Д.БОЛОР

МҮАН-ын дарга М.Энхсайханыг ажлаас нь халсантай холбогдуулан намынхан нь хуралдах болсон тухай зар хэдэнтээ түгсэн. Гэвч тэд товлосон цагтаа хуралдаагүй. Хуралдах эсэх нь ч тодорхойгүй байна. Үүнд УИХ-ын гишүүн, “Шударга ёс” эвслийн бүлгийн ахлагч Н.Батцэрэг ийн хариуллаа.

-МҮАН-ын бүгд хурал товлосон хугацаандаа яагаад болсонгүй вэ. Хэзээ хуралдах вэ?

-Манайхан өмнө нь цагаан сарын дараа буюу шинийн 8-нд намынхаа бүгд хурлыг хийдэг бай­сан. Тэр үед парламентад суудалгүй нам байсан учраас бололцоо нь ч өргөн байлаа. Одоо парламентад суудалтай нам учраас пар­ламентын бусад намуу­дын хуралдаж байгаа байдал, гаргаж байгаа шийдвэртэй өөрсдийнхөө асуудлыг уялдуулахгүй бол болохгүй. Үүнээс болж хойшлуулсан. Хоёр­дугаарт, энэ хавар Ерөн­хийлөгчийн сонгууль болно. Ерөнхийлөгчийн сонгуультай хол­боотой­гоор улс төрийн намууд хөдөлгөөнд ороод эхэллээ. Зарим нь нийлнэ, эвсэнэ гэх хувилбаруудыг ярьж байна. Иймээс манай на­мын тухайд эвсэх, хамт­рахаар ярьж байгаа на­муудын чиг хандлага, тэд­ний дэвшүүлж байгаа мөрийн хөтөлбөрийг харж байж өөрсдийн байр суурийг илэрхийлэх нь зүй­тэй гэж үзлээ. Энэ ут­гаараа хурлаа хийх гэж яарахгүй байгаа.

-Тэгэхээр танай намын хурал ойрын хугацаанд болохгүй гэсэн үг үү?

-Бид гуравдугаар са­рын дунд үе хүртэл хү­лээл­тийн байдалтай байна.

-Намын бүгд хурлаар Шинэчлэлийн Засгийн газрын ажилд үнэлэлт дүгнэлт өгөх. Цаашлаад М.Энхсайхан даргыг ажлаас нь халсан асуудалд хэрхэн хандах тухай ярилцана гэж байсан. Энэ асуудал орхигдож байна уу?

-М.Энхсайхан даргыг ажлаас халсан асуудалд манай намын гишүүд шүүмж­­лэлтэй хандаж байгаа. Гэхдээ МҮАН нь нэг хүнийг ажлаас гар­сантай холбогдуулаад гэ­нэтхэн оволзоод байх нам биш. Тэгээд ч намын дар­гыг ажилд оруулсан, халсандаа асуудал ор­ших учиргүй. Харин Мон­голын төмөр зам, Таван­толгойн нүүрсийг эдийн засгийн эргэлтэд оруулах, үнэд хүргэх зах зээлтэй холбоотой асууд­лаар үзэл баримтлалын зөрүү гарсан байсан. Энэ асуудлаар хариуцлага тооцсон сайд­тай нь бодлогын ямар зө­рүү байв, яаж засах вэ гэдгийг нь хаврын чуул­ганаас өмнө ярина.

-МАХН, МАН эвсэх тухай ярьж байна. МАХН-тай эвссэн намын тө­лөөллийн хувьд асуудалд хэрхэн хандаж байна вэ?

-Харж л байя. МАН-ын ахмад гишүүд давам­гайлсан байдлаар уриалга гаргаж байгаа юм билээ. Д.Тэрбишдагва даргатай санал солилцоход “МАН-ын зарим гишүүн уриалга ирүүллээ. Бид судалж бай­­гаад хариугаа өгнө”  гэсэн. Бид­ний хувьд байдлыг харзнаж байна.

-МҮАН-ынхан Ерөн­хийлөгчийн сонгуульд би­түүхэн бэлдэж байгаа нь нууц биш. Танай намаас хэн нэр дэвших вэ?

-Бодож байна. Манайд лидер бол бий. 45 нас хүрсэн, туршлагатай, олон түмэндээ танигдсан улс төрчид байна. Иймээс нэр дэвшихийг үгүйсгэхгүй. Нөгөө талаар бидэнд өргөн сонголт байна. Хувиараа нэр дэвшүүлэх болон аль нэг нам эвсэлтэй эвсэх. Эсвэл аль нэгийг нь дэмжээд оролцох хувилбар бий.

-МҮАН-ын гишүүд монгол бичиг сурч байгаа гэсэн үү?

-Г.Уянгаа гишүүн санаачлаад ийм хөдөлгөөн өрнүүлж байна. Энэ нь бичиг соёлоо уйгар­­жин бичиг рүү оруулъя гэсэн зүйл биш. Ер нь үндэсний үзлийг дээдэлдэг намын хувьд хуучин бичиг соёлоо мэд­дэг байх нь зүйтэй гэж үзээд суралцаж байна.

-Та хичээлдээ сууж байна уу?

-Хичээлдээ сууж ам­жихгүй байна. Гэхдээ би чинь муруй хазгай бичээд ч болтугай бас ч нэг га­дарлана шүү.