Б.Туул
Хаврын шалгалт хаяанд ирлээ. БШУЯ-ны харьяа Боловсролын үнэлгээний төв энэ сарын 1-ээс элсэгчидээ албан ёсоор бүртгэж эхэлсэн. Жил бүрийн элсэлтийн ерөнхий шалгалтын бүртгэл хоёрдугаар сарын 1-нд эхлээд, дөрөвдүгээр сарын 15-нд дуусдаг. Энэ жил товлосон хугацаанд ямар нэгэн өөрчлөлт ороогүй гэдгийг албаны хүмүүс хэлж байна. Тиймээс элсэлтийн ерөнхий шалгалт өгөхөөр бэлдэж байгаа сурагчдад дараах мэдээллийг хүргэж байна.
ЭНЭ ЖИЛИЙН ШАЛГАЛТАД 43 МЯНГА ОРЧИМ СУРАГЧ ХАМРАГДАНА
Элсэлтийн ерөнхий шалгалтын бүртгэл эхлээд нэлээд хэд хонож байна. Шалгалт өгөхөөр бэлдэж байгаа сурагчид бүртгэлд идэвхтэй хандаж байгаа тухай Боловсрол үнэлгээний төвийн мэргэжилтнүүд ярьж байсан. Мөн их, дээд сургуульд суралцахаар төлөвлөж буй хүүхдүүдийг интернэтээр, тэр дундаа www.eec.mn гэсэн цахим хаягаар бүртгэнэ. Гэхдээ цахим ертөнцөд нэвтрэх боломжгүй зарим орон нутгийн суралцагчдын боломж, нөхцлийг харгалзан бүртгэлийг хоёр янзаар явуулж байгаа гэдгээ тэд онцолж байсан. Тиймээс бүртгүүлэхээр зэхэж буй хүүхдүүдэд элсэлтийн ерөнхий шалгалтад хэрхэн бүртгүүлэх тухай дараах мэдээллийг хүргэж байна.
Энэ жилийн шалгалтын бүртгэл ирэх дөрөвдүгээр сарын 15-ны орой 18:00 цагт дуусна гэдгийг албаны хүмүүс хэлж байна. Хугацаа, цагийг нь сунгахгүй бас нэмэлт бүртгэл хийхгүй учир дээрх хугацаанд амжиж бүртгүүлээрэй гэсэн юм. Энэ хичээлийн жилд төгсөх ангийн 39667 сурагч шалгалт өгөх бөгөөд үүн дээр өмнөх оны төгсөгчид нэмэгдээд нийт 43 мянга орчим хүүхэд шалгалтанд хамрагдах магадлалтай байгаа гэсэн урьдчилсан судалгаа гарчээ. Элсэлтийн ерөнхий шалгалтыг энэ онд бүрэн дунд боловсрол эзэмшсэн иргэн, мөн 2013 оноос өмнө бүрэн дунд боловсрол эзэмшсэн болон түүнээс дээш боловсролтой иргэн өгч болно. Элсэгчид нь монгол хэл, англи хэл, орос хэл, математик, физик, хими, биологи, газар зүй, монгол улсын түүх, нийгмийн тухай мэдлэг хичээлүүдээс сонгон шалгалтаа өгөх юм. Энэ талаарх дэлгэрэнгүй мэдээллийг тухай бүрд нь хэвлэл мэдээллийн хэрэгсэл болон Боловсролын үнэлгээний төвийн Олон нийттэй харилцах ажилтнууд, “Элсэгчийн сонин”, www.eec.mn вебсайтаар олон нийтэд хүргэнэ.
ШАЛГУУЛАГЧИД ЗААВАЛ ӨӨРИЙН БИЕЭР ИРЖ БҮРТГҮҮЛЭХ ШААРДЛАГАГҮЙ
Энэ жил оюутан болж, их, дээд сургуульд суралцахаар төлөвлөж буй хүүхдүүдийг интернэтээр, тэр дундаа www.eec.mn гэсэн цахим хаягаар бүртгэнэ гэдгээ тус төвийн мэргэжилтнүүд онцолсон. Интернэтээр бүртгүүлэх боломжгүй хөдөө орон нутгийн сурагчид тухайн аймгийн Боловсролын үнэлгээний төвөөс тусгайлан томилогдсон бүртгэгчид хандах хэрэгтэй аж. Хэрэв өөрийн биеэр ирж бүртгүүлэх боломжгүй бол итгэмжлэгдсэн төлөөлөгчөөр дамжуулан бүртгүүлж болно. Шалгуулагчид заавал өөрийн биеэр ирж бүртгүүлэх шаардлагагүй. Бүртгэлийн хуудсаа Боловсролын үнэлгээний төвийн вэб хуудаснаас болон Боловсрол соёлын газар, сурч байгаа сургуулиасаа авах хэрэгтэй гэдгийг мэргэжилтнүүд дуулгаж байна.
