Д.БОЛОР
“МАН-ыг шинэчлэх эв нэгдлийн хороо” байгуулагджээ. Хороонд одоогийн байдлаар УИХ-ын гишүүн асан Р.Раш, Д.Загджав, МАН-ын бага хурлын гишүүн Т.Аюурсайхан нарын ахмад гишүүд багтаж буй юм байна. Тэд намдаа шинэчлэл хийх талаар ийн ярилаа.
Р.Раш “Намаа улам сайжруулъя гэсэн санаа зорилгоор хороо байгуулж байна. Түүнээс биш хагалан бутаргах санаа алга. Өнөөдөр би намынхаа ажлыг чанаржуулж, ажил хэрэгч байдлыг дээшлүүлье гэж байгаа юм. Ялангуяа, удам угсаа нэг МАХН-тай болж өгвөл нэгдэх хэрэгтэй. Нэгдэж болохгүй юм бол байр сууриа нэгтгэх чиглэлээр ажиллах ёстой. Намайг ингэж хэлсэн, хэлээгүй хоёр намын ахмадын холбооны удирдлагууд хамтарсан мэдэгдэл гаргасан байна. Мэдэгдлийн гол утгад эвт шаазгай буга барина гэсэн санаа давамгайлсан байна лээ. Бидний нөхөр, нэртэй хуульч Ц.Шаравдорж хүртэл хоёр намыг нэгдэхийг уриалсан захидал бичсэн байна. Иймд болж өгвөл нэгдэх хэрэгтэй. Яахав, намын нэрийг сольсон нь буруу биш. Гэхдээ буруу биш ч гэлээ цаг хугацааны хувьд сайн тооцож үзээгүй. Намын гишүүдийн санаа бодол, итгэл үнэмшлийг сонсоогүй учраас өнөөдөр хүнд байдалд ороод байгаа юм. Энэ байдлаасаа гарахын тулд Ө.Энхтүвшин дарга гишүүд, дэмжигчдийнхээ үгийг сонсох хэрэгтэй” гэв.
Д.Загджав “Манай хороо өргөн хүрээнд ажиллах болно.Үндэсний хэмжээнд ажиллана. Салбар зөвлөлөө орон нутагт байгуулна. Намын шинэчлэл бол нэг удаагийн үйлдэл биш. Маш удаан хугацаанд явагддаг процессийн шинжтэй улс төрийн үйл ажиллагаа байдаг. Шинэчлэлийн асуудлыг анх ярихад тухайн нам эвсэлтэй холбож ярьдаг боловч цаад утгаараа улс орны тулгуур хөгжил болдог. Намын бодлого бол төрийн бодлогын уг үндэс нь байдаг юм. Энэ утгаараа намынхаа шинэчлэлийг хийх зайлшгүй шаардлага бий. Манай хороо намынхаа даргад уриалга хүргүүлж байгаа. УИХ-ын сонгуульд намын жагсаалтаар гишүүн болсон гишүүдийн хийсэн ажил, улс төрийн үйл ажиллагаанд дүгнэлт хийхийг шаардлаа. Хэрэв хууль санаачлах үүргээ гүйцэтгэхгүй байгаа бол эргүүлэн тат гэдэг шаардлага тавьсан. Дээрээс нь намын 27 дугаар их хурлыг хуралдуулах асуудлыг энэ сарын 21-ны дотор шийдэх ёстой. Бүгд хуралд хэвлэл мэдээллийнхний оролцох үүд хаалгыг ч нээх ёстой. Түүнчлэн улс орон, ард түмнийхээ ирээдүйн хөгжлийн төлөө улс төр үндэсний эрх ашигаа ухамсарлан нэгдэж нягтарч хамтран ажиллахыг МАХН төдийгүй улс төрийн бүх намд хандах нь зүйтэй” гэв.
Т.Аюурсайхан “МАН-ыг эрүүлжүүлэхэд эрдэмтэд ажиллаж байна. Залуу эрдэмтэн судлаачийн зөвлөл байгуулагдсан. Тэдний явуулсан санал асуулгаар нийт гишүүдийн 78 хувь нь шинэчлэх ёстой гэж хариулсан байна лээ. Хамгийн гол нь намын лидер болсон эрхмүүд авлигын хэрэгт холбогдож нэр хүнд унагааж байна гэж үзжээ” гэв.
