Д.БОЛОР
Сэлэнгэчүүд ирэх дөрвөн жилд нутгаа удирдах хүнийг С.Бүрэнбат гэж байна. Түүнийг газар тариалан, мал ахуйн чиглэлээр мэргэшсэн боловсон хүчин учраас Сэлэнгийг удирдаад явах ур ухаан, чадвартай гэж итгэжээ. Гэхдээ сэлэнгэчүүдийн сонголтыг Ерөнхий сайд Н.Алтанхуяг одоохондоо батламжлаагүй байна. Шалтгаан нь бусад намын “явуулга”-д автсантай холбоотой гэх хүн цөөнгүй байна. С.Бүрэнбатын намтрыг сөхвөл аймгийнхаа Баруунбүрэн сум буюу Амарбаясгалант хийдийн орчимд өссөн хөдөөний хүү гэнэ. Мэргэжил гэвэл хөдөө аж ахуйн инженер, төрийн удирдлагын менежер. 2007 оныг хүртэл аймгийн газар тариалан, мал аж ахуйн салбарт ажилласан бөгөөд нутгийн зон олны дэмжлэгээр сумын Иргэдийн хуралд гурав, аймгийн Иргэдийн төлөөлөгчдийн хуралд мөн гуравдахь удаагаа сонгогджээ. 2008 онд Орхон сумын Засаг даргаар, 2009 онд Сэлэнгэ аймгийн Засаг даргын орлогчоор ажилласан юм байна. Харин 2012 оны наймдугаар сараас хуучин Засаг дарга Ж.Эрдэнэбат УИХ-ын гишүүн болсон учраас түүний албыг үргэлжлүүлэх хүндтэй үүрэг түүнд ногджээ. Өнгөрсөн жилүүдэд Ж.Эрдэнэбат гишүүн болоод С.Бүрэнбат дарга тэргүүтэй багийнхан орон нутгаа шилдэг аймгаар өргөмжлүүлэх хүртэл нь хэд, хэдэн бүтээлч ажил хийсэн байна. Тухайлбал, мал аж ахуй, газар тариаланг хөгжүүлэх, хүүхэд залуусын бие бялдар, авъяас чадварыг хөгжүүлэх, иргэнээ дэмжиж өрх гэрээ тэтгэх чиглэлээр томоохон ажлуудыг амжилттай зохион байгуулжээ.
“Бүтээн байгуулалт, ажлын байр нэмэгдүүлэх жил”-д 2452 ажлын байр бий болгож бүстээ тэргүүлснээс гадна “Аймаг хөгжүүлэх сан” байгуулан хүүгүй зээлээр бодитой хөрөнгө оруулалт хийж, үйл ажиллагааг нь дэмжсэн гэх таатай мэдээ бас бий. “АТАР-III” аяныг аймгийнхаа хэмжээнд зохион байгуулж, газар тариалангийн үйлдвэрлэлд гаргасан сэлэнгэчүүдийн хөдөлмөр зүтгэл, амжилт бүтээлийг Монголын төр үнэлж “Сүхбаатарын одон”-оор шагнасан бөгөөд Хөдөлмөрийн гавъяаны улаан тугийн хошой одонт Сэлэнгэ аймаг төрийн гурван одонт анхны аймаг болсон юм. Энэ бүх бүтээн байгуулалтын цаана С.Бүрэнбат тэргүүтэй ажилласаг баг байгааг нутгийнхан нь хэлдэг юм билээ. Түүнээс цаашид хийх ажлын төлөвлөгөөг сонирхвол “Орон нутгийн удирдлагын зүгээс иргэдэд бизнесийн аятай таатай орчныг бүрдүүлэх, айл өрхөд төрийн бүх үйлчилгээг хүргэх чиглэлд хүч түрж ажиллана. Цаашлаад Алтанбулаг сумыг худалдааны чөлөөт бүс болгоод зогсохгүй аймгийн төв Сүхбаатарыг худалдааны бүс болгох зорилотой. Үүний тулд Сүхбаатар, Алтанбулаг хооронд холбох дэд бүтцийн ажлуудыг хийгээд эхэллээ. Дээрээс нь шинэ хороолол барьж байгаа гэх мэтчилэн хийж байгаа нэлээдгүй ажил бий. Өнгөрсөн дөрвөн жилд Засаг дарга өөрийнхөө нөөц боломжийг дайчилж хоёр тэрбум орчим төгөгийг хүүгүй зээлээр олосон. Хоёрдугаарт, бизнесийн таатай орчныг зөвхөн татварын хөнгөлөлт гэж ойлгож болохгүй. Орон нутгийн худалдааны борлуулалтыг дэмжих хэрэгтэй. Нийслэлд бараа бүтээгдэхүүнээ нийлүүлэх боломжийг нь хангах хэрэгтэй гэдэг талаас нь анхаарна. Гуравдугаарт, хот байгуулалтын асуудлыг зөвхөн аймгийн төвд төвлөрүүлж болохгүй. Сэлэнгэ аймгийн бүх сум хуучин цагт сангийн аж ахуй байсан учраас инженерийн байгууламжтай, барилга орон сууцтай. Барилга орон сууцыг нь шинэчилж засаад хотжуулах боломж бол байгаа. Ингэхийн тулд энэ ажлыг эрхлэн гүйцэтгэж чадах орон нутгийн бизнес эрхлэгчдийг дэмжих ёстой” гэж байв.
Сэлэнгийг төрийн гурван одонт анхны аймаг болтол хөгжүүлэхэд хувь нэмрээ оруулсан энэ залууг Засаг даргаар батламжлах эсэх нь тодорхойгүй байна. Магадгүй өрсөлдөгчид нь түүний эсрэг буруу мэдээллийг Ерөнхий сайдад хүргүүлсэн байж ч мэдэх юм.
