Э.ОРХОНСҮРЭН
Монголын багш нарын баярын 47 дахь өдрийг өнгөрсөн амралтын өдрүүдэд тэмдэглэн өнгөрүүллээ. БШУЯ-наас энэ жилийг хүүхэд нэг бүрийг хөгжүүлэх багшийн арга зүй, технологийг хөгжүүлэх жил болгон зарласан. Тиймээс багш нарын баяраар хүүхэд нэг бүрийг хөгжүүлэхэд амжилттай хэрэгжиж буй сургалтын арга зүй, технологийг тодорхой журмын дагуу бүртгэж эхэлсэн гэдгийг холбогдох албаны хүмүүс дуулгав. Энэ үеэр “Боловсролын технологийн үндэсний сан”-г нээх ажиллагаа давхар болсноороо онцлог байв. Энэхүү сан нь сургуулийн өмнөх болон ерөнхий боловсролын сургууль, мэргэжлийн болон дээд боловсролын бүх төвшний сургалтыг чанартай, үр дүнтэй, шилдэг технологийг нэвтрүүлэх үүнийхээ үр дүнгээр сургалтыг үнэлэх, дамжуулах, дэлгэрүүлэх боломжийг олгож өгөх ажээ. Технологийн сангийн нээлтийн үеэр нийслэлийн шилдэг багш нар өөр өөрсдийн арга барил, ажлын туршлагадаа үндэслэн бий болгосон шинэ арга технологио багш нар танилцуулсан юм. Завхан аймгийн Боловсрол соёлын газрын арга зүйч Ю.Дэлгэрнасан хөтөч хүүхдээр дамжуулан морин хуурыг амжилттай заасан “Тэмүүлэхүй” сэдэвт технологи, “Монгол-Энэтхэгийн хамтарсан сургууль”-ийн багш Б.Цэцэгмаа хүүхдэд хүргэх хичээлийн агуулгыг бодит туршлага дээр суурилан амжилттай хүргэсэн “25:50:25” сэдэвт технологи, Баянгол дүүргийн “Эрдмийн-Өргөө” цогцолбор сургуулийн багш Ш.Алтантуяа хүүхдэд олгох чадварт төвлөрч багш нарын заах хичээл нэгдмэл байдлаар байгальд зохион байгуулагдаж амжилттай хэрэгжсэн “Байгаль дахь сургалт” сэдэвт технологи, нийслэлийн 93 дугаар сургуулийн багш С.Отгонтуяа хичээлийн агуулгыг нэгдмэл байдлаар эх хэлнийхээ уран яруу ярих чадварт суурилан хүүхэд бүрийг амжилттай хөгжүүлсэн “Хүүхдийн ертөнцийг нээхүй” сэдэвт технологийг тус тус танилцуулж, ахмад багш нараас өндөр үнэлгээ авч байсан юм.
Мөн энэ үеэр тэргүүний сургууль, цэцэрлэг шилдэг багш нараа шалгаруулж, боловсролын салбарт үр бүтээлтэй ажиллаж байгаа багш нарыг шагнаж урамшуулсан юм. Энэ жилийн “Оны тэргүүний багш”-аар Булган аймгийн дөрөвдүгээр цэцэрлэгийн багш Л.Бумбат, Орхон аймгийн 14 дүгээр сургуулийн бага ангийн багш Ц.Чимэддулам, Сэлэнгэ аймгийн Баянгол сумын газарзүйн багш Ц.Цэцэгбалжид нар шалгарлаа. Харин оны тэргүүний цэцэрлэгээр Булган аймгийн Хангал сумын “Хараацай” цэцэрлэг, Завхан аймгийн Улиастай сумын наймдугаар цэцэрлэг, Баянзүрх дүүргийн 122 дугаар цэцэрлэг тус тус шалгарсан юм. Мөн Улсын тэргүүний ерөнхий боловсролын сургуулиар Дорнод аймгийн Хэрлэн сумын “Хан-Уул” цогцолбор сургууль, Сэлэнгэ аймгийн Сүхбаатар сумын дөрөвдүгээр сургууль, Баянзүрх дүүргийн 84 дүгээр сургуулиуд шалгарлаа. Төрийн болон төрийн бус дээд сургуулиас оны тэргүүний багшаар МУИС-ийн Хими химийн инженерчлэлийн сургуулийн химийн багш О.Болормаа, Үйлдвэрлэл урлалын политехникийн коллежийн үсчний мастер багш Д.Одгэрэл, “Идэр” дээд сургуулийн сэтгүүлзүйн багш Н.Мөнхзориг нар шалгарсан юм. Оны шилдгүүдээр тодорсон зарим багшийн сэтгэгдлээс нь хуваалцлаа.
