А.ОТГОНЧИМЭГ

Өвөрхангай аймгийн Цагдаагийн газрын дарга, цагдаагийн хошууч Б.Батзаяатай ярилцлаа.

-Танай хамт олны шинэ оны  ажлын гараа зорилго юу вэ?

-Бид энэ онд олон ажил хийхээр төлөвлөж байгаа. Тэдгээрийн дотроос нэн тэргүүнд албан хаагчдын харилцаа, хандлагыг өөр­чилж, иргэдэд үзүүлж буй үйлчилгээний чанарыг сайжруулж,  шуурхай бол­гох,  иргэдээс цагдаагийн байгууллагын ажил үйл­чилгээтэй холбоотой болон хамтран ажиллах талаар гаргасан сана­луудыг хүлээн авч, тэдэн­тэйгээ ойрхон ажиллах зорилго тавин ажиллаж байна. Цагдаагийн газрын даргын 01 тоот албан даал­гавар гарган биелэлтэд нь хяналт тавин ажиллаж байгаа. Албан даалгаврын нэг онцлог нь урд жилүү­дэд ихэвчлэн ажлын бүтээмжийг дээшүүлэх, сайжруулах чиглэлтэй байсан бол энэ удаа­гийн­хад сахилга, харилцааны соёлыг дээшлүүлэх, үйл­чилгээний чанарт ахиц гаргах талаар зорьж байгаагаа­раа онцлогтой. Гол нь цагдаагийн удирдах ажилт­нуудын манлайллыг дээшлүүлэх, бай­гуул­лагаас баримталж буй бодлогыг нэн түрүүнд хэрэгжүүлж  хяналт тавих үүрэг бүхий субьектуудын хувьд шинэчлэлийн бод­логын хүрээнд тавигдаж буй шаардлага, шалгуу­руудад өөрсдийгөө ний­цүүлж, цаг ямагт албан хаагчдынхаа манлайлагч байхад анхаарч ажилла­хаар тусгасан. Мөн залуу боловсон хүчнээ сургаж дадлагажуулах, тэднээс иргэдэд үзүүлж буй ажил үйлчилгээний чанар, ха­рил­цах чадвар нь иргэдийн хүсч хүлээж буй хэмжээнд хүрч байгаа эсэхэд тавих хяналтаа тогтмолжуулж, хэвшүү­лэх, алба хаагчдын са­хилга болон ёс зүйн зөрчил, дутагдлыг засаж тэдэнд алдаагаа дахин гаргуулахгүй байх талаар тусгасан. Ер нь ажил үйл­чилгээний чанарт өөрч­лөлт оруулж, хамгийн түрүүнд иргэдтэйгээ ойр­тож тэдний туслалцаа дэмж­лэгийг авч, нийг­мийн шаардлага захиалгад нийцсэн ажил үйлчилгээг чирэгдэлгүй хүргэж байя гэсэн гол зорилт тавин ажиллаж байна. Дээрх ажил нь бидний зүгээс ямар ч төсөв хөрөнгө шаар­дахгүйгээр хийж чадах энгийн юм шиг мөртлөө ажлын арга барил, сэтгэл­гээнд өөрчлөлт оруулж чадах хамгийн том ажил гэж болно.

-Шинэчлэлийн бодо­логын хүрээнд шинэлэг ямар төсөл хөтөлбөрүүд хэрэгжүүлэх вэ?

