Сар шинийн баяр, амралтын өдрүүдэд ахмад настандаа хүндэтгэл үзүүлэн золголт хийх уламжлал Монгол орны өнцөг булан бүрд өргөн хүрээнд зохион байгуулагддаг.
Дээрх өдрүүдэд хүн амын нягтаршлаас хамааран ялангуяа нийслэл хотын тодорхой бүсүүдэд замын хөдөлгөөний ачаалал эрс нэмэгдэж, хөдөлгөөний эрчим буурдаг. Үүнтэй холбоотой иргэд, байгууллагаас “Манай зогсоол танд нээлттэй” уриалгыг дэвшүүлэн, өөрсдийн эзэмшлийн талбай, зогсоолыг золголт хийж буй иргэдэд түр хугацаанд нээлттэй ашиглуулах санаачилга гаргасан нь цахим орчинд олон нийтийн талархлыг хүлээгээд байна.
Өнөөдрийн байдлаар бүх шатны төрийн байгууллага болон Монголын сууц өмчлөгчдийн холбооны дээд зөвлөл зэрэг хувийн хэвшлийн 34 байгууллага баярын өдрүүдэд замын хөдөлгөөний ачааллыг бууруулах, иргэдийн аюулгүй, тав тухтай зорчих нөхцөлийг бүрдүүлэхэд чиглэсэн хамтын ажиллагааны хүрээнд дэвшүүлээд буй уриалгыг дэмжин оролцохоо илэрхийлээд байна.
Иймд иргэн, аж ахуй нэгж та бүхнийг баярын өдрүүдэд “Манай зогсоол танд нээлттэй” уриалгыг дэмжин хамтран ажиллахыг ЦЕГ-аас хүслээ.
