М.ЦЭЦЭГ
Аймгийн Засаг дарга нар бүхэлдээ солигдож гурав нь улиран сонгогдсон билээ. Тэдний нэг нь Өвөрхангай аймгийн Засаг дарга Д.Тогтохсүрэн юм. Тус аймагт МАН ялсан, түүн дотроо хуучин Засаг дарга нь шинэ Засгийн газрын бодлогыг хэрэгжүүлэх боломжтой хэмээн үнэлж улираасан гэж болно. Одоогоор парламентад төлөөлөл дутуу байгаа ганцхан аймаг нь Өвөрхангай. Хоёр мандаттай бөгөөд тус аймаг намаржин будилсаар нэг гишүүн нь тангараг өргөсөн. Үлдсэн нэг нь маргаантай хэвээр, шүүхийн эцсийн шийдвэр гараагүй байгаа юм. Өвөрхангай аймгийн Засаг дарга Д.Тогтохсүрэн өмнө нь хийж байсан ажлуудаа ирэх дөрвөн жил үргэлжлүүлж, мөн “Бүтээлч Өвөрхангай” гэсэн томоохон хөтөлбөрийг хэрэгжүүлэхээр төлөвлөжээ.
Хуучин Засаг даргын шинэ хөтөлбөр тус аймгийн хөгжлийн баримт бичгүүд, мөн МАН, АН, МАХН-МҮАН-ын “Шударга ёс” эвсэл, төрийн болон төрийн бус байгууллага, иргэдийн 600 гаруй саналд үндэслэжээ.
Орон нутгийн сонгуулиар Ардын нам бүхэлдээ ялагдсан ч есөн аймагт ялсны нэг нь Өвөрхангай юм. Гэхдээ МАН олонх болсон зарим аймгийн Засаг даргыг батламжлаагүй бөгөөд өөр намын дарга үүрэг гүйцэтгэгч болсон нь улс төрийн халуун сэдэв болоод буй. Өвөрхангайнхны улстөржилт өнөөдөр хүртэл дуусаагүй байна. Харин Өвөрхангайн Д.Тогтохсүрэнг батламжилсан нь шинэ Засгийн газартай гар нийлж ажиллах боломжтой хэмээн тоосон байх. УИХ-ын сонгууль Өвөрхангайд будилаантай хэвээр байхад орон нутгийн сонгуулиар Д.Тогтохсүрэнгийн багийг олонх болгосон нь будилаангүй үнэн байсан аж. Гэхдээ ИТХ түүнийг Засаг даргаар сонгож Засгийн газарт уламжилахад Ерөнхий сайд эхний удаа буцаасан. Хоёр дахиа ирэхэд нь батламжилж хүлээн зөвшөөрсөн юм.
Өмнөх ИТХ Д.Тогтохсүрэн даргын өнгөрсөн дөрвөн жилийн мөрийн хөтөлбөрийн хэрэгжилтийг 98,8 хувьтай буюу бүрэн хангагдсан гэж дүгнэсэн. Энэ бол түүнийг сонгосон, мөрийн хөтөлбөрийг нь хэлэлцэн баталсан нөхдүүдийн өгсөн үнэлгээ. Дөрвөн жилийн хугацаанд аймгийн хэмжээнд 133,6 тэрбум төгрөгийн хөрөнгө оруулалт хийсэн байна. Өмнөх бүрэн эрхийн хугацаатай харьцуулбал өндөр тоо гэнэ. Тиймээс өнгөрсөн дөрвөн жил Өвөрхангайн их бүтээн байгуулалтын он жилүүд байсан гэхэд болно.
Гэхдээ Д.Тогтохсүрэн дарга ажилдаа ханаагүй, чамлалттай зүйл байгааг нэгэн бүрэн эрхийн хугацааны сүүлийн жилд ярьж байсан. Тус аймгийнхан эрүүл мэндийн салбар, ажлын байрны талаар сэтгэл дундуур байдаг гэсэн. Тус аймаг 113 мянган хүн амтай учир ажлын байр ховор, ажилгүй хүн олон байгаа нь Засаг даргын санааг хамгийн их зовоодог зүйл аж. Тиймээс Д.Тогтохсүрэн дарга ирэх дөрвөн жилд шинэ хөтөлбөр боловсруулж шинэ арга барилаар ажиллахаар зэхжээ. Шинэ хөтөлбөрт эрүүл мэндийн салбарт багаж хэрэгсэл шинэчлэх, эмчилгээний тоног төхөөрөмж, боловсон хүчний мэдлэг ур чадварыг дээшлүүлэх, хот руу явж эмчлүүлэгчдийн тоог бууруулах, байнгын болон түр 12 мянган ажлын байр нэмэхээр зорьжээ.
Засаг дарга Д.Тогтохсүрэн төрийн алба, түүний удирдлага, мөн улс төрд олон жил ажилласан туршлагатай. Өмнөх дөрвөн жилд Засаг дарга, түүний өмнө аймгийн ИТХ-ын даргаар ажилласан. Энэ хугацаанд сайн ч, саар ч нэр зүүсэн. Өнгөрсөн жил олон аймгийн Засаг даргыг Авлигатай тэмцэх газар шалгасны нэг нь Д.Тогтохсүрэн. Өвөрхангайн Ардчилсан намынхан түүнийг улсын хөрөнгө идэж уусан гэж олон зүйлээр буруутгасан. АТГ шалгаад Нийслэлийн прокурор, Улсын ерөнхий прокурорын газраар хянуулаад Д.Тогтохсүрэнг ямар ч гэмт хэрэг үйлдээгүй гэж дүгнэсэн. Түүний нэр хүндэд халдсан зориуд гүтгэлэг байсан нь тогтоогдсон юм. Өвөрхангайн Засаг даргатай холбоотой гэх ямар ч хэрэг байгаагүй бөгөөд чухам үнэнийг нутгийнхан нь мэддэг учир түүний баг сонгуульд ялалт байгуулсан болов уу.