-Засгийн газраас олон нийт цагдаагийн  хамтын ажиллагаа хөтөлбөр хэрэг­жүүлж байгаа. Энэ нь иргэдтэйгээ ойр байх, гэмт хэргээс урьдчилан сэргий­лэхэд иргэд олон нийтийн оролцоо, туслалцаа дэмж­лэгийг авч хамтран ажил­лах зорилготой хөтөлбөр юм. Үүнийг орон нутгийн хөрсөнд буулгахын тулд Арвайхээр сумын төвийн 10 багт иргэний зөвлө­лүүдийг ажиллуулж бай­гаа. Ингэснээр гэмт хэрэг­тэй тэмцэхэд иргэдийг татан оролцуулж байгаа нь  ажлын чанар, арга барилд тодорхой хэмжээний дэвшил гарч байгаа юм. Энэ нь бусад  аймгуудад туршлага болохуйц ажил гэж үзэж байгаа. Бид иргэ­ний зөвлөлд сайн дураараа нэгдэн ажиллаж буй хүмүүсийн хүрээг тэлэх, тэднээр дамжуулан иргэдтэйгээ ойртох бод­логыг барин ажиллаж бай­гаа. Энэ ажлыг өргөжүү­лэх, хэвшүүлэхэд тулгам­даж буй гол зүйл бол тэд­ний урамшууллын асууд­лыг шийдвэрлэх. Энэ талаар аймгийн гэмт хэргээс урьдчилан сэргий­лэх ажлыг зохицуулах салбар зөвлөлд саналаа танилцуулж урамшууллыг шийдвэрлэхээр болсон.

Мөн  гэмт хэргээс урьд­чилан сэргийлэх чиг­лэлээр  2013 онд аймгийн Засаг даргын үндсэн чиг­лэлд Арвайхээрийг камер­жуулах, төрийн үйлчил­гээний нэгдсэн хяналтын системийг бий болгохоор 500 сая төгрөгийг эхний ээлжинд аймгийн Иргэдийн хурлаараа бат­луулж, ажлаа эхлүүлэхээр болсон. 2013 онд Арвай­хээр сумыг бүхэлд нь камер­жуулах ажил хийг­дэнэ гэсэн үг. Төрийн үйлчилгээний нэгдсэн системийг бий болгож аймгийн төвийг бүхэлд нь камержуулснаар ,гэмт хэрэг, захиргааны зөрч­лийн тоо буурах бодитой ажил болно. Үүний зэрэг­цээ төрийн үйлчилгээ иргэдэд цаг тухайд нь хүрч байгаа эсэхэд хяналт тавих, мөн  өнгөрсөн үйл явдал, хэрэг, зөрчлийг сэргээснээр шүүхэд гол нотлох баримт болгон ашиг­лах боломжтой  хэ­мээн үзэж байгаа. Цааш­лаад ганц Цагдаагийн байгууллага биш төрийн бүхий л байгууллагуудад хяналтын системийг ашиг­ласнаар ажил үйл­чилгээ жигд, хүнд суртал­гүй, чирэгдэлгүй хүргэхэд үр дүнд хүрнэ гэж үзэж байгаа. Энэ дашрамд төрийн үйлчилгээний нэгд­сэн систем байгуулах ажлыг дэмжиж, төсөв хөрөнгийг шийдвэрлэсэн аймгийн Засаг дарга болон Иргэдийн төлөөлөгчдийн хурлын гишүүддээ талар­хаж байгаагаа танай сони­ноор дамжуулан хүргэж байна. Өвөрхангай айм­гийн хэмжээнд 2013 оныг “Төрийн үйлчилгээний шинэчлэл, иргэдийн оролцоог нэмэгдүүлэх” жил болгон зарласан. Энэ хүрээнд аймгийн хэм­жээнд хийж гүйцэтгэхээр төлөвлөсөн ажлуудыг хэ­рэг­жүүлэхэд манай бай­гуул­лага идэвхитэй орол­цож, санал санаачлага гарган ажиллах болно гэдгээ хэлмээр байна.

-Мөрдөн байцаах та­сагт хэрэглэж байгаа техник хэрэгсэл шинэч­лэгдэж байна уу?

-Манай хэрэг бүртгэх албаны чиглэлийн ажилт­нууд нотлох баримт цуглуулах, бэхжүүлэх, үнэлүүлэх ажилд хэрэг­лэж байгаа техник хэрэг­сэлүүд хоцрогдсон шаард­лага хангахгүй болсон. Шинэчлэлт хийхээр Хууль зүйн сайдын зүгээс нэлээд ажлууд хийхээр төлөвлөж байгаа. Хөгжин­гүй орнуудад ашиглаж байгаа хүчин чадалтай техник хэрэгслүүдийг гэмт хэрэгтэй тэмцэх үйл ажиллагаанд өргөнөөр ашиг­лах боломж нь удах­гүй нээгдэх байх гэж  миний хувьд боддог.  Ялангуяа гэмт этгээдийн зүгээс хэргийн газарт үл­дээ­сэн биологийн гарал­тай ул мөр, хөлс үнэрийг бэх­жүүлэх боломжгүй бай­даг. Гэмт хэрэгтэй тэм­цэхэд техник хэрэгсэл сайжрах­гүйгээр асуудлыг ярихад явцуу юм. Мөн энэ албанд ажиллаж буй хү­мүү­сийн ур чадварыг сайж­руулах нь зайлшгүй юм.

