Олон Улсын Санхүүгийн Корпораци (ОУСК) нь дижитал шилжилт болон санхүүгийн хүртээмжийг дэмжих зорилгын хүрээнд Монголын тэргүүлэх финтек компани болох АНД Глобалын Series B шатны хөрөнгө оруулалтанд 7 сая ам.долларын санхүүжилт олголоо. Энэхүү хөрөнгө оруулалт нь санхүүгийн үйлчилгээний инновацыг дэмжих, жижиг, дунд бизнес эрхлэгчдэд санхүүжилт авах боломжийг өргөжүүлэх, ажлын байр нэмэгдүүлэх, эдийн засгийн төрөлжилтийг хурдасгах зэрэг олон талын ач холбогдолтой юм.
ОУСК-ийн хөрөнгө оруулалтаар АНД Глобал нь өөрийн технологийн нэгж болох АНД Солюшнс Пти Лтд-р дамжуулан хиймэл оюун ухаанд суурилсан шийдлүүдийг улам сайжруулж, дижитал шилжилт хийж буй санхүүгийн байгууллагуудад зориулсан бүтээгдэхүүн, үйлчилгээгээ өргөжүүлэхээр зорьж байна. АНД Солюшнс Пти Лтд нь бичиг баримт боловсруулах, зээлийн оноо тогтоох болон зээлийн менежментийн системийн цогц бүтээгдэхүүнүүдийг санал болгодог бөгөөд эдгээр шийдлүүд нь өнөөдрийн байдлаар 11 улсад амжилттай нэвтэрч, идэвхтэй хэрэглэгдэж байна.
Мөн энэхүү түншлэлийн хүрээнд АНД Глобал-ийн охин компани, Монголын Хөрөнгийн Биржд бүртгэлтэй нээлттэй хувьцаат компани болох "ЛэндМН ББСБ" ХК-ээр дамжуулан санхүүгийн хүртээмжийг нэмэгдүүлэхээр хамтран ажиллах юм. Ийнхүү “ЛэндМН ББСБ” ХК нь компанийн засаглалын ил тод байдал, эрсдэлийн удирдлага, хариуцлагатай зээл олголтын чиглэлээр олон улсын хүлээн зөвшөөрөгдсөн шилдэг туршлагуудыг нэвтрүүлэх стратегийн чадамжтай болж, хөгжлийн дараагийн шатандаа шилжиж байна. Тус компани нь 1.3 сая гаруй бүртгэлтэй хэрэглэгчтэй бөгөөд Монгол Улсын эдийн засгийн идэвхтэй хүн амын 80 гаруй хувийг хамарч, бичил, жижиг, дунд бизнес эрхлэгчдэд санхүүгийн үйлчилгээг илүү хүртээмжийг нэмэгдүүлэхэд тэргүүлэх үүрэг гүйцэтгэсээр байна. Монгол Улсад нийт ажиллах хүчний 70 орчим хувийг жижиг, дунд бизнес эрхлэгчид бүрдүүлдэг бөгөөд энэ салбарын гуравны хоёр орчим хувийг эмэгтэйчүүд удирдан авч явдаг. Гэсэн ч барьцаа хөрөнгийн дутагдал болон бусад нийгэм эдийн засгийн бэрхшээлүүдээс шалтгаалан албан ёсны санхүүгийн хүртээмж хязгаарлагдмал байсаар байна. ОУСК-ийн тооцоолсноор, жижиг, дунд бизнесийн санхүүжилтийн дутагдал нь ДНБ-ий 10.6 хувьд хүрч байгаа нь энэ салбарын санхүүгийн хэрэгцээ хангалтгүй байгааг тод харуулж байна. Ийм нөхцөлд, санхүүгийн хүртээмжийг сайжруулах, ЖДБ-үүдийг бодитоор дэмжих чиглэлээр "ЛэндМН ББСБ" ХК-ийн гүйцэтгэх үүрэг нь Монгол Улсад нэн чухал ач холбогдолтой.