ШАЛГАЛТЫН ХУРААМЖ 4800 ТӨГРӨГ
Онлайн бүртгэлийг Боловсролын үнэлгээний төвийн цахим хаягаар явуулна гэж дээр хэлсэн. Гэхдээ www.eec.mn вэб сайт нь төлбөр хийсэн тохиолдолд л бvртгэдэг гэдгийг анхаараарай. Энэ жилийн шалгалтын хураамж 4800 төгрөг. Батламж карт 700 төгрөг. Шалгуулагч хэдэн ч шалгалт өгсөн нэг батламж карттай байна. Тиймээс онлайнаар бүртгүүлж буй хүүхдүүд шалгалтынхаа хураамжийг Голомт банк, Худалдаа хөгжлийн банк, Капитрон банк, Төрийн банк, Улаанбаатар банк, Монгол шуудан банк, Хас банкны төлбөрийн мастер карт болон виза картаар шилжүүлж болно. Харин хөдөө орон нутагт paycode-ийн систем ашиглан бүртгүүлж буй шалгуулагч шалгалтын хураамжийг Голомт банк дахь Боловсролын Үнэлгээний Төвийн 1105038452 тоот дансанд тушаах юм байна. (paycode-дотоод төлбөрийн систем) Хэрэв дээр дурьдсан бүртгэлийн хугацаанд бүртгэлээ цуцлах тохиолдолд шалгалтын хураамжийн 70 хувийг эргүүлэн олгох ба бүртгэл дууссаны дараа ямар нэгэн шалтгаанаар шалгалтанд ороогүй тохиолдолд шалгалтын хураамжийг эргүүлэн олгохгүй, бусдад шилжүүлэн тооцохгүй гэдгийг анхаарах хэрэгтэй юм.
ШАЛГАЛТЫН ТАЛААРХ МЭДЭЭЛЛИЙГ 70119498, 70119484 ДУГААРЫН УТСААР АСУУГААРАЙ
Интернэтээр бүртгүүлж буй хүүхдүүд ихэвчлэн овог, нэр, регистрийн дугаараа буруу бичих, шаардлага хангахгүй зураг оруулах зэрэг нийтлэг алдаа гаргадаг. Тиймээс энэ алдааг давтахгүйн тулд бүртгүүлэхээсээ өмнө элсэлтийн журамтай сайтар танилцаарай. Учир нь интернэт бүртгэлийг буюу автоматжуулсан системд байрлуулсан овог нэр, регистрийн дугаарыг засварлана гэсэн ойлголт байхүй. Мэдээллийн санд оруулсан регистрийн дугаараар тухайн шалгуулагчийг ганцхан удаа бүртгэдэг учир бүртгэлтэй холбоотой дэлгэрэнгүй мэдээллийг Боловсролын үнэлгээний төвийн мэргэжилтнүүдээс болон 70119498, 70119484 дугаарын утсаар асуугаарай
Түүнчлэн Боловсролын үнэлгээний төвийнхөн элсэгчдэд ямар нэгэн хүндрэл учруулахгүйн тулд энэ жилээс эхлэн мессеж үйлчилгээ нэвтрүүлсэн бөгөөд тухайн шалгуулагч хувийн мэдээллээ оруулахдаа бичсэн утасны дугаараа ашиглан БҮТ-ийн тусгай 133233 дугаарт мессеж илгээн интернэт орох шаардлагагүйгээр өөрт холбогдолтой мэдээллээ авах боломжтой юм байна. Тухайлбал, бүртгэлийн дугаар, нууц дугаараа мартсан бол тэдгээрийг сэргээн авах, шалгалтын хуваарь, шалгалт өгөх анги, танхим, суудлын дугаарын мэдээлэл, шалгалтын дүн онооны мэдээллийг жирийн мессежний төлбөр буюу 40 төгрөгөөр авах боломжтой.