-Замын цагдаагийн ажилд шинээр нэвтрүүлж буй олон ажил байгаа байх даа?

-Замын хөдөлгөөний дүрэм зөрчсөн осол, гэмтэл жил дарааллан өсөж байгаа. Энэ нь  тээврийн хэрэгсэл, чанар­гүй жолооч бэлтгэдэг сур­гуулиудын тоо ихэссэнтэй холбоотой гэж үздэг. Замын хөдөлгөөний аюул­гүй байдлын эсрэг хэрэг зөрчил сүүлийн жилүүдэд өссөөр байна. Үүнд төрийн зүгээс анхаарал хандуу­лах­гүй бол энэ хэргийн улмаас хүний амь нас эрсдэж, учруулж буй хор уршиг, хохирлоороо бусад хэргүүдтэй харьцуулахад илүү байгааг анхаарах цаг болсон. Бид тоо баримт л яриад байгаа болохоос цаад агуулгыг нь орхиг­дуулж байна. Өөрөөр хэлбэл, аль ч төвшинд нүд, чих дассан байна гэж  боддог. Манай аймгийн ГХУСАЗЗ-өөс 2013 оныг Замын хөдөлгөөний аюул­гүй байдлын эсрэг гэмт хэрэг зөрчлийг бууруулах жил болгон тодорхой аж­луу­дыг зохион байгуу­лахаар төлөвлөж байна.

-Сумдын хэсгийн  төлөөлөгчид амьдрал ахуй, ажиллах байраар хэр хангагдсан бэ?

-Сумдад ажиллаж буй хэсгийн төлөөлөгч, цаг­даагийн ажиллаж амьдрах нөхцөлийг  бүрдүүлэх чиглэлээр Засгийн газар, ЦЕГ-аас хэрэгжүүлж бай­гаа ажлын нэг нь суманд ажиллаж буй цагдаагийн алба хаагчдийн кобан байр­ны асуудал юм. Манай гурван суманд л кобан бариагүй байгаа. Энэ онд Бүрд суманд кобан байр баригдана. Иймээс ажиллах амьдрах байрны хувьд харьцангуй хангагдсан. Мөн цаг­даагийн албан хаагч ажилт­нуудын нийгмийн баталгааг хангахаар цаг­даагийн тухай хуульд хууль­чилсан байдаг үүнийг сумдын Засаг дар­га нарыг анхаарч ажиллах байх гэж найдаж байна.

-Танайд хамгийн их тулгамдаж байгаа ямар асуудал байна вэ?

-Манайд хамгийн түрүүнд тулгамдаж байгаа асуудал бол алба хаагчдын ажиллаж, амьдрах нөх­цөлийг сайжруулах юм. Бид олон жил ашигласан, багтаамж муутай ажлын байртай. Орон нутгийн удирдлагын зүгээс энэ нөхцөл байдлыг ойлгож Цагдаагийн газ­рын шинэ байрны газар, барилгын зургийн мөнгийг шийдсэн. Бид хөрсний шинжилгээгээ хийлгэж зураг, төсвөө хол­богдох газруудад хүргүүл­сэн байгаа. Цагдаагийн алба хаагчид айлын хажуу өрөө түрээслэх, айлын хашаанд гэрээ барих зэр­гээр тав тухгүй байснаас үндсэн ажлаа хэвийн хэм­жээнд гүйцэтгэх боломж­гүй байна гэсэн миний бодол байдаг. Төрийн албан хаагчдыг орон сууц­жуулах чиглэлээр төрөөс нэлээд томоохон ажлыг шат дараалан хийж гүйцэтгэх нь зохимжтой боловуу гэж. боддог.