Д.БОЛОР
Ерөнхий сайд Н.Алтанхуяг тэргүүтэй Засгийн газрын гишүүд, Бүх Хятадын Ардын Төлөөлөгчдийн Их Хурлын Байнгын хорооны дарга У Бангуотой хэлэлцээ хийв. Уулзалтад Монголын талаас УИХ-ын гишүүн, Монгол Улсын Шадар сайд, Монгол-Хятадын Засгийн газар хоорондын комиссын дарга Д.Тэрбишдагва, Хууль зүйн сайд Х.Тэмүүжин, Эдийн засгийн хөгжлийн сайд Н.Батбаяр, Эрчим хүчний сайд М.Сономпил, УИХ-ын дэд дарга М.Энхболд, Монгол-Хятадын парламентын бүлгийн гишүүн С.Бямбацогт нарын бусад хүн оролцсон. Хятадын талаас Бүх Хятадын Ардын Төлөөлөгчдийн Их Хурлын Байнгын хорооны Санхүү, эдийн засгийн комиссын даргын орлогч Вэй Лючэн, Байнгын хорооны Ерөнхий нарийн бичгийн даргын орлогч Цао Вэйжоу,Шэнь Чунь-яо, БНХАУ-ын Гадаад явдлын дэд сайд Жан Жизюнь, Худалдааны дэд сайд Жун Шань,БНХАУ-аас Монгол Улсад суугаа Онц бөгөөд Бүрэн эрхт Элчин сайд Ван Сяолун нарын албан ёсны төлөөлөгчид байлцлаа. Уулзалтын эхэнд Ерөнхий сайд Н.Алтанхуяг ноён У Бангуотой танилцаж байгаадаа баяртай байгаагаа илэрхийлээд, түүний айлчлал Монгол-Хятадын стратегийн түншлэлийн харилцааг гүнзгийрүүлэх, хоёр улсын парламент хоорондын харилцааг лавшруулахад чухал хувь нэмэр оруулна гэдэгт итгэлтэй байна гэлээ.
Хаалттай болсон хэлэлцээний үеэр ноён У Бангуо “Ерөнхий сайд Н.Алтанхуяг хоёр орны худалдаа, эдийн засгийн харилцааг хөгжүүлэхэд олон жилийн турш ихээхэн үүрэгтэй ажиллаж ирсэнд талархаж байна. Монгол Улсад анх удаа айлчилж байгаа ч танай орны эдийн засаг идэвхтэй хөгжиж буйг нүдээрээ харж, бахархаж байна шүү. Монгол Улс бол Хятадын чухал хөрш мөн. Манай хоёр улс их бүтээн байгуулалт, шинэ хөгжлийн гараан дээр байна. Монгол Улс байгалийн баялаг ихтэйгээрээ давуу талтай бол манай Хятад улс хөрөнгө, техникийн хувьд боломжтой. Тиймээс бид худалдаа, эдийн засгийн салбарт нягт хамтран ажиллаж, илүү их амжилт олох боломжтой” гэлээ. Түүнчлэн, Монгол Улсын төлөвлөж байгаа томоохон бүтээн байгуулалтад Хятадын нэр нөлөө бүхий томоохон компаниудыг оролцуулахад бэлэн байгаагаа илэрхийлээд, харин хамтын ажиллагаа, хөрөнгө оруулалтын хууль эрх зүйн үндэс нь хэн хэндээ тодорхой, тогтвортой байх нь чухал хэмээн онцолсон байна. Үүнийх нь хариуд Ерөнхий сайд “Худалдаа, эдийн засгийн хамтын ажиллагааг цаашид өргөжүүлэх шаардлага бий. Уул уурхай, дэд бүтэц, эрчим хүч, газрын тос, хөдөө аж ахуйн салбарт бид өргөн хүрээнд хамтран ажиллах боломжтой” гэдгээ илэрхийлжээ. Үүний дараа ноён У.Бангуо болоод түүний дагалдагч нар Ерөнхийлөгч Ц.Элэгдоржид бараалхсан юм. Мөн БНХАУ-ын банкинд очиж ажилласан ч уулзалт сэтгүүлчдэд хаалттай боллоо.