БШУ-ы сайд Л.Гантөмөр:
БАГШ НАРЫН СУРГАЛТЫН АРГА ЗҮЙ, ШИНЭ ТЕХНОЛОГИЙГ БҮРТГЭНЭ
-Өнөөдөр Монголын багш нарын 47 дахь өдрийн баярын арга хэмжээ болж байна. Тиймээс багш нартаа хандаж үг хэлэхгүй юу?
-Юуны өмнө өнөөдөр уулзаж мэндчилгээ хүргэж чадаагүй ахмад, доктор, профессор багш нартаа багш нарын баярын халуун мэндийг хүргэж байна. Өнөөдөр бид багш нарын баярын 47 дахь өдрийг тэмдэглэхдээ зөвхөн багш нартаа хүндэтгэл үзүүлж баяр хүргэхээс гадна ажил хэрэгч мэндчилгээ хүргэхийг зорьсон. Тиймээс ч зорилгоо биелүүлж Шинжлэх ухааны сангийн нээлтээ давхар хийлээ. Энэхүү технологийн сан нь монголын мянга мянган багш нар өөртөө хадгалж байдаг аргачлалуудыг технологийн санд бүртгүүлж патент, гэрчилгээ авч олон түмэндээ хүргэх боломжыг нь бүрдүүлж байна. Технологийн санд одоогийн байдлаар 20 орчим арга зүй технологийн шинэ саналууд бүртгэгдсэн. Үүний дөрвийг нь өнөөдөр танилцууллаа. Энэ жил бид нэлээд том зорилго тавьж байгаа. Дөрвөн жилийн хугацаан дахь боловсролын шинэчлэл тэр дундаа чанарын шинэчлэл хийхдээ олон зорилтууд дэвшүүлж байна. Тийм ч учраас бид хүүхэд бүрийг хөгжүүлнэ гэсэн маш том зорилго тавьсан байгаа. Зорилгоо биелүүлэхийн тулд 30 мянган багш бүгдээрээ оролцох шаардлагатай юм. 30 мянган багш нараа бид арга зүйн технологийг нь үнэлэхээс гадна ажиллах орчныг нь бүрдүүлж өгье гэдэг санааг дэвшүүлж байгаа. Тухайн арга зүйн технологийг нь зөвхөн яаман дээр бүртгэдэг, эсвэл өөрийн сургууль дээрээ ашиглахаас илүү цаашдаа монгол, дэлхий даяар ашиглах арга зүйн технологи болон боловсрол судлалын чиглэлд манай багш нарын технологи бүртгэгдэнэ гэдэгт итгэлтэй байна. Тиймээс зорилгоо биелүүлэхийн тулд бид өдөрт нэг, жилд 365 технологийг энэ онд бүртгэж олон түмэнд хүргэж технологийг нь дамжуулах зэрэг ажлыг хийнэ гэдэг мэдээллээ бүх багш нартаа өгч байна. Тиймээс ч учраас сангийнхаа нээлтийг өнөөдөр хийлээ. Үүний гол хэрэглэгч нь өнөөдрийг хүртэл мэдээллийн технологийг зөвхөн өөрөө хүлээж авдаг байсан бол өнөөдрөөс эхлээд технологийн сангийн цахим хуудас нь тухайн багш тухайн технологт орж ажиллаж, өөрийгөө сорьж болдог өөрөө тэнд ажиллаж үзээд өөрийгөө дүгнэж болдог тийм систем юм.
Улсын тэргүүний 84 дүгээр сургуулийн захирал С.Март:
МАНАЙ СУРГУУЛИЙН ХӨГЖЛИЙН БОДЛОГО НЬ ХҮҮХЭД БҮРИЙГ ХӨГЖҮҮЛЭХ
-Монголын багш нарын 47 дахь өдрийн баяраар манай хамт олон “Улсын тэргүүний сургууль”-иар шалгарсандаа баяртай байна. Энэ шагнал манай хамт олны олон жилийн сэтгэл, зүтгэл, хүлээлтийн үр дүн юм. Хүүхэд бүрийг хөгжүүлж, багшийг ажлын байран дээр нь хөгжүүлэх, сургалтын орчинг бүрдүүлж сургалтад технологийн шинэчлэл хийсэн зэрэг ажлуудыг маань үнэлж энэхүү шагналыг олгосон гэж бодож байна. Би боловсролын салбарт 33 дахь жилдээ ажиллаж байна. Боловсролын салбарын шинэчлэлийн хүрээнд хийгдэж байгаа “Авьяас”, “Ном” хөтөлбөрийг талархан хүлээж авсан. Яагаад гэвэл энэ асуудал нь манай сургуулийн хөгжлийн бодлогод тусгагдсан байдаг.
