Н.МӨНХЖИН
Кубын Төрийн зөвлөлийн дарга (Ерөнхийлөгч) Рауль Кастро дахин таван жилийн хугацаатайгаар сонгогдлоо. Кубын хувьсгалын лидер Фидель Кастрогийн дүү, 81 настай Рауль Кастро ахынх нь бие чилээрхэхэд Төрийн тэргүүний үүргийг гүйцэтгэж байгаад 2008 онд албан ёсоор Төрийн зөвлөлийн даргаар томилогдсон билээ. Гагцхүү түүний санаачилгаар төрийн албан хаагчид, тэр тусмаа төрийн тэргүүн нэг албан тушаалд хоёр дахин сонгогдохыг хориглосон хууль гарах гэж байна. Р.Кастро 2018 онд улс төрөөс зодог тайлна гэдгээ парламентын индэр дээрээс мэдэгдлээ. Боловсролын сайд асан, 53 настай Мигель Диас-Канель нэгдүгээр дэд Ерөнхийлөгчөөр томилогджээ. Диас-Канель Р.Кастрог залгамжилна хэмээн зарим ажиглагч үзэж байна. Тэрээр 1959 оны Кубын хувьсгалд оролцоогүй төрийн хамгийн өндөр албан тушаалтан болж байгаа аж.
Ерөнхийлөгчийг шууд санал хураалтаар бус, парламент нь сонгодог. Парламентыг 20 жил удирдсан Рикардо Аларкон халаагаа өгч, оронд нь Эстебан Ласог сонгосон байна. Парламентын чуулганы нээлтэд сүүлийн үед ховорхон үзэгдэх болсон Фидель Кастро хүрэлцэн ирсэн юм.
Рауль Кастро улс орныхоо эдийн засгийг хөгжүүлэхийн тулд олон арга хэмжээ авч, хөтөлбөр боловсруулан ажиллаж байна. Жижиг, дунд газар эзэмшдэг тариаланчдад газрыг нь үнэгүй өгч, тарьж ургуулсан бүтээгдэхүүнээ зах зээл дээр чөлөөтэй борлуулах эрхтэй болсон юм. Мөн өнгөрсөн нэгдүгээр сарын 14-нөөс Цагаачлалын шинэ хууль үйлчилж эхэлсэн нь Раулийн хийсэн хамгийн том шинэчлэлд тооцогдож байна. Шинэ хуулиар, куба иргэд гадаадад зорчихдоо орон нутгийн эрх баригчдаас эх орноосоо гарч явах тусгай зөвшөөрөл авах шаардлагагүй болсон юм. Мөн заавал цаад талын урилгыг шаарддаг байсныг болиулжээ. Эдүгээ куба иргэд гадаад паспортоо авч, нөгөө улсынхаа визийг даруулж чадвал эх орноо орхин гарахыг зөвшөөрч байгаа юм. Үүний хамгийн тод жишээг дурдвал, зартай тэрс үзэлтэн, Европын холбооны нэр хүндтэй шагналын эзэн болсон Y Generacion блогийг хөтлөгч Иоани Санчес хэд хоногийн өмнө анх удаа Кубыг орхин гадаад аялалд гарсан явдал юм. Тэрээр өмнө нь гадаадад зорчих гэж хэд хэдэн удаа оролдсон ч Гаванын эрх баригчдаас няцаасан хариу авч байжээ.
