Ч.ЗОТОЛ 
Дорноговь аймгийн Сайншанд сумын малчин Д.Норсүрэнгийн 12 үхэр үхсэн нь тус газарт ураны хайгуул хийж буй Францын “Арева”-ийн салбар, “Кожеговь” компанийн үйл ажиллагаатай холбоотой тухай шуугиан гарсан билээ. Энэ мэдээллийн мөрөөр холбогдох газрууд шалгаж эхний хариу хор хөнөөлгүй гэж гарсан ч дахин үхэр үхжээ. Шинжилгээний хариу зүгээр гэж гарсан ч тугал, бяруунууд үхсээр байгаад гайхаж байгаагаа малчин Д.Норсүрэн ярилаа.
Өнгөрсөн сарын 26-29-нд Мэргэжлийн хяналт, Онцгой байдал, Цөмийн энергийн газар болон Байгаль орчны иргэний зөвлөлийнхөн газар дээр нь ажиллахдаа тэдний бууц, худаг болон “Кожеговь” компанийн өрөмдсөн цооногийн орчмоос хөрсний долоо, усны хоёр дээж авч Цацрагийн хяналтын шинжилгээ, тохируулгын лаборатори, Геологийн төв лаборатори болон Ус сувгийн удирдах газрын Усны төв лабораторит шинжилгээнд өгсөн байна. Цацрагийн тунгийн чадлын хэмжилтийн дүн байгалийн цацрагийн фон төвшний зөршөөрөгдөх хэмжээнээс даруй хоёр дахин бага буюу хор хөнөөлгүй гэж гарсныг Цөмийн энергийн газраас өмнө нь мэдээлсэн.
Мөн усан дахь радионы хуримтлалын хэмжээ “Ундны ус, эрүүл ахуйн шаардлага, түүнд тавигдах хяналт” стандартын зөвшөөрөгдөх дээд хэмжээнээс 90.09 дахин бага гэсэн хариу гарсныг мэдэгдсэн билээ. Харин Геологийн төв лаборатори, Улсын төв лаборатори, малын дотор эрхтнээс дээж авсан улсын мал эмнэлгийнхний хийсэн шинжилгээний хариу хараахан гараагүй. Гарсан ч салбарын яамдад дүгнэлтийг хүргүүлж, холбогдох газрууд албан ёсоор мэдээлнэ хэмээн албаны хүмүүс хэллээ. 
Дорноговийн Улаанбадрах сум болон хаяа залгаа сумын нутгийг дамнасан ураны хайгуулын 2000 гаруй цооног байдаг аж. Мөн Баянбогд голын усан дотор өрөм тавьж, цооног үүсгэснийг нутгийн малчид тухайн үед сумын иргэд нийтийн хуралд хэлж байжээ.
