Халимагийн “Байн Тег” бүжгийн хамтлаг олон улсын “Азийн зүрх” уралдаанд амжилттай оролцож, тэргүүн байрын шагнал хүртлээ. Шүүгчид ганцхан ялагч тодруулах боломжгүй хэмээн үзэж, гол шагналыг хамгийн шилдэг хамтлагуудын дунд хувааж хүртээсний нэг нь “Байн Тег”  болсон байна. Гэвч мөнгөн шагналаас илүү чухал нь хамтлагийн уран бүтээлчид халимаг бүжгийн урлагийг олон улсын үзэгчдэд таниулж, олон улсын уралдаанд оролцогчдын сэтгэлийг татсан явдал гэж Халимагийн мэдээллийн сувгууд мэдээлжээ.

Шүүгчдийн нэг, дэлхийн хамгийн нэр хүндтэй сургуулиудын нэгэнд тооцогддог Сөүл дэх Бүтээлч үйлдвэрлэлийн институтын захирал тус хамтлагийн залууст суралцах урилга өгсөн байна.

Калмык инфо мэдээлэхдээ  “Байн Тег” ойрын хугацаанд Улаанбаатар (Монгол), Сөүл (Өмнөд Солонгос), Улаан-Үд (Буриад, ОХУ) хотуудад хамтарсан тоглолт, фестивалийн урилгыг хүлээн аваад байна гэсэн байна. 

“Байн Тег” хамтлаг баярын тоглолтоо нутагтаа аравдугаар сарын 5-нд хийх аж.

Эх сурвалж: zms.mn