Б.УРАН
ШӨХТГ, ОССК-ийн хамтарсан ажлын хэсэг орон сууцны үнэд хийсэн судалгаагаа танилцуулж, нэг метр квадратын үнийг нэг сая төгрөгт багтаах боломжтой талаар мэдээлэл хийлээ. Энэ шийдвэрийг хэрхэн хэрэгжүүлэх талаар дараах хариултыг өгсөн юм.
ШӨХТГ-ын дарга О.Магнай:
-Бидний хийсэн судалгаагаар Улаанбаатар хотод байрны үнийг нэг метр квадрат тутамд нэг сая төгрөг байлгах нь тухайн компанид ашигтай гэсэн тооцоог гаргасан. Энэ бол зөвхөн цаасан дээрх тоо биш. Монголбанк, Засгийн газар барилгын үнийг тогтворжуулах дэд хөтөлбөр хэрэгжүүлж байгаа. Энэ хөтөлбөрийн хэрэгжилтэд манай байгууллагаас хяналт тавьж оролцоно. Хөнгөлөлттэй зээл авч байгаа компаниуд нэг метр квадратынхаа үнийг нэг сая төгрөгөөс хэтрүүлэхгүй байх үүрэг хүлээнэ гэсэн үг. Нэг хэсэг орон сууцны үнэ яаж хөөсөрснийг та бүхэн мэдэж байгаа. 5000 ам.долларын үнэтэй орон сууц хүртэл байсан. Гэтэл Нью-Йоркод хамгийн тансаг дүүрэгт метр квадрат нь 6000-7000 ам.доллар байдаг. Гэтэл Улаанбаатарт шороон дунд тийм үнэтэй байгаа нь зүгээр л хөөс гэсэн үг. Одоо энэ хөөс хагарна. Бодитой үнэ тогтоно.
-Сая төгрөгийн дотор баригдаж байгаа эхний байр хэзээ ашиглалтад орох вэ?
ОССК-ийн гүйцэтгэх захирал А.Гантулга:
-Өнгөрсөн хугацаанд барилгын компаниуд дэндүү их ашгийн төлөө явсан юм болов уу гэсэн дүр зураг харагдаж байна. Ажлын хэсгийн судалгааны дүнд нэг метр квадратын үнийг сая төгрөгөөр тогтоох боломжтой гэж үзлээ. Манайхаас “Буянт-Ухаа” хорооллын төслийг хэрэгжүүлж байна. Есөн давхар 28 ширхэг барилга босно. Нийтдээ 1764 айлын орон сууцыг барьж байна. Энэ хорооллын эхний байр нь ирэх есдүгээр сард ашиглалтад орно. Иргэд энэ байрыг метр квадратыг нь 950 мянган төгрөгөөр авах боломжтой.
-Чанарын талд асуудал гарахгүй юу. Хямд үнэ гэдэг ямагт чанарын асуудлыг дагуулж байдаг шүү дээ?
О.Магнай:
-Бид чанарт хяналт тавина. Барилгын компани, Барилга хот байгуулалтын яам, манайх гурав гэрээ байгуулж ажиллана. Барилгын стандартыг яг л мөрдүүлнэ. Баянхошуунд баригдаж байна уу, Зайсанд баригдаж байна уу хамаагүй ижил материалаар барьж байгаа. Энэ бүхэнд хяналт тавина гэсэн үг.
-“Буянт-Ухаа” хорооллыг анх 850 мянган төгрөгөөр зарна гэж байсан. Яагаад 950 мянган төгрөг болчихов?
А.Гантулга:
-“Буянт-Ухаа” хорооллын дэд бүтцийн асуудал санхүүгийн хувьд гацаанд орсон. Тэгэхээр энэ барилгыг үргэлжүүлээд бондын хөрөнгөөр барьж байгаа. Дэд бүтцийн хувьд асуудлыг шийдэхийн тулд өөр арга байгаагүй. Уг нь 850 мянган төгрөгөөр зарагдах ёстой байсан юм. Харамсалтай нь бондын хүүнд мөнгө төлөх ёстой учир, өртөг нь нэмэгдээд 950 мянган төгрөг болсон юм.
-Тэгэхээр одоо шинээр босох барилгуудад энэ шийдвэр хамаатай гэсэн үг үү?
О.Магнай:
-Энэ онд баригдах барилгын компаниуд хөнгөлөлттэй зээл авах гэрээгээ хийчихсэн. Харин дараагийн гэрээ нь барилгын компани, барилгын яам, ШӨХТГ хооронд хийгдэнэ. Энэ онд баригдах барилгуудад энэ гэрээ хийгдэнэ. Тэгэхээр энэ компаниуд нэг сая төгрөгт багтаах үүргээ хүлээнэ гэсэн үг. Дагаад бусад орон сууцны үнэ буурна. Мэдээж өнөөдөр мэдээлэл хийгээд маргааш үнэ буурчихгүй гэдгийг ойлгоорой.