Улсын тэргүүний “Хараацай” цэцэрлэгийн эрхлэгч Д.Уранчимэг: 
БОЛОВСРОЛЫН САЛБАРТ, БИДНИЙ АЖИЛД ЖИЛЭЭС ЖИЛД АХИЦ ГАРЧ БАЙНА
-Боловсролын салбар жилээс жилд өсөн хөгжиж дэвжиж байна. Манай байгууллага 2011 онд бүтээлч хамт олон бол байсан бол 2012 онд аймгийн шилдгийн шилдэг цэцэрлэг болсон. Мөн эрүүл мэндийг дэмжигч байгууллагаар тус тус шалгарч байсан. Харин энэ онд Улсын тэргүүний цэцэрлэг болсондоо маш их баяртай байна. Багш нартаа Монголын багш нарын 47 дахь өдрийн баярын мэндийг дэвшүүлье.
93 дугаар сургуулийн “Хүүхдийн ертөнцийг нээхүй” технологийг хэрэгжүүлэгч багш С.Отгонтуяа:
ТӨРМӨЛ АВЬЯАСТ ТУЛГУУРЛАЖ ХҮҮХДИЙГ ХӨГЖҮҮЛНЭ
-Хүүхэд бүрийг хөгжүүлэхийн тулд боловсруулсан танай технологийн давуу тал нь юу бол?
-Бага сургууль болон дунд сургууль төгсөж байгаа хүүхэд ямар боловсрол олж авснаар амьдаралд нь хэрэгтэй, аз жаргалтай байх вэ гэдэг бодлого зорилгоо тодорхойлсон. Тиймээс энэ зорилгодоо хүрэхийн тулд хүүхэд бүрийн онцлогт тохирсон агуулга арга зүйг сонгож ажилладаг. Хүүхдийн өгөгдмөл, төрмөл авьяас нөөц боломж дээр нь тулгуурлаж хөгжүүлнэ гэсэн гол санаа юм.
-Танай энэ технологид хүүхэд бүрийг хөгжүүлэхийн тулд багш өөрөө хэрхэн хөгжсөн байх ёстой вэ?
-Хүүхэд бүрээ эхлээд сайн судласан байх ёстой. Энэ хүүхэд ямар төвшинд явж байна нь гэдгийг мэддэг, хүмүүжил төлөвшилд нь юу хэрэгтэй байгааг нь мэддэг, олж хардаг байх юм. Үүний дараа сар бүр хүүхэд ямар чадвар эзэмшсэн байна гэдгийг эцэг эхийн саналтай уялдуулан гаргаж ирэх юм. Тэр чадварыг нь хөгжүүлэхийн тулд багш эцэг, эхтэй нягт хамтарч ажилладаг байна. Үүний үр дүнд 40 хүүхдэд ижил сэдэв заагаад ижил хугацаанд шалгадаг биш хүүхэд бүр судлах хичээл, арга технологи шалгуулах хугацаатай байх юм. Хөгжүүлээд ирэхээр багшаас хүүхэд бүрийг таних нарийн ухаан шаарддаг.
-Энэхүү технологийг сургалтад ашигласнаар хүүхдийн хүмүүжилд ямар ахиц гарах вэ. Цаашид амьдралд нь хэрхэн хэрэгжих бол?
-Боловсролын үр дүн гэдэг богино хугацаанд харагддаг зүйл биш. Гэхдээ энэ технологиор суралцаж төгсөж байгаа хүүхэд бүр амжилт аз жаргалын эзэн байх ёстой юм. Ингэж чадвал эрүүл биетэй, саруул ухаантай, сайхан сэтгэлтэй зөв боловсон дадал хэвшил ёс суртахуунтай болно. Энэ төлөвлөгөөг хэрэгжүүлэхийн тулд багшийн ажиллагаа хүүхдээ дагаж явдаг. Тиймээс энэ сургалтаар хүмүүжсэн хүүхэд нийгмийн хэв журмаа сахин хамгаалж, хүний ёсыг дээдэлсэн ажил амьдралын орон зайгаа эзэлж чаддаг иргэн болж төлөвших юм.
