-Жилийн хугацаанд бид 70 гаруй хүүхдийг Японд аялуулсан-

Сүүлийн жилүүдэд Дорноговь аймагт  аялал жуулчлалын салбар нэлээд өргөжсөн, хүн ам өсч, дэд бүтэц эрчимтэй хөгжсөн. Тиймээс тус аймгийн ЗДТГ-ын Олон нийттэй харилцах албаны дарга С.Сайнзаяатай  уулзаж, Дорноговь аймаг гадаад харилцаагаа хэрхэн хөгжүүлж байгааг сонирхов.

-Дорноговь аймаг Япон улсын Шизүока мужтай найрамдалт харилцаа тогтоосон гэж дуулсан. Өөр ямар улс орон­той хамтарч ажилладаг вэ. Мөн энэ ажлын хүрээнд аймаг, орон нутагтаа ямар ажлууд хийж байна вэ?

-Дорноговь аймаг Бүгд найрамдах Болгар улс, Япон Улс, БНСУ-ын Ульсан хот, Австрали улсын Куинсланд муж, Англи,  ОХУ, БНХАУ  гэх мэт 10 гаруй улс орон тэдгээрийн мужуудтай хамтын ажиллагаагаа өргөжүүлэх, холбоо тогтоох санал солилцсон. Үүнээс Буриад улсын Иволгын муж, Хятад улсын Эрээн, Бугат, Ляонинь , Ордос хотууд, Солонгос дахь Зүүн хойд Азийн бүс нутгийн холбоод, Япон улсын Шизүока мужтай хамтын ажиллагаагаа хур­дац­тай хөгжүүлж байна.

Аймгийн Засаг дарга П.Ганхуяг 2010 онд Мон­гол Улсын Ерөнхийлөг­чийн Япон улсад хийсэн айлч­лалын бүрэлдэхүүнд Япон улсад ажиллахдаа Япон улсын Шизүока муж­тай найрамдалт харил­цааны гэрээ байгуул­сан. Улмаар Шизүока мужийн Захирагч Кава­кацу Хейта 2011 онд манай аймгийн 80 жилийн ойгоор айлчлан ирж хамтын ажил­лагааны гэрээнд хоёр  муж аймгийн дарга нар үзэглэсэнээр бидний харил­цаа эхэлсэн. Энэхүү хамтын ажиллагаа­ны гэ­рээ­ний хүрээнд Боловсрол соёл, эрүүл мэнд дэд бүтэц гээд хөгжлийн олон тул­гуурт салбарт хам­тын ажиллагаагаа хөг­жүүлж байна.

-Боловсролын салбарт хийж, хэрэгжүүлж байгаа ажлаасаа  сонирхуулаач?

-Боловс­ролын салбарт томоохон хөрөнгө оруулалтууд хийг­дэж байна. Манай айм­гийн хувьд өнгөрсөн хуга­цаанд “Шинэ Дорноговь” хөгжлийн хөтөлбөрийг  амжилттай хэрэгжүүллээ. Одоо ирэх дөрвөн жилд хэрэгжүүлэх “Шинэ Дорноговь -2” тогтвортой хөгжлийн хөтөлбөрөө ард иргэдээрээ хэлэлцүүлж, Аймгийн иргэдийн хур­лаар батлуулаад ажил­лаад эхлэлээ.  Сайншанд хүнд аж үйлдвэрийн парк энэ тэр гээд Дорноговь аймаг дотооддоо болон гадныхны  анхаарал тат­сан хөгжлийн төв болоод байгаа энэ цаг үед  манай аймгийн хувьд хөгжлийн тулгуур хүчний нэг бол яах аргагүй боловсон хүчний асуудал юм. Хүний хөгж­лөөс нийгмийн хөгжил эхтэй гэдэг дээ.

Үүнтэй холбогдуулаад гадаад улс орнуудад боловсон хүчнээ сургах, мэргэжил дээшлүүлэх, туршлага судлуулах аж­лууд хийгдэж байна. Өнгөрс­өн хугацаанд төр хувийн хэвшлийн 300 гаруй хүнийг өндөр хөг­жилтэй улс орнуудад мэр­гэжил дээшлүүлэх турш­лага судлууллаа. Нөгөө­тэй­гүүр ирээдүй болсон хүүхдүүдийн мэргэжлээ хэрхэн сонгох, мэдлэг бо­ловс­ролд дэмжлэг үзүүлэх үүднээс хоёр аймаг мужийн гэрээний хүрээнд “Дорноговийн хүүхдүүд Японд” сурагч солил­цоо­ны хөтөлбөрийг хэрэг­жүүлж эхлээд жил болж байна. Энэ хөтөлбөрөөр Дорноговийн 1000 хүүхэд Японд аялах юм.