"Энэ бол бидний алсын хараа оновчтой байсныг, баг хамт олны маань тууштай хөдөлмөр, цаашдын өсөн дэвших өндөр чадамжийг нотолсон стратегийн чухал алхам боллоо. Монгол Улсаас төрөн гарсан стартап компанийн хувьд бид зорилгодоо хүрэхийн тулд шинэ сорилт, шинэ боломж бүрийг ашиглан, хуримтлуулсан туршлагаа үнэт хөрөнгө болгон, тогтвортой хөгжил рүү тууштай урагшилж байгаадаа бахархдаг. АНД нь санхүүгийн үйлчилгээг илүү хүртээмжтэй, инновацлаг байдлаар хүргэх дээр анхааран ажилладаг. Үүгээрээ бид ОУСК-тай зорилго нэгдэн, утга учиртай, итгэлтэй түншлэлийг эхлүүлж байна. ОУСК-ийн олон улсын туршлага, өргөн цар хүрээ нь бидний нөлөө, хүртээмжийг нэмэгдүүлж, бүс нутаг болон дэлхийн санхүүгийн салбарт бодит хувь нэмэр оруулах боломжийг улам өргөжүүлнэ гэдэгт бид бүрэн итгэлтэй байна" хэмээн АНД Глобал компанийн Гүйцэтгэх захирал Баатархүүгийн Хос-Эрдэнэ онцоллоо.
ОУСК-ийн Монгол Улс дахь суурин төлөөлөгч Маттье Лө Блан “Хүн ам сийрэг тархан суурьшсан Монгол Улсын хувьд санхүүгийн үйлчилгээний хүртээмжийг нэмэгдүүлэхэд дижитал шийдлүүд асар их үр нөлөөтэй. ОУСК нь технологид суурилсан гарааны бизнесүүдийг дэмжиж, хэрэглэгчдэд нэн шаардлагатай бүтээгдэхүүн үйлчилгээг дижитал хэлбэрт шилжүүлснээр ажлын байр бий болгох, тэр дундаа эмэгтэйчүүд болон залуусын хөдөлмөр эрхлэлтийг дэмжихэд чиглэн ажилладаг бөгөөд энэхүү хамтын ажиллагаа нь бидний дээрх зорилгын хүрээнд авч хэрэгжүүлж буй чухал алхмуудын нэг юм” хэмээн онцолжээ.
1997 оноос хойш ОУСК нь Монгол Улсад 5 тэрбум ам.долларын хөрөнгө оруулалт хийж, тогтвортой уул уурхай, банк, дэд бүтэц, үйлчилгээ, жижиг, дунд бизнесийг дэмжих зэрэг хувийн хэвшлийн олон төслийг хэрэгжүүлж ирснээс гадна бизнес, хөрөнгө оруулалтын орчныг сайжруулах чиглэлээр зөвлөх үйлчилгээний цар хүрээгээ өргөжүүлсээр байна. Энэ удаагийн хөрөнгө оруулалт нь сүүлийн арван жилд Монгол Улсад хийж буй анхны хувьцааны (equity) хөрөнгө оруулалт юм.
Дэлхийн Банк Группийн гишүүн ОУСК нь хөгжиж буй орнуудын хувийн хэвшилд чиглэсэн дэлхийн хамгийн том хөгжлийн байгууллага юм. Бид дэлхийн 100 гаруй оронд үйл ажиллагаагаа явуулдаг бөгөөд өөрсдийн хөрөнгө, туршлага, нөлөөллийг ашиглан хөгжиж буй орнуудад шинэ зах зээл, боломжуудыг бий болгохын тулд ажилладаг. 2025 оны санхүүгийн жилд ОУСК-аас хөгжиж буй орнуудын хувийн хэвшил, санхүүгийн байгууллагуудад 71.7 тэрбум ам. долларын туслалцааг үзүүлсэн бөгөөд дэлхийн хэмжээний томоохон гамшгийн үр нөлөөлөлтэй тэмцэж байгаа энэ үед ядууралтай тэмцэх, өсөлт хөгжлийг эрчимжүүлэхэд хувийн хэвшлийг үүрэг оролцоог нэмэгдүүлэхэд хувь нэмрээ оруулжээ. Дэлгэрэнгүй мэдээллийг www.ifc.org -с авах боломжтой.
Эх сурвалж: zms.mn
