Монголын телевизийн салбарт 23 жилийн турш бүтээлч, тууштай хөдөлмөрлөсөн сэтгүүлч, хөтлөгч Н.Нандинцэцэг 2022 оны 7-р сарын 8-ны өдөр Радио, Телевизийн салбарын тэргүүний ажилтан цол хүртсэн нь түүний олон жилийн хөдөлмөрийн бодит үнэлгээ байлаа.
Тэрээр Монголын телевизийн салбарт шинэ стандарт тогтоож, нэвтрүүлгийн шинэ хэлбэрүүдийг нэвтрүүлсэн сэтгүүлчийн нэг бөгөөд сэтгүүлзүй, хөтлөлтийн чиглэлд түүний оруулсан хувь нэмэр нь сүүлийн 20 жилийн турш тодхон харагдаж байна.
Телевизийн хөгжлийг тодорхойлсон шинэчлэлүүд
Н.Нандинцэцэгийн телевизийн карьерын эхлэл болох “Өглөө” нэвтрүүлэг нь Монголын анхны өглөөний хөтөлбөрүүдийн нэг байсан бөгөөд үүний дараагаас бүх хувийн телевизүүд өглөөний нэвтрүүлэгтэй болж эхэлсэн нь түүний нөлөөллийн тод жишээ байв.
Тэрээр зөвхөн телевизийн форматыг шинэчлэх төдийгүй “Нандиагийн ток шоу”-г гаргаснаар Монголын ток шоуны урсгалд шинэ өнгө аяс нэмсэн. Энэхүү ток шоуны дараагаас бусад телевизүүд “Сайнаа”, “Одноо”, “Чимгээ” зэрэг төстэй ярилцлагын хэлбэртэй ток шоунуудыг гаргаж эхэлсэн нь түүний эхлүүлсэн шинэ хэв маяг ямар их нөлөөтэй байсныг илтгэнэ.
“Эфир 3,2,1” шоу: Шинэ үеийн сэтгүүлч, хөтлөгчдийг тодруулах платформ
2017 онд Н.Нандинцэцэг телевизийн салбарын дараагийн шинэ дүр төрхийг тодруулах зорилготой “Эфир 3,2,1” реалити шоуг санаачлан зохион байгуулсан. Энэхүү шоу нь улсын хэмжээнд зохион байгуулагдсан, хамгийн том мэргэжлийн шалгаруулалтын нэг болсон бөгөөд Монгол даяар 300 гаруй залуу хөтлөгчийн мөрөөдөл, авьяасыг сорих өрсөлдөөний талбар болж чадсан юм.
Хоёр сарын турш МҮОНТ-ээр цацагдсан уг шоу нь ирээдүйн хөтлөгч, сэтгүүлчдийг тодруулж, тэднийг бодит ажлын талбарт бэлтгэсэн гэдгээрээ онцлог байлаа. Тэмцээний шүүгч, продюсерээр ажилласан Н.Нандинцэцэг нь шалгаруулалтын бүх үе шатанд мэргэжлийн өндөр түвшинд үнэлгээ өгч, шилдэг оролцогчдыг тодруулахад чухал үүрэг гүйцэтгэсэн.
Монголын телевизийн салбарт контентийн хэлбэрийг шинэчилж, дараагийн үеийн сэтгүүлчдийг бэлтгэх зорилготой хоёр томоохон төслийг амжилттай хэрэгжүүлсэн гавьяаг нь үнэлэн Н.Нандинцэцэгт Радио, Телевизийн салбарын тэргүүний ажилтан цол олгожээ.
Тэрээр ярилцлагын нэвтрүүлгийг энтертайнмент хэлбэрт оруулж шинэ шатанд гаргасан, дараагийн үеийн сэтгүүлчдийг шалгаруулах хамгийн том телевизийн төслийг удирдсан, телевизийн стандарт шинэчлэх ажилд манлайлан оролцсон нь түүний салбартаа оруулсан үнэлж баршгүй хувь нэмэр юм.
Н.Нандинцэцэгийн нэвтрүүлэг, түүний эхлүүлсэн төслүүд Монголын телевизийн салбарын хөгжлийн чигийг тодорхойлсон, ирээдүйг бүтээсэн бодит хувь нэмэр гэдэгт эргэлзэх зүйлгүй.
