Ц.БАЯР
“AI аcademy аsia”-с санаачлан хэрэгжүүлдэг “Үндэсний хиймэл оюуны аян” нь 2025- 2030 он хүртэл таван жилийн хугацаанд нийт 2500 хиймэл оюуны хүний нөөцийг бэлтгэх, Монгол Улсын ерөнхий боловсролын сургуулийн багш нарыг чадавхжуулах хөтөлбөр ажээ. Энэ хүрээнд жил бүр 10000 сурагчдад хиймэл оюуны мэдлэгийг түгээх үр нөлөөтэй.
2025 онд аяны хүрээнд ерөнхий боловсролын сургуулийн 450 багш, 50 инженерийг хиймэл оюуны мэдлэг, хэрэглээнд чадавхжуулсан байна. Энэ жилийн тухайд Голомт банкны дэмжлэгтэйгээр Олон улсын цахилгаан холбооны байгууллагын “AI Skills Coalition”-ны хүрээнд Монгол Улсын 21 аймаг, нийслэлийн есөн дүүргийн ерөнхий боловсролын сургуулийн 500 багшийг хамруулж эхэлээд байгаа ажээ. Энэ оны хоёрдугаар сарын 28-ний өдөр “Хиймэл оюуны 500 багш бэлтгэх хөтөлбөр”-ийн нээлтийн үйл ажиллагаа цахимаар болсон байна. Энэ үеэр хөтөлбөрт шалгарсан 500 багш гурван сарын хугацаанд хиймэл оюуны сургалтад хамрагдаж улмаар сум, орон нутгийн сурагчдад заах юм байна. Энэ жилийн сонгон шалгаруулалтад нийт 3998 багш нар материалаа илгээсэн байна.
Уг хөтөлбөрийн нээлтэд Голомт банкны гүйцэтгэх захирал А.Одонбаатар, НҮБ-ын Хүүхдийн сангийн Монгол дахь суурин төлөөлөгч Беате Дастел, хөтөлбөрийг санаачлагч, “AI Academy Asia”-ийн гүйцэтгэх захирал Б.Болор-Эрдэнэ, БШУЯ-ны Цахим боловсрол статистик мэдээллийн хэлтсийн дарга Т.Бат-Эрдэнэ нар оролцлоо. Нээлтийн үеэр АНУ-ын Бостоны их сургуулийн доктор, Стэнфордын их сургуулийн постдоктор Б.Ундрал тухайн хөтөлөбөрт шалгарсан багш нарт анхны хичээлээ заажээ. Түүнчлэн Голомт банк хувийн санхүүгийн удирдлагын багц хичээлийг тус банкны Эдийн засгийн судалгааны хэлтсийн Эдийн засгийн шинжээч Б.Анунжин заасан нь онцлог байлаа. Өнгөрсөн онд уг хөтөлбөрт 500 багш хамрагдаж орон нутгийхаа 10 мянга орчим сургачдад хиймэл оюун ухааны хичээлээ зааж бодит үр дүнд хэрсэн талаар энэ үеэр тодотгож байна.
“Үндэсний хиймэл оюуны аян”-ы гол зорилго нь багш, сурагчдын хиймэл оюуны суурь ойлголтыг нэмэгдүүлж, зөв болон хариуцлагатай хэрэглээг төлөвшүүлэхийн зэрэгцээ AI хэрэгслийг хичээл заах, үнэлгээ хийх, агуулга боловсруулах үйл явцад үр дүнтэй ашиглах замаар боловсролын чанарыг сайжруулж, багшийн мэргэжлийн чадавхыг бэхжүүлэн, сурагчдыг технологид суурилсан эдийн засагт амжилттай оролцох ирээдүйн ур чадварт бэлтгэхэд чиглэнэ хэмээн хөтөлбөрийн хэрэгжүүлэгчийн зүгээс онцолжээ.