Мөн Говийн нөхцөлд ундны цэвэр ус бол амин хэрэгцээ. Сайн­шанд хотын ундны усыг цэвэршүүлэхээр Шизүока мужийн цэвэр бохир усны газрын судалгааны багтай “Чандмань илч” ОНӨҮГ хамтран ажиллаж хоёр шатны судалгааг явуул­лаа. Цаашид хот баг хот­лоороо усаа цэвэршүүлэн хэрэглэх боломж юу байна гэдгийг судалж байна. Аль болох хурдан хугацаанд манай нөхцөлд таарсан зөв ший­дэлтэй технологи оруулж ирэхээр холбогдох албаны хүмүүс ажиллаж байна.

-Гадаадын өндөр хөг­жилтэй орон руу явж туршлага судлана гэдэг хэн хүнд тийм амар олдох боломж бас биш байх.  Сурагч солилцооны хөтөл­бөрт одоогоор хэчнээн хүүхэд хамрагдаад байгаа вэ. Мөн энэ аялалыг яаж зохион байгуулдаг юм бэ?

-Өнөөдрийн байдлаар нэг жилийн хугацаанд 70 гаруй сурагч аялаад байна. Үүнд ахлах ангийн сурагч­дыг Японы мэргэжлийн сургуультай танилцуулах, Японд суралцах болом­жийг хайх судлах болол­цоогоор хангах, соёл зан заншилтай танилцуулах аялал хийдэг бол, дунд ангийн сурагчдыг Япон айлд суулгах хүүхдийн зусланд амрааж үе тэн­гийн найзтай болох хөгжилтэй орны хөгжлөөс суралцуулах, танилцах аялал хийдэг онцлогтой. Он гараад нэгдүгээр сарын 25-наас хоёрдугаар сарын 2-ны хооронд 30 сурагч, хоёр багш аялаад ирлээ. Хүүх­дүүд маань явсан газрын сонин хачин аяллын сэт­гэгдлээ ирээд Айм­гийн удирдлагууд болон ард иргэдтэйгээ хуваалцдаг.

-Бусад салбарт ямар ажил хийж байна вэ?

-Гадаад харилцааг тогтвортой хөгжүүлэхэд төр, төрийн байгууллагын харилцаа холбооноос илүү хувийн хэвшлийн ард иргэ­дийн харилцаа их чухал учраас бизнесийн салбарыг дэмжиж хамтын ажиллагаатай Япон улсын Шизүока мужид турш­лага судлуулаад байгаа. Эхний ээлжинд 20 бизнес эрхлэгч туршлага судлаад ирсэн. Мөн хөдөө аж ахуй жижиг дунд үйлдвэрлэлийг хөг­жүүлэх чиглэлээр 4 мэр­гэ­жилтэн, Хот байгуулалтын чиглэлээр 2, эмчилгээ үйлчилгээ ,эмнэлгийн чиглэлээр 2 хүн богино хугацааны сургалтад хам­рагдсан. Өнгөрсөн сард төрийн захиргаа удирдлагын чиглэлээр 4 ажилтан мэргэжил дээш­лүүлэхээр яваад ирлээ.

-Танай аймаг саяхан Японы соёлын өдрүүдийг Дорноговьтоо зохион байгуулсан байх аа?

-Бид соёлын чиглэ­лээр нэлээд ажлуудыг хийдэг.              Япон улсад бол­дог олон улсын Дайдоге наадамд “Говийн уянга” хамтлагийн 16 сурагч орол­цоод бүжиглээд ирсэн. Үүгээр манай хоёр аймгийн хооронд соёлын харилцааг эхлүүлсэн гэж болно. Мөн Японы соёлын өдрүүдийг Японы элчин сайдын яамтай хамтраад Дорноговь аймагт зохион байгуулсан. Энэхүү соёлын өдрийн арга хэм­жээнд Японы элчин сайд Шимизү Такенори ирж оролцсон. Шизүока мужаас төлөөлөгч нар ирж оролцсон Сайншанд хотод хоёр хоног болсон.

-Цаашид ямар ажил хийхээр төлөвлөж байна вэ?

-Аялал жуулчлалын чиглэлээр хамтран ажил­лах, бизнес эрхлэгчдийн үйл ажиллагааг эрчим­жүүлэх зорилготой байна. Үүгээрээ дотоо­дын бизнес эрхлэгчдээ чадавхижуулах юм. Мөн сурагч солилцооны хөтөл­бөрийг үргэлжлүүлэн хэрэгжүүлнэ. Зарим хот сумдыг эдгээр өндөр хөг­жилтэй орнуудын хотууд­тай ах дүү хот болгож туршлага судлуулах. Гадаадад ажиллах хүчин ажиллахад боломжит нөх­цөл бололцоог судалж эрх зүйн туслалцаа үзүүлэх гээд олон ажлууд хийхээр төлөвлөж байна.