УИХ-ын дарга З.Энхболд 2012 оны намрын чуулганаар хэлэлцэж баталсан хууль, тогтоомж болон цаг үеийн асуудлаар өдөр тутмын зарим сонин, МҮОНТ, Ийгл, NTB, Блүүмберг, ЕТВ зэрэгт ярилцлага өглөө. Тэрээр УИХ-ын намрын чуулганаар Монгол Улсын 2013 оны төсвийн тухай, Нийгмийн даатгалын сан, Хүний хөгжлийн сангийн тухай хуулиуд, төрөөс 2013 онд баримтлах мөнгөний бодлогын үндсэн чиглэлийг хэрхэн хэлэлцэж баталсан, хуулиудын онцлогийн талаар ярилаа. Түүнчлэн Оюутолгойн гэрээнд үүссэн асуудал, Бүх хятадын ардын төлөөлөгчдийн их хурлын Байнгын хорооны дарга У Бангуо-гийн айлчлалын зорилго, “Чингис” бондын талаар сэтгүүлчдийн сонирхсон асуултад хариулт өгсөн юм.
Парламентын тэргүүн У Бангуо-гийн айлчлалын үеэр Тавантолгойн асуудал болоод “Чалко” компанитай хийсэн гэрээний асуудлыг хөндөж ярилцаагүй, хоёр улсын Засгийн газар болон компани хоорондын гэрээний асуудалд УИХ оролцох ч ёсгүй гэдгийг энэ үеэр ярилаа. Оюутолгойн асуудалд ч дээрхтэй адил байр суурьтай байна. “Чингис” бондын хувьд УИХ-аас баталж өгсөн тогтоолын дагуу бондоор орж ирсэн хөрөнгө оруулалтыг Засгийн газар юунд зарцуулахаа өөрсдөө шийдвэрлэнэ, харин УИХ хяналт тавьж ажиллана хэмээв.
