лалын радикал Боко Харам бүлгийн нэрийн өмнөөс мэдэгдэл хийж буй этгээдүүд Камерун, Ни­гери дахь хэд хэдэн хо­ригд­лыг суллахыг шаард­сан байна. Интернэтээр цацсан бичлэг дээр франц гэр бүлийн долоон гишүүнийг харуулсан байв. Гурван эрэгтэй, лал хувцас өмсгөсөн нэг эмэгтэй, тэгээд гурван хүүхдийг шалан дээр суул­гасан байлаа. Тэдний ар талаар нүүрээ таглаж, гартаа зэвсэг атгасан хэд хэдэн этгээд зогсож, нэг нь франц хэл дээр текст уншиж, франц жуулчдыг Боко Харм бүлэг барь­цаалс­ныг зарлаж байсан юм.

Барьцаалагчид Каме­рун, Нигерийн шоронд хоригдож буй арав гаруй гишүүдээ даруй суллахыг шаардаж, хэрвээ шаард­лагыг үл тоомсорловол барьцааны хүмүүсийг хо­рооно хэмээн мэдэгджээ.

Эрчим хүчний GDF Suez компанийн ажилтан Танжи Мулен-Форниер эхнэр, дүү болон 5-12 насны дөрвөн хүүхдийн хамтаар Камерун, Ниге­рийн хил орчмын Ваза дархан цаазат газрыг үз­чихээд буцаж явахдаа лалын босогчдод барьцаа­лагдсан юм. Дээрх видео бичлэг дээрх хүмүүс Боко Харамын нэрийг барьж байгаа ч энэ нь батал­гаатай биш, өөр бүлгийн­хэн байж болзошгүй бай­на. Тус бүлгээс салж тусдаа гарсан Ансару бүл­гийнхэн байж магадгүй байгаа аж. Францын Ерөнхийлөгч Франсуа Оллан­дын мэдэгдэж буй­гаар, босогчид барьцааны хү­мүүсийг хоёр хувааж салгасан байж болзошгүй. Гэмт этгээдүүд цагдаа цэргүүд дайрч барьцааны хүмүүсийг суллавал за­римыг нь авч үлдэх зорил­гоор барьцааны хүмүүсийг хоёр хэсэгт хуваасан байж болзошгүй байгаа юм. Парисын эрх баригчид долоон иргэнээ хаана бай­гааг илрүүлэхээр шаргуу ажилласаар байна. Фран­цын тал Нигери, Каме­рун­тай нягт хамтран ажиллаж байгаа бөгөөд Чадын нийслэл Нджа­мена хотод байрлах франц цэргүүдийг байнгын бэлэн байдалд оруулаад байгаа юм. Барьцаалагчид болон барьцаалагдагчид Ниге­рийн Диква, Нгала хотын хооронд байна хэмээн Ни­герийн цэргийнхэн мэ­дэгд­сэн ч энэ нь батлагд­сангүй.

Камерунд барьцаалаг­даж, эдүгээ Нигерийн газар нутагт хүргэгдээд буй франц жуулчдыг ав­рах нь ихээхэн хүндрэлтэй тулгарах бололтой. Өнгөр­сөн онд Ансару бүлгийн­хэн Нигерийн хойд хэсэгт гадаадын гурван иргэнийг барьцаалсан. Тэднийг сул­лах ажиллагааг хоёр удаа явуулсан ч бүтэл­гүйтэж барьцаалагдсан гадаад иргэд амиа алдсан билээ. Энэ удаад ч иймэр­хүү золгүйтэл тохиолдож магадгүй байгааг тоймч, мэргэжилтнүүд анхаа­руулж байна. Мөн Ансару бүлгийнхэн өнгөрсөн арван­хоёрдугаар сард Фран­цын нэг иргэнийг барьцаалсан нь одоо ч сураггүй байгаа юм. Өн­гөрсөн оны бүтэлгүй аврах ажиллагааны дараа Ни­гери болон Франц улс яриа хэлэлцээнд илүү их найд­вар тавих болжээ. Гэвч дээрх долоон жуулчны дөрөв нь хүүхэд байгаа нь байдлыг улам хүндрүүлж байгаа аж.