Ч.ЗОТОЛ
Японы авъяаслаг зураач, цэгэн зургийн нэрт мастер, тус улсын “Сейко” дүрслэх урлагийн нийгэмлэгийн дарга Хамада Хидэми цас “Хаврыг хүлээх нь” нэртэй тун өвөрмөц нэгэн зургаа монголд үлдээлээ. Цасан доороос нар тосон тэмүүлж буй сакураг цэгэн зургийн аргаар дүрсэлсэн тэрээр “Хүний амьдралд ч гэсэн өвөл, хавар, зун намар гээд дөрвөн улирал ээлжилж байдаг юм” хэмээн өгүүлж байна. Зургийг сайн ойртож нарийн ширхэгүүдийг томруулж харвал сакураг бүрхсэн цасан ширхэгүүд цэцгийн дэлбээлэх мэт харагдана. Энэ нь л цэгэн зургийн давтагдашгүй гайхамшиг юм. Тэрээр энэ зургаа МАХН-ын дарга, Монгол Улсын гурав дахь Ерөнхийлөгч Н.Энхбаярт сайн сайхныг хүсч, хавар ирэхийн бэлгэдэл болгон дурсгаж буйгаа өчигдөр тус намын Ерөнхий нарийн бичгийн дарга Г.Шийлэгдамбатай уулзахдаа онцлоод өөрийн биеэр дамжуулж өгөхийг түүнээс хүслээ. Энэ үеэр Хамада Хидэмитэй Япон-Монголын Соёлын нийгэмлэгийн нарийн бичгийн дарга Ишико Нобуаки хамт байлцсан юм. Н.Энхбаярыг Монголын Соёлын яамны сайд байх үеэс хамтран ажиллаж, хоёр улсын соёлын харилцаа, тэр дотроо шашин соёлын чиглэлд үр бүтээлтэй олон ажлыг хийснийг ноён Ишико Нобуаки тэмдэглэв. Тэрээр цааш хэлэхдээ “Бид Монголд өрнөж буй үйл явдлын мэдээллийг сонсч дуулж байдаг. Гэхдээ улс төрийн асуудлын тухайд мэдэхгүй. Хоёр орны хооронд соёлын үрийг тарихад хамтран ажиллаж байсны хувьд Н.Энхбаярын хийж бүтээснийг бид үнэлж хүндэтгэж байдаг. Ийм ч учраас түүнд сэтгэлийн дэм өгч, эрүүл энх байж урт удаан наслаж, улс орныхоо төлөө цаашид улам ихийг хийж бүтээгээсэй хэмээн хүсч байгаагаа илэрхийлж байна” гэв. МАХН-ын Ерөнхий нарийн бичгийн дарга Г.Шийлэгдамба тэдний мэндчилгээ, зураг, номыг Н.Энхбаярт дамжуулахаа илэрхийлээд “Манай намын дарга, Монгол Улсын гурав дахь Ерөнхийлөгч Н.Энхбаяртай хамтран ажиллаж байснаа дурсч, мөн сайн сайхныг хүсч ирсэн явдалд талархаж байна” гээд тун удахгүй намын даргын бие эрүүл болж, “Хаврыг хүлээсэн нь” зурагт өгүүлсэн шиг Монголд ч сайн цаг ирэх болно гэлээ.
